Ezekiel 9

Jinghpaw Common Language Bible © Bible Society of Myanmar, 2009

← Chapter 8 Jump to: Chapter 10 →

1Dai hpang, ngai gaw, “Ndai mare hpe ari jaw hkyen nga ai masha ni e, ndai shara de sit sa wa mi. Nanhte a laknak ni hpe nanhte hte rau lang sa wa mi,” nga nna Karai Kasang jahtau tsun ai nsen hpe na nngai.

2Yu mu, Nawku Htingnu a dingdung maga na shinggan chyinghka lam kaw nna marai kru kalang lata rawt pru wa nhtawm shanhte langai hte langai hta hpyen laknak ni lang da nga ma ai. Shanhte hte rau lachyit nba lawai nna laika ka na matu arai lama ma lang ai wa mung lawm nga ai. Shanhte yawng sa nna magri mang hkungri e tsap nga ma ai.

3Dai hpang, Israela a Karai Kasang a htoi tu ai hpung shingkang gaw shanu nga ai singkaw tu ai hkrung kanu ni kaw na rawt lung wa nhtawm Nawku Htingnu a chyinghka lam de sit sa wa ai. Dai Madu gaw lachyit nba lawai ai wa hpe shaga let,

4“Yerusalem ting de dinghkren hkawm nna, mare kata e galaw ai matsat shabat amu yawng a majaw myit ru yawn hkyen ai hte tsin-yam tsindam hkrum sha nga ai masha shagu hte a kahtan ntsa e masat shakap da u,” ngu nna tsun wu ai.

5Karai Kasang gaw kaga masha ni hpe, “Shi a hpang hkan nhtawm mare ting hta dinghkren hkawm let kahtam sat kau mu. Langai mi hpe mung asak a hkyamsa lam hkum jaw myit; kade a ntsa e mung matsan hkum yu dum myit.

6Dingla ni hte shabrang ni hpe mung, mahkawn ni hte kanu ni, ma kaji ni hpe htau sat kau mu. Rai ti mung, kahtan ntsa e masat shakap da hkrum ai ni kadai hpe mung hkum hkra myit. Dai amu hpe nye Nawku Htingnu shara hta galaw hpang mu,” ngu nna tsun ai ga hpe ngai na nngai. Shanhte gaw dai Nawku Htingnu ndaw e tsap nga ai ningbaw ni hpe shawng sat hpang ma ai.

7Karai Kasang gaw shanhte hpe, “Nawku Htingnu hpe awu asin di kau mu! Wang ni hta moi mang ni hte jahpring da mu! Bungli galaw manu!,” ngu nna tsun wu ai. Dai rai nna shanhte gaw mare hta nga ai amyu masha ni hpe sat hpang manu ai.

8Shanhte sat shamyit mat wa nga yang, dai shara hta ngai chyu sha hti ngam nga ai hte ngai gaw ga de gum dagup nhtawm, “Tsaw Htum ai Madu e, nang gaw Yerusalem hpe grai wa pawt sindawng nna Israela mung hta naw ngam nga ai masha hkum shagu hpe sat kau na ngu wu ni?,” ngu nna jahtau tsun wu ai.

9Karai Kasang gaw, “Israela hte Yuda amyu masha ni gaw hkrit hpa yubak hte shut hpyit ai mara lu nga ma ai. Shanhte gaw mungdan ting hta sai kap amu shut hpyit kau manu ai hte Yerusalem mung ru hka amu ni hte hpring chyat nga sai. Dai Madu ngai nan shanhte a mungdan hpe kau da nna, shanhte hpe n mu lu sai, nga nna shanhte tsun shajang ma ai.

10Rai ti mung, ngai gaw shanhte a ntsa e matsan yu dum na n rai; kaga masha ni hpe shanhte galaw ai hte maren shanhte hpe galaw dan na nngai,” ngu nna htan wu ai.

11Dai hpang, lachyit nba lawai ai wa gaw, “Ngai gaw na a hkang da ai ga ni hpe galaw se ai,” nga nna dai Madu hpang de nhtang wa let tang madun wu ai.

← Chapter 8 Jump to: Chapter 10 →