John 18

Jinghpaw Hanson Version Bible © Bible Society of Myanmar, 2009

← Chapter 17 Jump to: Chapter 19 →

1Yesu gaw dai ga tsun ngut jang, shi a sape ni hte rau pru wa nna, Kedron hkaraw wora hkran de rap sa ma ai: dai yang e sun nga nga ai rai nna, shi gaw sape ni hte dai de shang wa ma ai.

2Yesu gaw shi a sape ni hte law law lang dai de a sa ga nga ai majaw, shi hpe ap kau na wa Yuda mung, dai shara hpe chye da wu ai.

3Dai rai nna Yuda gaw, hpyen langa ni hte, Hkinjawng agyi ni hte Hparishe ni kaw na, hpyen du ni hpe lu la jang, pyengdin, shanan, ri nhtu hte rai nna, dai de sa wa ma ai.

4Yesu gaw, shi hta byin wa ra ai lam yawng hpe chye wu ai majaw sit sa nna, “Nanhte kadai hpe tam myit ta?” ngu nna shanhte hpe san mu ai.

5Shanhte gaw, Nazaret na Yesu hpe tam ga ai, nga nna shi hpe htan ma ai. Yesu gaw, “Ngai nan rai nga nngai,” ngu nna shanhte hpe tsun mu ai. Shi hpe ap kau na wa Yuda mung dai ni hte rau tsap nga ai.

6Dai rai nna shi gaw, “Ngai nan rai nga nngai, ngu wu yang, dai ni gaw hpang de kanut wa nna, ga hta kadawng taw mat ma ai.

7Bai shi gaw, “Kadai hpe tam myit ta?” ngu nna shanhte hpe bai san mu yang, shanhte gaw, “Nazaret na Yesu hpe tam ga ai,” nga nna bai htan ma ai.

8Yesu gaw, “Ngai nan rai nga nngai,” ngu nna nanhte hpe ngai tsun masade ai: “ngai hpe tam ai rai myit yang gaw, ndai ni gaw wa manu ga,” ngu nna htan wu ai:

9dai gaw, Nang ngai e jaw ai ni hta na, langai mi hpe muk ngai n shayet kau nngai, nga nna shawng de shi tsun ai ga dik wa na matu, rai nga ai.

10Simun Petru gaw nhtu hpye nga ai rai nna, dai hpe shaw nhtawm, hkinjawng agyi wa a mayam hpe kahtam nna, dai wa a hkra maga na ana di mat lu ai: dai mayam a amying gaw Malhku ngu ai rai lu ai.

11Dai re ai majaw Yesu gaw, “Na a nhtu dai hpe n-ga hta shawn bang kau u: nye Wa ngai e jaw ai gawm hpe ngai n lu na rai ni?” ngu nna Petru hpe tsun wu ai.

12Shaloi hpyen ma ni, hpyen du wa hte, Yuda masha ni a agyi ni gaw, Yesu hpe rim la nna gyit ngut jang, Anna hpang de shawng woi wa mu ai:

13kaning rai nme law, shi gaw dai shaning e hkinjawng agyi tai ai, Kayahpa a katsa wa rai nga ai.

14Dai Kayahpa gaw, Amyu masha ni a matu masha langai mi si yang grau mai ai, nga nna Yuda ni hpe hpaji daw ya ai wa rai nga ai.

15Shaloi Simun Petru hte kaga sape langai mi gaw, Yesu kaw hkan nang ma ai. Dai kaga sape wa gaw, hkinjawng agyi hte chye chyap ai rai nna, hkinjawng agyi wa a nta npan de, Yesu hte rau hkan shang nang ai:

16Petru chyawm gaw shinggan maga chyinghka lam makau e hti tsap nga ai. Dai majaw hkinjawng agyi wa hte chye chyap ai sape kaga gaw pru nna, chyinghka sin ai num hpe tsun nhtawm, Petru hpe jashawn la wu ai.

17Shaloi chyinghka sin ai num gaw, “Nang mung dai wa a sape ni hta na langai mi rai nni?” ngu nna Petru hpe san wu ai. Shi gaw, “N rai nngai,” ngu nna htan wu ai.

18Dai shaloi kashung ai majaw, mayam ni hte agyi ni gaw, nra hte wan wut nna, wan kra let tsap nga ma ai: Petru mung dai ni hte rau tsap nna, wan kra nang nga ai.

19Shaloi hkinjawng agyi wa gaw Yesu hpe, shi a sape ni a lam hte shi sharin shaga ai lam, san wu ai.

20Yesu gaw, “Ga ntsa e ngai dan dan leng leng hkaw tsun ni ai: Yuda masha nlang zuphpawng ai Tara jawng ni hta mung, nawku Htingnu hta mung ngai tut tut sharin shaga ni ai: makoi magap nna ngai hpa mung n hkaw n tsun nngai.

21Nang ngai e hpa rai san n ta? Ngai kaning ngu hkaw tsun nngai gaw, na la ai ni hpe san yu u; ngai tsun ai ga hpe shanhte chye ma ai, ngu nna htan wu ai.

22Shing ngu wu yang makau e tsap nga ai agyi langai mi gaw Yesu hpe kahpret nna, Hkinjawng agyi wa mi ting hpe, nang shing nga htan lu nni?” ngu wu ai.

23Yesu gaw, “Ngai tsun ai ga n kaja yang gaw, n kaja ai ngu nna sakse hkam u; ga kaja she ngai tsun ai rai yang me, nang hpa rai ngai hpe kahpret n ta?” ngu nna htan wu ai.

24Dai rai nna Anna gaw, gyit da nga ai ta, shi hpe hkinjawng agyi Kayahpa hpang de sa bang shangun dat wu ai.

25Simun Petru chyawm gaw wan kra let tsap nga ai. Shaloi shanhte gaw, “Nang mung shi a sape ni hta na rai nni?” ngu nna shi hpe san mu ai. Shi gaw, “N rai nngai,” ngu nna nyet kau wu ai.

26Petru e kahtam nna, na di ai wa hte hpunau daw ai, hkinjawng agyi a mayam langai mi mung, “Nang sun e dai wa hte rau nga ndai hpe, ngai mu nngai, n rai ni?” ngu wu ai.

27Dai majaw Petru bai nyet kau wu ai: dai shaloi jang u goi ra ai.

28Bai shanhte gaw Yesu hpe, Kayahpa kaw nna Pretori Htingnu de sa bang mu ai: dai ten gaw jahpawt manap jau e rai nga ai: shanhte gaw awu asin re ai n hkrum ai sha, dai Shalai wa ai poi sha lu na matu, tinang dai Htingnu nhku de n shang ma ai.

29Dai re ai majaw Pilat gaw shanhte nga ai de pru nna, “Ndai wa hta nanhte hpa mara shagun mu ta?” ngu nna san wu ai.

30Shaloi shanhte gaw “Ndai wa n kaja ai amu galaw ai wa n rai yang gaw, anhte nang kaw sa bang na ga ai n rai,” ngu nna htan mu ai.

31Dai re ai majaw Pilat gaw, “Nanhte dai shi hpe la nna nanhte a tara hte maren jeyang mu,” ngu nna shanhte hpe htan wu ai. Yuda masha ni gaw, “Anhte gaw kadai hpe sat na ahkang mung n lu ga ai,” ngu nna bai htan mu ai.

32Shanhte shing nga ai gaw, Yesu shi kaning re ai lam hte si hkam lu na, nga nna kumla jaw let, tsun da ai ga dik wa na matu, rai nga ai.

33Dai majaw Pilat gaw Htingnu kata de bai shang nna, Yesu hpe shaga la nhtawm, “Nang Yuda masha ni a hkawhkam rai nga nni?” ngu nna shi hpe san wu ai.

34Yesu gaw, “Dai gaw na a myit hte nang san nni? shing n rai, masha kaga e nye a lam nang hpe tsun dan ma ni?” ngu nna htan wu ai.

35Pilat gaw, “Ngai Yuda masha rai nga a ni? Na a amyu masha ni hte hkinjawng agyi ni gaw, nang hpe ngai kaw sa ap nga ma ai; nang hpa galaw shut nit ta?” ngu nna htan wu ai.

36Yesu gaw, “Nye a mungdan gaw ndai mungkan ga na n rai li ai; nye a mungdan ndai mungkan ga na re ai rai yang gaw, ngai Yuda masha ni a lata de n shang hkra, nye a ali ama ni gasat na masai: ya chyawm gaw nye a mungdan ndai yang na n rai li ai,” ngu nna htan wu ai.

37Dai re ai majaw Pilat gaw, “Rai taw, nang hkawhkam teng nga nni?” ngu nna san wu ai. Yesu gaw, “Nang tsun ai hte maren ngai Hkawhkam teng nga nngai: dai ngu nna tengman ai a maga de sakse hkam na matu, ngai shangai jinghkai wa ni ai hte, mungkan ga de du sa ring ngai: tengman ai hte seng ai ni nlang hte gaw, nye a ga nsen madat ma ai,” ngu nna htan wu ai.

38Pilat gaw, “Tengman ngu ai gaw hpa rai ta?” ngu nna shi hpe tsun wu ai. Shing nga nhtawm Yuda masha ni kaw shi bai pru nna, “Ndai wa hta hpa mara mung ngai n mu nngai.

39Rai timung, Shalai wa ai poi e masha langai mi ngai nanhte hpe dat ya ga ai htung, nanhte hta nga ai hte maren, Yuda masha ni a Hkawhkam wa hpe nanhte e dat ya na, nanhte ra myit ni?” ngu nna san wu ai.

40Shaloi shanhte gaw, “Dai wa hpe n rai, Baraba hpe dat ya mi,” nga nna bai jahtau tsun ma ai: Baraba chyawm gaw damya rai nga ai.

← Chapter 17 Jump to: Chapter 19 →