Ecclesiastes 1

Jinghpaw Hanson Version Bible © Bible Society of Myanmar, 2009

Jump to: Chapter 2 →

1Dawi a kasha, Yerusalem hkawhkam, Tara Hkaw Sara a mung sumtu gaw, da ndai rai nga ai:

2‘Kaman lila, kaman lila,’ nga nna Tara Hkaw Sara nan tsun nga ai. Kaman lila, kaman lila, yawng mayawng kaman lila hkrai rai nga ai.

3Shinggyim masha gaw jan a npu e shachyen ai amu bungli yawng hta na, hpa akyu hkam la lu a ta?

4Masha a ban mi lai wa nna, ban mi bai paw pru nga ai: ginding aga chyawm gaw, dinggrin anga nga ai.

5Ajan mung, pru pru shang shang rai nna, shi pru wa ai shara de bai nhtang gat nga ai.

6Nbung gaw dingda maga de ang wa nna, dingdung maga hku bung pru wa ai: dai gaw tutnawng bung kayin nga nna, myi na lam de bai nhtang wa ai.

7Hka nu ni yawng nammukdara hta lwi ju nga timung, nammukdara gaw hpring wa ai n rai: hka nu ni ang wa ai shara de, n sim n sa lwi wa nhtawm, bai nhtang htang rai nga ai.

8Yawng mayawng gaw, masha n tsun lu hkra, hki ba shangun ai amu hkrai rai nga ai; myi gaw mu mada timung, mu jin ai, n rai; na gaw na lu timung, na tsu ai n rai.

9Byin na ra ai amu gaw, byin ngut sai amu hkrai rai nga ai; ya galaw ai amu gaw, galaw ngut sai amu hkrai rai nga nna, jan a npu e amu ningnan hpa mung n nga ai.

10Yu u, da ndai gaw amu ningnan rai nga ai, nga nna tsun dam yang, dai gaw moi chyaloi nhkoi, anhte a shawng e, byin ngut sai hkrai rai nga ai.

11Lai wa sai aprat ni hpe, kadai mung n dum lu ai; htawm hpang e du na ra ai ni mung, hpang na aprat ni hpe chye matsing lu na ma ai n rai.

12Ngai Tara Hkaw Sara gaw, Yerusalem mare hta, Israela ntsa e hkawhkam rai nga nngai.

13Ngai gaw, sumsing lamu npu e nga manga pra mapra hpe, hpaji byeng-ya hte sawk manaw yu na nga, myit shada da nngai: Karai Kasang shinggyim masha ni hpe jaw da ai amu bungli gaw, yak la ai amu hkrai rai nga ai.

14Jan a npu e shachyen ai amu amyu shagu hpe ngai mada mu ni ai; yu u, yawng hte gaw kaman lila hte nbung hpe shachyut ai hkrai rai nga ai.

15Magaw ai hpe malan lu ai n rai; yawm ai hpe hti shalawm lu ai n rai.

16Ngai gaw, Yerusalem mare hta e, nye a shawng e nga nga ai ni mahkra hta hpaji byeng-ya grau lu la nngai; gaja wa nye a myit masin gaw, zai byeng-ya, hpaji hparat hte chye chyang kaba rawng li ai, nga nna nye a kraw e ngai tsun nngai.

17Shing rai ngai gaw hpaji byeng-ya hpe mung, myit n su ai hte angawk ai lam hpe mung chye ginhka lu n ga, ngai myit makun nga nngai: dai mung nbung hpe shachyut ai hkrai rai nga ai gaw, ngai myit dum nngai.

18Kaning rai nme law, hpaji byeng-ya law yang, myit ru lam law wa ai; chye chyang jat ai wa gaw, yawn hkyen ai hpe shajat nga ai.

Jump to: Chapter 2 →