2 John 1

Kamba (Mbivilia) 1956

Jump to:

1Nyie, ũla mũtumĩa, valũa ũũ wakwa ũkĩvikĩe kĩveti kĩla kĩnyuve na syana syakyo, ala nĩmendete w’o; na tii nyie nyioka, ĩndĩ o na onthe ala mesĩ ũla w’o;

2kwondũ wa ũla w’o ũtwĩe nthĩnĩ waitũ, naw’o ũkeethĩwa naitũ kũvika tene na tene:

3Mumo, na tei, na mũuo makeethĩwa naitũ, kuma kwa Ngai Asa, na kwa Yesũ Klĩsto, ũla Mwana wa Asa, nthĩnĩ wa w’o na wendo.

4Nĩngũtana mũno nũndũ nĩneethĩe syana syaku imwe iendete nthĩnĩ wa ũla w’o, o ũndũ tweeaĩwe nĩ Asa.

5Na yu, kĩveti, nĩngũkwĩsũva, ti atĩ nĩ mwĩao mweũ ngũkũandĩkĩa, ĩndĩ no ũla twaĩ naw’o kuma mwambĩlĩlyonĩ, atĩ twendane.

6Na ũũ nĩw’o wendo, tũendae tũatĩĩe mĩao yake. Ũũ nĩw’o mwĩaĩo, o ũndũ mweewie kuma mwambĩlĩlyonĩ, mũendae nthĩnĩ wa wendo.

7Nĩkwĩthĩwa akengani aingĩ nĩmaumĩlĩte kũũ nthĩ, na nĩ ala mataumbũlaa kana Yesũ Klĩsto nĩwokie na mwĩĩ. Ũsu nĩ mũkengani na nthũ ya Klisto.

8Ĩsũvĩei mũtikasye mawĩa ala mũtethetye, ĩndĩ mwose ĩtuvi yĩanĩu.

9O mũndũ ũla wĩvĩtũkasya mbee na ndekalaa ũmanyĩsyonĩ wa Klĩsto, nde na Ngai: ĩndĩ ũla wĩkalaa ũmanyĩsyonĩ, ũsu e na Asa na Mwana.

10Ethĩwa mũndũ o na wĩva akooka kwenyu, na ndeũete ũmanyĩsyo ũũ, mũtikamũthokye nyũmba kwenyu, o na mũikamũkethye:

11nũndũ ũla ũmũkethasya e mũamba nake mawĩanĩ make mathũku.

12O na kau nĩ na maũndũ maingĩ ma ũmũandĩkĩa, ndikwenda kũmaandĩka ĩkalatasinĩ na ingi: ĩndĩ nĩngwĩkwatya kũka kwenyu, tũneena’nye twenene, nĩ kana ũtanu wenyu wusũe.

13Syana sya mwĩĩtu‐a‐mwenyu ũla mũnyuve nĩsyaũkethya.

Jump to: