Numbers 36

Jinghpaw Common Language Bible © Bible Society of Myanmar, 2009

← Chapter 35 Jump to:

1Yosep a kasha Manashe a kashu, Mahkira a kasha Gilead a lakung lama hta na dinghku a ningbaw ni gaw Mawshe hte kaga ningbaw ni kaw sa ma ai.

2Shanhte gaw, “Dai Madu gaw hpaida da nna Israela masha ni hpe lamu ga karan ya na matu nang hpe hkang da nit dai. Shi gaw anhte a hpu nau Zelohpehad a matu shi a shayi sha ni hpe sali ga jaw na lam nang hpe hkang da nit dai.

3Rai ti mung, shanhte mahtang kaga amyu bawsang na lasha ni kaw wa ai rai yang, shanhte a sali ga gaw dai amyu bawsang ni hte seng mat na rai nna, anhte hpe jaw da ai sali ga yawng yawm mat na ra ai. Dai rai nna Shalawt Dat ai Shaning hta dut kau dat sai sut rai yawng hpe mi na sut madu ni a lata de bai ap ya ai shaloi,

4Zelohpehad a shayi sha ni wa ai amyu bawsang hta dinggrin jat wa nna anhte a amyu bawsang de mat mat na rai nga ai,” ngu nna tsun ma ai.

5Dai rai nna Mawshe gaw Israela amyu masha ni hpe dai Madu a hkang da ai ga tsun dan wu ai rai nna shi gaw, “Ya Manashe amyu bawsang tsun ai ga jaw nga ai rai nna,

6Zelohpehad a shayi sha ni mahtang tinang ra ai la kaw n dut n dang wa mu ga; rai ti mung shanhte a amyu bawsang kata kaw sha wa lu na ma ai,” ngu nna dai Madu hkang da nga ai.

7Israela masha shagu a sali ga gaw shi a amyu bawsang ni hta sha machyu nga na rai nga ai.

8Israela amyu bawsang hta sali ga hkringhtawng madu la lu ai numsha shagu gaw dai amyu bawsang hte sha seng ai la wa kaw wa lu na rai nga ai. Ndai hku nna, shi a kaji kawa sali ga hpe madu la na rai nga ai;

9dai sali ga gaw amyu bawsang langai kaw na langai de shalai kau lu na n rai nga ai. Amyu bawsang shagu mung tinang hte seng ai sali ga hpe matut nna madu la lu na rai myit dai,” ngu nna tsun wu ai.

10Dai rai nna Mawshe hpe dai Madu hkang da nu ai hte maren, Zelohpehad a shayi sha Mala, Hogla, Milhka hte Noa ni mung hkan galaw ma ai rai nna shanhte a aru asai daw hkrang ai ni lu la shajang ma ai.

12Shanhte gaw Yosep a kasha Manashe a amyu bawsang na lakung lama ni hta wa ma ai majaw sali ga mung shanhte a kaji kawa amyu matu hta grin nga malu ai.

13Ndai hte gaw Yerihko hte tawtap ngu na Yawdan hka hkran, Moba pa hta dai Madu Mawshe hpe jaw ya ai Israela masha ni a matu hkang da ai tara matsun ni rai nga ai.

← Chapter 35 Jump to: