3 John 1

Kamba (Mbivilia) 1956

Jump to:

1Nyie, ũla mũtumĩa, valũa ũũ wakwa ũmũvikĩe Kaio mwendwa, ũla nĩmwendaa w’o.

2Mwendwa, nĩngũvoya nĩ kana ũathimĩke maũndũnĩ onthe na wĩthĩwe na mwĩĩ mũseo, o ũndũ ngoo yaku ĩathimĩkĩte.

3Nũndũ natanie mũno, yĩla ana‐a‐asa mookie maikũsĩĩa w’o waku, o ũndũ ũendaa nthĩnĩ wa ũla w’o.

4Ndi na ũtanu ũngĩ mũnene ũvĩtũkĩte ũũ, ngĩw’a ũvoo wa syana syakwa ũndũ iendaa nthĩnĩ wa ũla w’o.

5Mwendwa, wĩkaa kĩla wĩa na kĩthito ũkĩmatethya ana‐a‐asa, o na aeni;

6nao nĩmakũsĩĩe wendo waku ĩkanisanĩ: naku ũkeeka nesa ũkĩmaumasaya kyalonĩ kyoo ũndũ waĩle kwa Ngai:

7nĩkwĩthĩwa nĩmaumie kwoo nũndũ wa yĩla Syĩtwa, matekwosa kĩndũ kwa Andũ‐ma‐mbaĩ‐ingĩ.

8Kwondũ wa ũu nĩtwaĩle kũthokya andũ ta asu, nĩ kana twĩthĩwe atethan’ya ma wĩa ma ũla w’o.

9Naandĩkĩe ĩkanisa ũvoo: ĩndĩ Ndioteleve, ũla wendete kwĩthĩwa e mũnene katĩ wamo, ndaatwĩtĩkĩla.

10Kwondũ wa ũu, ethĩwa ngooka, ngalilikana mawĩa make ala wĩkaa, aitũvulũkila ndeto mbathe: na ndeĩanĩwa nĩ ũu, ĩndĩ we mwene ndamathokya ana‐a‐asa, o na ala menda kũmathokya nũnũũmavata na kũmalũngya ĩkanisanĩ.

11Mwendwa, ndũkeelekan’ye na ũndũ ũthũku, ĩndĩ ĩelekanasye na ũla ũseo. Ũla wĩkaa nesa nĩ wa Ngai: ũla wĩkaa naĩ ndaamwona Ngai.

12Ndemetelio nũkũsĩĩwe nĩ andũ onthe, vamwe na ũla w’o: ĩĩ, o na ithyĩ nĩtũũkũsĩĩa; na nĩwĩsĩ ũkũsĩ witũ nĩ wa w’o.

13Naĩ na maũndũ maingĩ ma ũkũandĩkĩa, ĩndĩ ndikwenda kũmaandĩka na ingi na kĩandĩki:

14ĩndĩ nĩngwĩkwatya ngakwona mĩtũkĩ, na ĩndĩ tũkaneenan’ya twenene.

15Mũuo nĩwĩthĩwe naku. Anyanyae maitũ nĩmakũkethya. Ngethesya ala anyanyawa, kĩla mũndũ na syĩtwa yake.

Jump to: