Judges 21

Jinghpaw Common Language Bible © Bible Society of Myanmar, 2009

← Chapter 20 Jump to:

1Israela masha ni gaw Mizpa mare e zup hpawng nga ma yang, dai Madu hpe dagam ga sadi shaka tawn da ma ai: “Anhte a shayi sha langai mi hpe pyi Benyamin masha hte hkungran la shangun na ahkang kadai hpe mung n jaw na saga ai.”

2Dai rai nna ya Israela amyu masha ni gaw Behtela mare de sa nna Karai Kasang a man e shana de du hkra dung nga let nsen ja ja hte ahkup ahka nga hkra, sharung shayawt nhtawm,

3“ Madu Israela a Karai Kasang e, ndai zawn hpa majaw byin mat sani? Israela hta na Benyamin amyu bawsang gaw hpa lam a majaw htum mat na hkyen nga a ni?,” ngu nna tsun ma ai.

4Hpang jahpawt jau jau aten hta, dai yang e tawn hkungri gaw nhtawm mahku hkungga ni hte hkum ting nat nawng ai shagu hkungga nkau mi hpe nawng jau ma ai.

5Shanhte gaw, “Mizpa hta dai Madu a man e n sa hpawng lawm ai Israela amyu bawsang ni yawng hta na kadai naw nga nga a ta?,” ngu nna san ma ai. (Mizpa de n sa ai wa kadai mung sat kau ai hkrum na rai wu ai, ngu nna ga shaka hte dagam kau manu ai.)

6Israela amyu masha ni gaw shanhte a kanau Benyamin amyu matu mara ni a matu yawn hkyen ai hte hkam sha nga ma ai rai nna, “Dai ni Israela hta amyu bawsang langai mi mat mat sahka.

7Naw ngam nga ai Benyamin lasha ni a matu madu jan tai ya na ni hpe anhte kaning rai jaw ya lu na rai nga ga ta? Anhte a shayi sha ni kadai hpe mung shanhte hpe n ya sha na lam mung, dai Madu hta anhte dagam let ga sadi tawn kau saga ai,” ngu nna tsun ma ai.

8Shanhte gaw Israela amyu hta na Mizpa de n dawng pru ai kadai naw nga nga ma ai hpe san sagawn yu ma yang, Gilead mung na Yabesha mare masha ni langai mi mung n pru sa ma ai hpe shanhte mu chye ma ai;

9luksuk ni a hpyen jahpan hpe hti yu ai shaloi, Yabesha mare masha langai mi mung n lawm nga ai.

10Shaloi zup hpawng ai ni gaw shanhte hta na magrau grang htum ai masha mun mi hkying lahkawng hte hpe shangun dat nhtawm, “Yabesha mare de sa nna numsha hte ma kaji ni hte hpawn sat kau ma ai.

11Lasha ni yawng hte hkawn jet n rai sai numsha shagu hte hpe mung sat kau mu,” ngu nna hkang dat ma ai.

12Yabesha mare hta nga ai masha ni hta hkawn jet mali tsa hpe shanhte mu tam ma ai rai nna Hkanan mung Shilo mare na dap de shanhte hpe woi wa ma ai.

13Dai hpang shawa hpung ting gaw majan gasat ai hpe jahtum kau na matu Rimon lungbra e nga nga ai Benyamin masha ni hpang de shiga shana dat ma ai.

14Benyamin masha ni mung nhtang wa ma ai rai nna, kaga Israela masha ni gaw shanhte n sat kau ai Yabesha mare na numsha ni hpe ya sha ma ai. Rai ti mung shanhte a matu n law nga malu ai.

15Israela amyu bawsang ni a myit hkrum gumhpawn ai hpe dai Madu jahten kau ya nu ai majaw Benyamin masha ni a matu amyu masha ni yawn hkyen ai hkrum sha ma ai.

16Dai rai nna zup hpawng nga ai kaw na ningbaw ni gaw, “Benyamin amyu bawsang hta numsha ni kadai mung n nga masai. Dai majaw naw ngam nga ai lasha ni a matu madu jan tai ya na ni hpe anhte kaning rai lajang ya lu na rai nga ga ta?

17Amyu bawsang shi lahkawng hta na langai mi mung Israela hta na mat mat lu na n rai. Benyamin amyu bawsang hkrung nga lu na matu lam langai ngai hpe anhte tam lu na rai ga ai;

18rai ti mung anhte a shayi sha ni hta na langai ngai hte Benyamin masha hkungran na ahkang jaw ai kadai hta mung dagam dala hkrum u ga ngu nna anhte tsun kau saga ai majaw shanhte hpe anhte a shayi sha ni hte hkungran la lu na ahkang n jaw lu ga ai,” ngu nna tsun ma ai.

19Dai hpang shanhte gaw, “Shilo mare e shaning shagu galaw ai dai Madu a matu galaw ai poi gaw kade n na yang du wa ra ai,” ngu nna myit nawn da ma ai. (Shilo mare gaw Behtela a dingdung, Lebona a dingda, Behtela hte Shehkem lapran na lam a sinpraw de nga nga ai.)

20Shanhte gaw Benyamin masha ni hpe, “Nanhte sa nna sabyi sun ni hkan makoi nga nhtawm,

21sin yu nga mu. Dai poi galaw ai laman ka na nga Shilo mare na numsha ni pru wa ma ai shaloi, sabyi sun hkan na nanhte pru wa na rai myit dai. Nanhte hta na marai shagu hte gaw numsha ni hta na madu jan shatai la na langai hpra hpra hpe htim magra la nhtawm nang hte rau Benyamin lamu ga de woi mat wa na rai myit dai.

22Shanhte a kawa shing n rai kahpu kanau ni anhte hpe sa jawat ai shaloi, ‘Anhte a madu jan ni shatai na matu majan ginra kaw na shanhte hpe anhte n woi la na ga ai majaw chyeju hte shanhte a matu myit shakawp ya na ga ai. Anhte hpe nanhte n jaw ya myit dai majaw nanhte gaw nanhte a ga sadi hpe jahten kau ai mara lu nga myit dai n rai,’” ngu nna nanhte tsun lu na rai myit dai.

23Benyamin masha ni mung dai hku galaw ma ai rai nna, Shilo mare e ka pru wa ai numsha ni kaw na marai hkum dek madu jan shatai la na matu lata la shajang nhtawm shanhte hpe woi mat wa ma ai. Dai hpang shanhte mung tinang a sali ga de nhtang mat wa nna mare bai de nhtawm dai hkan e nga nga ma ai.

24Dai aten hta ngam nga ai Israela amyu masha ni mung tinang amyu bawsang, dinghku hte sut gan, nga ai buga de pru mat wa shajang ma ai.

25Dai aten hta Israela amyu hta hkawhkam n nga nga ai. Masha shagu hte gaw tinang ra sharawng ai hku galaw ma ai.

← Chapter 20 Jump to: