Amos 9

Jinghpaw Common Language Bible © Bible Society of Myanmar, 2009

← Chapter 8 Jump to:

1Ngai gaw tawn hkungri makau e tsap nga ai Madu hpe mu nngai. Shi gaw ndai hkang da ai ga jaw wu ai: “Nawku Htingnu shadaw ni a pungding ni hpe agrawp shadaw kau mu, shaloi grai ja ai npawt nhpang gaw gari ashun wa na ra ai. Dai ni hpe agrawp daw ai hte amyu masha ni a ntsa de hkrat shangun u. Ngai gaw ngam nga ai amyu masha ni hpe majan hta sat kau na we ai. Kadai mung hprawng lu na n rai; langai mi mung lawt lu na ra ai n rai.

2Shanhte gaw katsan ga de yu wa ai shanhte a lam htu tim pyi, ngai shanhte hpe rim la na nngai. Shanhte sumsing lamu de lung ai rai tim pyi, ngai shanhte hpe shayu la na nngai.

3Shanhte Hkarmela Bum pungding ntsa e makoi nga ai rai yang, ngai shanhte hpe hkan tam rim la na nngai. Shanhte gaw ngai kaw nna panglai htumpa hta makoi nga ai rai yang, shanhte hpe kawa na matu panglai baren numraw hpe ngai hkang dat na nngai.

4Shanhte gaw shanhte a gumlau hpyen ni a lata hta rim hkrum mat wa ai rai yang, sat kau na matu ngai shanhte hpe aming jaw na nngai. Ngai gaw shanhte hpe karum na matu n rai, shanhte hpe shamyit kau na matu daw dan da nga nngai.

5Chyahtum Chyalai N-gun rawng ai Tsaw Htum ai dai Madu gaw ginding aga hpe ahtawk hkra dat ai hte dai gaw ashun nga ai; dai hta nga ai ni yawng sharung shayawt nga ma ai. Mungkan ga ting gaw Nila hka nu zawn rawt tung wa nna kyet mat nga ai.

6Dai Madu gaw shi a nta hpe sumsing lamu ni hta gap da nna, ginding aga a ntsa e lamu madin tawn da nga ai. Shi gaw panglai hka ni hpe shaga dat nna dai ni hpe ginding aga ntsa de ru dat wu ai. Shi a mying shingteng gaw dai Madu rai nga a hka!

7Dai Madu gaw, “Israela amyu masha ni e, ngai gaw nanhte hpe Ehtiopi masha ni zawn myit nawn da we ai. Ngai gaw nanhte hpe Egutu mung kaw nna woi shapraw wa ai zawn Hpilisti masha ni hpe Kreti mung na, Suri masha ni hpe Kira mung kaw na woi shapraw da ni ai.

8Tsaw Htum ai dai Madu ngai gaw yubak mara hte hpring ai ndai Israela mungdan hpe azi yu nga nngai, ngai gaw dai mungdan hpe ginding aga a man kaw na jahten kau na nngai. Rai ti mung, ngai gaw Yaku a amyu matu mara yawng hpe jahten shaza kau na nngai n rai.

9“Ngai gaw n-gu hpe hking kau ai zawn, Israela amyu masha ni hpe hking kau na matu hkang da na nngai. Ngai gaw akyu n rawng ai ni yawng hpe yeng seng kau na matu shanhte hpe masha amyu baw ni a lapran e hking kau na nngai.

10Nye a amyu masha ni hta na yubak kap ai masha ni gaw, ‘Karai Kasang gaw anhte hpang de tsin-yam tsindam dep shangun na n rai,’” nga nna tsun ai ni yawng majan hta sat kau hkrum na mara ai.

11Dai Madu gaw, “Ngai gaw daw hten mat ai nta langai zawn rai nga ai Dawi a mungdan hpe bai gaw gap da ai shaloi dai nhtoi du wa na ra ai. Ngai gaw de a bunghku ni hpe bai lajang ai hte dai hpe bai gaw gap da na nngai. Ngai gaw dai hpe bai gaw gap ai hte moi na zawn bai de da na nngai.

12Dai rai nna, Israela amyu masha ni gaw naw ngam nga ai Edom mung a lamu ga hte nye a matu ngu nna san da sai amyu baw ni yawng hte hpe up hkang na mara ai,” ngu nna dai amu shabyin na ra ai dai Madu tsun ai.

13Dai Madu gaw, “Nhtoi ni du wa mara ai: “Nli tum tu ai gaw dai hpe dan la lu ai hta grau lawan tu na ra ai, sabyi si ni gaw sabyi ntsin galaw shapraw lu ai hta grau lawan tu na mara ai. Bum ni hta dwi ai sabyi ntsin kahte hkrat na ra ai, kawng ni hta sabyi ntsin ni lwi na ra ai.

14Ngai gaw nye a amyu masha ni hpe shanhte a mung de woi wa na nngai. Shanhte gaw hten run mat sai shanhte a mare ni hpe bai gaw gap nna dai yang e nga na mara ai; shanhte gaw sabyi sun ni hkai sharing nna sabyi ntsin lu na mara ai; shanhte gaw sun ni galaw nna shanhte hkai ai shat mai lu sha na mara ai.

15Ngai gaw nye a amyu masha ni hpe ngai shanhte a matu jaw ai lamu ga hta hkai da na nngai, shanhte gaw bai baw kau hkrum na mara ai n rai,” ngu nna tsun ai. Dai Madu na a Karai Kasang tsun nu ai.

← Chapter 8 Jump to: