Jude 1

Kamba (Mbivilia) 1956

Jump to:

1Yuta, ngombo ya Yesũ Klĩsto, na mwana‐a‐inyia wa Yakovo, valũa ũũ wakwa ũmavikĩe ala meetiwe, endwa nthĩnĩ wa Ngai Asa, na asũvĩwa ũndũ wa Yesũ Klĩsto:

2Tei na mũuo na wendo nĩmaingĩv’we kwenyu.

3Endwa, yĩla neeyũmbanĩtye kũmũandĩkĩa inyw’ĩ ũvoo wa ũtangĩĩo witũ ithyonthe, naingĩĩw’e kũmũandĩkĩa inyw’ĩ ngimũtaa mũkitĩe ũla mũĩkĩĩo wanengiwe atheu ĩvinda o yĩmwe tũ.

4Nũndũ kwĩ andũ amwe melikĩtye na kĩmbithĩ, andũ ala maandĩkĩwe tene ũsilĩlo ũũ, Andũ matamũkĩaa Ngai, makĩalyũla mumo wa Ngai waitũ wĩthĩwe ũthei wa kwĩka mĩmeo mĩthũku, na kũmũkaĩa Mwamũli na Mwĩaĩi waitũ, nĩwe ũmwe e weka, Yesũ Klĩsto.

5Na yu nĩngwenda kũmũlilikan’ya, o na kau nĩmũminĩte kũmanya maũndũ onthe, ũndũ Mwĩaĩi wambie kũtangĩĩa andũ kũmaumya nthĩ ya Misili, na ĩtina nĩwamanangie ala mataaĩtĩkĩla.

6Na alaĩka ala mataasũvĩa ũnene woo ene, ĩndĩ matiie ũtũo woo ũla wamaĩle, amekalilye me ove na mbĩngũ sya tene na tene kĩvindunĩ kũvika ũsilĩlo wa mũthenya ũla mũnene.

7O tondũ Sotomo na Ngomola, na ndũa ila ingĩ syaĩ ndee, meenenganĩte ene, o ta asu, kwĩka ũlaalai, na kũatĩĩa maũndũ ma mwĩĩ matekawa, nĩmaumĩlilw’e methĩwe ngelekan’yo ya kũthĩna ũsilĩlonĩ wa mwaki wa tene na tene.

8No ta ũu asu nao nĩmavukasya mwĩĩ na maũndũ me namo ta mekũota, mailea ũsumbĩko, na makĩumanga monene.

9Ĩndĩ Mikaeli ũla mũlaĩka mũnene, yĩla wakandanĩe na ndevili na ũkananĩa nake ũndũ wa mwĩĩ wa Mose, ndaatata kũmũvinganĩsya ta kũmũuma, ĩndĩ aisye, Mwĩaĩi nakũkan’ye.

10Ĩndĩ andũ aa nĩmaumaa maũndũ matesĩ: na maũndũ ala mamanyaa na ũĩ wa mwĩĩ, maũndũnĩ asu nĩmeyanangaa, o ta nyamũ ite na kĩlĩko.

11Woo nĩ woo! Nũndũ nĩmaendie nzĩanĩ ya Kaini, na kũatĩĩa ĩvĩtyo ya Mbalaamu vate kwĩsiĩĩa ene nĩ kana mose ũtandĩthyo, nao maanangwa katĩ wa ngananĩo ya Kola.

12Andũ asu nĩmo mavia matonekaa mbokanĩ syenyu sya wendo yĩla meũya vamwe nenyu, aĩthi meĩthasya ene vate w’ĩa; mĩumbĩ ĩte na manzĩ, ĩkĩtwawa nĩ iseve; nĩ mĩtĩ ĩvinda yĩla ya kwĩtĩkya matũ ĩte na ũsyao, yũmite kelĩ, ĩkũĩtwe na mĩi vyũ;

13nĩ itulumo sya ũkanga ila itasiĩĩkaa, makyumya nthoni syoo ta ĩvuo; nao nĩ ndata ila syangangaa, na maiĩwe wiũ wa kĩvindu kũvika tene na tene.

14Nake Enoko, ũla waĩ wa mũonza kũtala kuma Atamu, athanie, akyasya, Sisyai, Mwĩai nĩwokie vamwe na atheu make, nguthu ĩtatalĩka,

15kũmasilĩla andũ onthe, na kũmaĩkĩĩthya onthe ala matamũkĩaa Ngai ũndũ wa meko moo onthe ma kũlea kũmũkĩaa Ngai ala meekie, na nũndũ wa ndeto syoo syonthe nyũmũ ila asu athe matamũkĩaa Ngai mamũneeneete.

16Asu nĩo anyungunyĩsya, andũ ma kĩnyinginyi, maatĩĩaa mĩmeo yoo mĩthũku (na makanyw’a moo maneenaa maũndũ manene ma kwĩkathĩĩa), makĩmendeesya andũ ũndũ wa kũnengwa syĩndũ nĩmo.

17Ĩndĩ inyw’ĩ, endwa, lilikanai ndeto ila syambie ũneenwa nĩ atũmwa ma Mwĩaĩi waitũ Yesũ Klĩsto;

18nĩkwĩthĩwa mamwĩie atĩĩ, Ĩvinda ya mũminũkĩlyo kũkeethĩwa avũthya, makĩatĩĩa mĩmeo mĩthũku yoo ya kũlea kũmũkĩa Ngai.

19Asu nĩo ala metilaa, andũ ma mwĩkalĩle wa kĩ‐mũndũ, mate na ũla Veva.

20Ĩndĩ inyw’ĩ, endwa, mũkĩyaka ĩũlũ wa mũĩkĩĩo wenyu ũla mũtheu mũno, mũkĩvoya nthĩnĩ wa Veva Mũtheu,

21ĩyĩkalyei ene wendonĩ wa Ngai, mũkyeteela tei wa Mwĩaĩi waitũ Yesũ Klĩsto kũvika thayũ ũtathela.

22Mew’ĩei tei andũ amwe ala me na nzika;

23na amwe matangĩĩei, mũkĩmavulya kũmaumya mwakinĩ, na angĩ mew’ĩei tei vamwe na w’ĩa; mũkĩmena o na ngũa ĩthũkĩtwe nĩ maũndũ ma mwĩĩ.

24Na ĩndĩ kwa ũla ũtonya kũmũsũvĩa mũikalulutĩke, na kũmwia mbee wa ũtheu wake mũtisu mũte na ũndũ ũtaĩle na mwĩ na ũtanu mũthonoku,

25we nĩwe Ngai weka Mũtangĩĩi waitũ, kwondũ wa Yesũ Klĩsto Mwĩaĩi waitũ, kwake kwĩthĩwe ndaĩa, na ũnene, na ũtonyi, na ũkũmũ, mbee wa tene w’onthe, na yu, na kũvika tene tene. Ameni.

Jump to: