Philemon 1

Kamba (Mbivilia) 1956

Jump to:

1Vaulo, mwovwa wa Klĩsto Yesũ, na Timotheo mwana‐a‐asa waitũ, valũa ũũ witũ ũmũvikĩe Vilemona mwendwa waitũ na mũtethya wa wĩa vamwe naitũ,

2na Avia mwĩĩtũ‐wa‐asa waitũ, na Alikivo mũsikalĩ vamwe naitũ, na ikanisa yĩla yĩ nyũmbanĩ yaku:

3Mumo nĩwĩthĩwe nenyu na mũuo kuma kwa Ngai Asa waitũ na kwa Mwĩaĩi Yesũ Klĩsto.

4Nĩmũtũngĩa Ngai wakwa mũvea mavinda onthe, ngĩũweta mboyanĩ syakwa,

5ngĩw’a ũvoo wa wendo waku, na mũĩkĩĩo ũla wĩ naw’o ũmwelekele Mwĩaĩi Yesũ, na atheu onthe:

6nĩ kana mũamba wa mũĩkĩĩo waku wĩthĩwe ũitethya wĩa wa w’o, ũmanyinĩ wa kĩla ũndũ ũseo wĩ nthĩnĩ wenyu, kwondũ wa Klĩsto.

7Nũndũ nai na ũtanu mwingĩ na ũkiakisyo kwondũ wa wendo waku, nĩkwĩthĩwa ngoo sya atheu nivuũkĩtw’e nue, mwana‐a‐asa.

8Kwondũ wa ũu, o na kau nĩ na ũnyiau w’onthe nthĩnĩ wa Klĩsto kũkwĩaĩa wĩke ũndũ waile,

9ĩndĩ kwondũ wa wendo nĩ kavaa nĩkwĩsũve, nĩkwĩthĩwa nyie Vaulo nĩ mũkũũ, na yu nĩ mwovwa wa Klĩsto Yesũ:

1010 nĩkwĩsũva ũndũ wa mwana wakwa, ũla nĩsyaĩte nĩ o mwove, nake nĩ Onesimo,

11ũla tene ũtaĩ ũuno kwaku, ĩndĩ yu e ũuno kwaku o na kwakwa:

12nake namũtũma we mwene asyoke kwaku, nake nĩ ngoo yakwa ki:

13ũla nendie ekale nakwa, nĩ kana anthũkũmae vandũ vaku wovwanĩ wa ũla ũvoo mũseo:

14ĩndĩ ndinenda kwĩka ũndũ vate ũtw’ĩo waku; nĩ kana ũseo waku ndũkethĩwe ta wa kũĩngĩĩw’a, ĩndĩ wĩthĩwe wa kwenda kwaku.

15Nũndũ no kwĩthĩwa nĩ kwondũ wa ũu ataaniw’e naku kavinda, nĩ kana wĩthĩwe nake tene na tene;

16kuma yu ti ta ngombo, ĩndĩ nĩ mbee wa ngombo, nĩ mwana‐a‐asa mwendwa; nyie nĩnĩmwendete mũno, ĩndĩ kwaku nĩ mbee mũno, nthĩnĩ wa mwĩĩ o na nthĩnĩ wa Mwĩaĩi.

17Ethĩwa ĩndĩ wĩona nyie nĩ ngwatanĩo vamwe naku, mwĩtĩkĩle we o takwa mwene.

18Ĩndĩ ethĩwa nĩwakũvĩtanĩsye ũndũ, kana e thiĩ naku wa kindũ, andĩka ĩũlũ wakwa;

19nyie Vaulo niandĩka ũu na kw’oko kwakwa mwene, nyie ngaĩva: o na ndiũkwĩa kana wĩ thiĩ nakwa wa thayũ waku mwene.

20Ĩĩ, mwana‐a‐asa, nĩthĩwe na ũtanu kwondũ waku nthĩnĩ wa Mwĩaĩi: vuũkya ngoo yakwa nthĩnĩ wa Klĩsto.

21Ngĩĩkĩĩa mũno wĩwi waku nĩngũkũandĩkĩa, ngĩmanya kana ũkeeka o na kũthonoka ũndũ ngwasya.

22Ĩndĩ vamwe na ũu nzeũvĩsya vandũ va kwĩkala: nũndũ nĩĩkwatya kwondũ wa mboya syenyu nganengwa kũka kwenyu.

23Evavila, mwovwa vamwe nakwa nthinĩ wa Klĩsto Yesũ, nĩwaũkethya;

24na ta ũu Maliko, na Alisitaliko, na Ndema, na Luka, atethya ma wĩa vamwe nakwa.

25Mumo wa Mwĩaĩi waĩtũ Klĩsto nĩwĩthĩwe na maveva menyu. Ameni.

Jump to: