3 John 1

Kamba (MBIVILIA ŨVOO MŨSEO)

Jump to:

1Kuma vala nĩĩ nyie Mũtongoi; valũa ũũ wakwa nĩ kwaku we Kaio ũla kwa w'o ngwendete.

2Mwendwa wakwa, nĩvoya Ngai nĩ kana maũndũ maku onthe maendee nesa, na mwĩĩ waku naw'o ũyĩthĩwa wĩ mũima, nũndũ nĩnĩsĩ ũendee nesa kĩ-vevanĩ.

3Nĩnĩnatanie mũno yĩla Aklĩsto amwe manookie kũũ na mandavya kana ũũngamĩte na ũla ũw'o, nũndũ kwa w'o we ũatĩĩaa ũla w'o.

4Vai ũtanu mũnene ndonya kwĩthĩwa na w'o ũvĩtũkĩte ũũ, wa kwĩw'a kana syana syakwa iatĩĩaa ũla w'o.

5Mwendwa wakwa, wĩ na kĩthito kĩseo ũthũkũmi waku kwa aĩkĩĩi ala angĩ, o na vala nĩ aeni kwaku.

6Nĩmatavĩtye ĩkanisa ya kũũ ĩũlũ wa wendo waku. Matetheeasye maendeeae na kyalo kyoo kwa nzĩa ĩla yaĩlĩte mbee wa Ngai.

7Nũndũ methĩawa me kyalonĩ kya ũthũkũmi wa Klĩsto, na mayĩthĩawa mayenda kwosa ũtethyo kuma kwa andũ mate aĩkĩĩi.

8Kwoou nĩtwaĩlĩtwe nĩ kũtetheesya andũ ma mũthemba ũsu, nĩ kana twĩthĩwe twĩ mũamba ũthũkũminĩ wa ũla w'o.

9Nĩnaandĩkĩie ĩkanisa ndeto mbũthũ, ĩndĩ Ndioteleve ũla wendete mũno kwĩthĩwa ewe mũtongoi woo, ndakwatĩĩaa ndeto syakwa.

10Kwoou yĩla nĩũka ngaumĩlya maũndũ ala wĩkĩte; maũndũ mathũku ala ũneenete ĩũlũ witũ, na ndeto sya ũvũngũ ila ũneenaa! Ĩndĩ ũu o naw'o ndũmwĩanĩaa; yĩla kwooka ana-a-asa, ndamathokasya o na nũmasiĩĩaa ala mekwenda kũmathokya na aimalũngya ĩkanisanĩ.

11Mwendwa wakwa, ndũkatate kũatĩĩa ngelekany'o nthũku, ĩndĩ atĩĩa ngelekany'o ĩla nzeo. Ũla wĩkaa ũseo nĩ wa Ngai, ĩndĩ ũla wĩkaa ũthũku ndaamwona Ngai.

12Kĩla mũndũ nĩwumasya ũkũsĩ wa kana Ndemetelio nĩ mũndũ mũseo; ũw'o o naw'o nũĩkĩĩthasya ũkũsĩ ũsu. Ithyĩ o naitũ twĩumya ũkũsĩ o ũsu ĩũlũ wake, nake nĩwĩsĩ kana ũkũsĩ witũ nĩ wa w'o.

13Nĩna maũndũ angĩ maingĩ ma ũkũtavya, ĩndĩ ndikwenda kũmaandĩka ĩthangũnĩ na ingi.

14Nĩĩkwatya ũkwona mĩtũkĩ, na tũiea ngewa twenene metho kwa metho.

15Mũuo nĩwĩthĩwe naku. Anyanyae maku onthe ala me kũũ nĩmakũkethya. Kethya kĩla ũmwe wa anyanyae maitũ ala me kũu.

Jump to: