2 John 1

Kamba (MBIVILIA ŨVOO MŨSEO)

Jump to:

1Kuma vala nĩĩ nyie Mũtongoi: Valũa ũũ nĩ kwaku Mũndũ Mũka mwendwa na syana syaku, ala kwa w'o nĩmwendete. Ti inyie nĩ nyioka nĩmwendete, ĩndĩ andũ onthe ala mesĩ ũw'o nĩmamwendete,

2nũndũ ũw'o ũsu wĩ nthĩnĩ waitũ, na wĩĩkala naitũ tene na tene.

3Mumo, tei na mũuo nĩsyĩthĩwe naitũ kuma kwa Ngai Asa, na kuma kwa Yesũ Klĩsto mwana wake; twĩthĩwe nasyo nthĩnĩ wa ũw'o na wendo.

4Nĩnĩnatanie mũno kwĩthĩa syana imwe syaku iendanĩtye na ũw'o, o tondũ Ĩthe waitũ watwĩaĩie.

5Kwoou ĩndĩ Mũndũ Mũka mwendwa, ndiũkũandĩkĩa mwĩao mweũ, ĩndĩ nĩ mwĩao twĩthĩĩtwe naw'o kuma mwambĩlĩĩlyonĩ, na w'o nĩ ithyĩ twendane ũmwe kwa ũla ũngĩ.

6Wendo ũũ ngũweta nĩ kana no nginya twĩthĩwe tũyĩanĩsya mĩao ya Ngai. Naw'o mwĩao wa Ngai, o tondũ inyw'onthe mwĩw'ĩte kuma mwambĩlĩĩlyonĩ, nĩ kana no nginya ithyonthe twĩkalae tũyendana.

7Akengani aingĩ ala matetĩkĩlaa kana Yesũ Klĩsto ookie e na mwĩĩ ta mũndũ, nĩmokĩlĩte ĩũlũ wa nthĩ. Mũndũ wa mũthemba ũsu nĩ mũkengani na nĩwe Nthũ ya Klĩsto.

8Ĩsũvĩei mũikasye ũthũkũmi ũla mũtethetye, ĩndĩ mwĩthĩwe mũtonya kũkwata ĩtuvi yĩanĩu.

9Ũla ũtekalaa alũmĩtye momanyĩsyo ma Klĩsto, na wumaa nza wamo, ndethĩawa vamwe na Ngai. Nake ũla wĩkalaa alũmĩtye momanyĩsyo ma Klĩsto, ethĩawa e vamwe na Asa na Mwana.

10Kwoou ĩndĩ ethĩwa mũndũ nĩwooka kwenyu na ndeũmũetee ũmanyĩsyo ũsu, mũikamũthokye nyũmbanĩ syenyu o na mũikamũkethye.

11Mũndũ ũla ũkethasya mũndũ wa mũthemba ũsu, ethĩawa e mũamba nake maũndũnĩ make mathũku.

12Nĩna maũndũ angĩ maingĩ ma kũmũtavya, ĩndĩ ndikwenda kũmaandĩka ĩthangũnĩ na ingi. Vandũ va ũu, nĩ na wĩkwatyo wa kũka kũmwona, na tũiea ngewa twenene metho kwa metho, nĩ kana ithyonthe tũtane o tondũ kwaĩlĩte.

13Syana sya mwĩĩtu-a-asa waku ũla mũnyuve nĩsyakũkethya.

Jump to: