Leviticus 12

Jinghpaw Common Language Bible © Bible Society of Myanmar, 2009

← Chapter 11 Jump to: Chapter 13 →

1Dai Madu gaw Israela amyu masha ni a matu hkan sa na tara Mawshe hpe jaw wu ai.

2Numsha num hking lang ai laman n san n seng nga ai zawn shadang sha shangai ai numsha mung shangai ngut ai hpang sanit ya tup n san n seng nga ai.

3Dai ma hpe matsat ya ngu na shani e matu gadoi na rai nga ai.

4Dai hpang shi gaw jasan jaseng ai ladaw hte seng ai asai a majaw sumshi masum ya tup naw rawng nga na rai wu ai. Chyoi pra ai arai hpa mung n hkra ai sha, dai jasan jaseng nhtoi garai n-gu dingsa chyoi pra ai Sum de shang lu na n rai.

5Shayi sha shangai ai rai yang chyawm gaw num hking lang yang na zawn nhtoi shi mali ya tup n san n seng ai hte nga nga nna, jasan jaseng ai ladaw hte seng ai asai a majaw kru shi kru ya naw rawng nga na rai wu ai.

6Shadang sha shing n rai shayi sha shangai ai rai ti mung jasan jaseng ai nhtoi gu jang, wan nat hkungga a matu hkrudu shing n rai ura langai mi, dai Madu a hpung shingkang shanu nga ai Sum a shang wa chyinghka lam de hkinjawng wa kaw la sa na rai nga ai.

7Hkinjawng wa mung shi a hkungga hpe dai Madu hpang de nawng ya ai hte shi a n san n seng ai hpe la kau ya nna shi mung san seng wa na rai wu ai. Ndai gaw ma shangai ngut ai hpang na kanu langai hkan galaw na amu ni rai nga ai.

8Dai numsha mahtang sagu kasha n dang shapraw ai rai yang, ura lahkawng, shing n rai hkrudu lahkawng hpe wan nat hkungga a matu langai, htingrai hkungga a matu langai mi di nna la sa na rai wu ai. Hkinjawng wa gaw shi a n san n seng ai a matu htingrai htingrat ya na rai wu ai; shing rai shi gaw san seng wa lu na rai wu ai.

← Chapter 11 Jump to: Chapter 13 →