Hebrews 13

Jinghpaw Common Language Bible © Bible Society of Myanmar, 2009

← Chapter 12 Jump to:

1Nanhte gaw Hkristan hpu nau ni rai nga myit dai hte maren shada da tsaw ra nga mu.

2Nanhte a nta ni hta manam ni hpe hkap hkalum daw jau na hkum malap kau myit. Shing rai daw jau ai nkau mi gaw lamu kasa ni hpe n dum shami daw jau hkrup masai.

3Nanhte gaw htawng rawng hkrum nga ai ni hte rau htawng rawng nga ai ni zawn shanhte hpe adum nga mu. Tinang ni nan nni nkri hkrum sha nga ai ni zawn, nni nkri hkrum sha nga ai ni hpe adum nga mu.

4Hkungran ai lam hpe masha yawng mayawng hkungga shagrau lu na rai myit dai hte madu wa madu jan shada da a ntsa e sadi dung nga lu na rai myit dai; Karai Kasang gaw arawn alai hten ai ni hte num shaw la shaw ai ni hpe jeyang na ra ai.

5Nanhte a asak hkrung lam hpe gumhpraw marin ai hta n lawm mat shangun ai sha lu ai made hte myit dik nga mu, hpa majaw nga yang, Karai Kasang gaw, “Ngai nang hpe galoi mung n kau da na nngai, ngai nang hpe galoi mung n kabai kau na de ai,” nga nna tsun ai.

6Dai re ai majaw, “Dai Madu gaw ngai hpe karum ai wa rai nga ai, ngai hpa hpe mung hkrit kang na n rai. Kadai wa ngai hpe hpa di lu na rai ta?,” nga nna nden ja ai myit hte anhte tsun nga ga.

7Nanhte hpe Karai Kasang a mungga tsun dan lai wa sai shawng de na nanhte a lam woi ningshawng ni hpe myit dum nga mu. Shanhte kaning rai asak hkrung nna gara hku si wa masai hpe amyit dum nga nna, shanhte a makam masham hpe len ningli la nga mu.

8Yesu Hkristu gaw mani, dai ni, htawm prat dingsa maren anga nga ai.

9Shawoi n mu n na yu ai sharin shaga ai lam tsasam amyu myu gaw nanhte hpe dai teng man ai lam kaw na lam hkum woi shadam shangun myit. Lusha hte seng ai hkan sa tara ni hpe madat mara hkan shadik ai hku n re ai sha Karai Kasang a chyeju kaw na wenyi n-gun atsam hpe hkam la ai mahtang grau mai kaja nga ai; dai lusha hte seng ai tara ni gaw hkan sa shadik ai ni hpe hpa n karum lu nga ai.

10Yuda ni a nawku shara kata hta daw jau ai hkinjawng ni gaw anhte a tawn hkungri ntsa na hpa baw hkungga hpe mung sha na ahkang hpa n lu ma ai.

11Yuda hkinjawng Agyi kaba wa gaw dusat ni a asai hpe yubak mara raw ya ai hkungga hku nna Chyoi Pra Htum ai Shara de la jashawn shang wa ti mung, dai dusat hkungga hkum ni hpe gaw shinggan e nat kau wu ai.

12Ndai lam a majaw, Yesu mung shi a asai hte masha ni hpe yubak mara kaw na jasan jaseng la na matu mare shinggan e si hkam nu ai.

13Dai re ai majaw, anhte gaw dap shinggan de shi kaw pru sa nna shi hkam ai kaya kahpa aroi arip lam hpe jawm hkam la ga.

14Hpa majaw nga yang, ndai ga ntsa e anhte a matu grin nga ai mare n nga mali ai rai nna, anhte gaw htawm hpang du na ra ai mare hpe anhte tam nga ga ai.

15Dai rai nna anhte gaw shi hpe anhte a Madu re ai ngu nna yin la ai n-gup ni hte chyeju shakawn ai anhte a hkungga hpe Yesu a gawp e Karai Kasang kaw tut nawng e nawng ya nga ga.

16Mai kaja ai amu galaw na nanhte shada da karum shingtau hkat na lam hpe hkum malap kau myit, hpa majaw nga yang, shing re ai hkungga ni gaw Karai Kasang hpe sharawng awng shangun nga ai.

17Nanhte a lam woi ningshawng ni a ga hpe madat mara nna shanhte a hkang da ai ga ni hpe hkan sa galaw mu. Shanhte gaw shanhte galaw daw ai amu a jahpan hpe Karai Kasang kaw dan lu na rai nna, shanhte gaw nanhte a myit masin ni hpe n hkring n sa sin ya nga ma ai. Shanhte a ga hpe nanhte madat mara myit yang gaw shanhte galaw ai bungli hpe kabu gara ai hte galaw na mara ai: dai n rai yang shanhte myit yawn let galaw na mara ai rai nna na a matu hpa akyu mi rawng na n rai.

18Anhte a matu mara n sim n sa akyu hpyi nga mu, anhte ni gaw tinang ni a htauli htaula myit asan apra rai nga ai lam kam lu ga ai, hpa majaw nga yang, anhte gaw ten shagu teng man ai lam galaw mayu ai myit rawng nga ga ai.

19Karai Kasang gaw ngai hpe nanhte hpang de alawan bai sa du shangun u ga, akyu hpyi na matu ngai nanhte hpe aja awa lajin dat made ai.

20Shi a asak hpe nawng ya kau nna si hkam ai hte htani htana ga shaka hpe dazik dawk da sai majaw sagu ni a Sagu Rem Wa Kaba ngu ai anhte a Madu Yesu hpe Karai Kasang gaw si ai kaw na bai jahkrung sharawt la nu ai.

21Nanhte gaw shi a myit ra ai lam hkan galaw lu na matu nanhte hta ra kadawn nga ai mai kaja ai lam shagu hpe ngwi pyaw ai Karai Kasang gaw nanhte hpe jaw ya myit ga; Madu gaw shi a myit ra ai hku hte maren, Hkristu a marang e anhte hpe jahkum shatsup ya mi ai. Yesu Hkristu a marang e, shi a sharawng awng ai lam hpe anhte shabyin shatai u ga, Hkristu hta htani htana prat dingsa hpung shingkang anga nga u ga law. Amen.

22Hpu nau ni e, ndai n-gun jaw shadum jahprang ai ga hpe hkam sharang ai hte madat la na matu ngai nanhte hpe lajin dat made ai; hpa majaw nga yang, ngai nanhte hpang de ka dat ai ndai laika gaw grai wa galu ai n rai.

23Anhte a hpu nau wa Timohti gaw htawng kaw na lawt pru wa ra ai lam nanhte hpe chye shangun mayu nngai. Shi ngai hpang de aten dep du sa wa ai rai yang, nanhte hte hkrum na matu ngai sa du ai shaloi shi hpe ngai hte rau woi sa wa na nngai.

24Nanhte a lam woi ningshawng ni yawng hte hte, Karai Kasang a amyu masha ni yawng hpe shakram ya mi, Itali mung na hpu nau ni nanhte hpe shakram dat ma ai.

25Karai Kasang a chyeju gaw nanhte yawng hte rau anga nga u ga law.

← Chapter 12 Jump to: