Obadiah 1

Kamba (Mbivilia) 1956

Jump to:

1Woni wa Ovatia. Ũũ nĩw’o Mwĩaĩi Yeova ũnũkwasya ũndũ wa Etomu: Nĩtwĩw’ĩte ũvoo kuma kwa Yeova, na mũtũmwa nũtũmĩtwe katĩ wa i mbaĩ, akyasya, Ũkĩlai inyw’ĩ, na tũkĩlei tũkwatye kaũ nake.

2Sisya, nĩngũtw’ĩte mũnini katĩ wa i mbaĩ: nũvũthĩtw’e mũno.

3Ngathĩĩo sya ngoo yaku nikũkengete, we ũla ũtwĩe mĩvatĩnĩ ya ĩvia, ũla ũtũo waku wĩ ĩũlũ; ũla waasya ngoonĩ yake, Nũũ ũla ũkantheesya nthĩ?

4O na ũkambata ĩũlũ ta ndiũ, o na ũkaka ndala yaku katĩ wa ndata, ngakũtheesya nthĩ kuma vo, easya ũu Yeova.

5Ethĩwa ing’ei ikakũkĩa, kana ethĩwa avutani makakũkĩa ũtukũ (wanangĩtwe ta kĩ!), Matikoya mũvaka meanĩwa? Ethĩwa atwi ma nzavivũ makakũkĩa, matikatialya nzavivũ imwe sya kũkolan’ya?

6A! Ũndũ maũndũ ma Esau mamanthĩtwe! Ũndũ mothwii make mavithe maumbũĩtwe!

7Andũ onthe ala mew’anĩte naku nĩmakumaaisye, o kũvika mũvakanĩ: andũ ala waĩ mũuo namo nĩmakũkengete, na makũkĩlya vinya; ala maĩsaa lĩu waku nĩmakũteaa na kĩtei ungu waku: vai ũmanyi nthĩnĩ wake.

8Yeova ekũlya, Mũthenya ũsu ndikananga andũ oĩ ma Etomu, na ũmanyi wae kĩĩmanĩ kya Esau?

9Na ngũmbaũ syaku, we Temani, ikateva, kũvika yĩla kĩla ũmwe wĩvetwa aume kĩĩmanĩ kya Esau kwondũ wa kũawa.

10Nũndũ wa ũng’endu ũla wĩkĩtwe mwana‐a‐mwenyu Yakovo, nthoni ikakũvw’ĩka, na ũkavetwa tene na tene.

11Mũthenya ũla waũngamĩte mũingo ũla ũngĩ, mũthenya ũla aeni matwaie syĩndũ syake, na andũ ma nthĩ ĩngĩ malikile mbingĩlonĩ syake, na kũlimana ũndũ wa Yelusaleme, o naku wailyĩ ta ũmwe wamo.

12Ĩndĩ ndũkasisye mũthenya wa mwana‐a‐mwenyu mũthenya wa thĩna wake mũnene, na ndũkatane ĩũlũ wa ana ma Yuta mũthenya wa wanangĩko woo; o na ndũkaneene na ngathĩĩo mũthenya wa thĩna.

13Ndũkalike mbingĩlonĩ ya andũ makwa mũthenya wa wanangĩko woo mũnene; ĩĩ, ndũkasisye kũnyamawa kwoo mũthenya wa wanangĩko woo mũnene, o na mũikaakwate syĩndũ syoo mũthenya wa wanangĩko woo mũnene.

14Na ndũkaũngame mavĩtanĩonĩ ma nzĩa, kũmamina andũ make ala meũvonoka; na ndũkamanengane ala make meũtiala mũthenya ũsu wa thĩna.

15Nũndũ mũthenya wa Yeova wĩ vakuvĩ ĩũlũ wa mbaĩ syonthe: o ũndũ weekie, ũkeekwa o w’o; kwĩka kwaku kũkasyoka ĩũlũ wa mũtwe waku mwene.

16Nũndũ o tondũ mwanyw’ĩĩe kĩĩmanĩ kyakwa kĩtheu, o ta ũu mbaĩ syonthe ikanyusaa ĩndĩ yonthe; ĩĩ, ikanyw’a, na kũmelya, na ikeethĩwa o ta itaĩ vo.

17Ĩndĩ kĩĩmanĩ kya Saioni kũkeethĩwa ala makavonoka, nakyo kĩkeethĩwa kĩtheu; na nyũmba ya Yakovo ĩkamesya ng’ũndũ syoo.

18Na nyũmba ya Yakovo ĩkatw’ĩka mwaki, na nyũmba ya Yosevu ũlĩlĩnzĩ, na nyũmba ya Esau ĩkatw’ĩka mavuthĩ, na makakana katĩ woo, na kũmamina; na vaikatiala o na ũmwe nyũmbanĩ ya Esau; nũndũ Yeova nũneenete ũu.

19Na ala ma ngalĩ ya Ĩtheo makamesya kĩĩma kya Esau, na ala ma nthĩ ndindimalu makamesya Avilisiti; na makamesya weũ wa Evalaimu, na weũ wa Samalia; na Mbenyamini akamesya Ngileati.

20Na ala mataviwe ma nguthu ĩsu ya ana ma Isilaeli, ala me katĩ wa Akanaani, makamesya o kũvika Nzalevathi; na ala mataviwe ma Yelusaleme ala me Sevalati, makamesya ndũa sya ngalĩ ya ĩtheo.

21Na atangĩĩi makambata kĩĩmanĩ kya Saioni makĩsilĩle kĩĩma kya Esau; na ũsumbĩ ũkeethĩwa wa Yeova.

Jump to: