Isaiah 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Twaĩai mũsumbĩ wa Yuta mũthĩnzĩo wa tũtena twa malondu, tũtwaei kuma ndũanĩ ya Sela mwĩsĩlĩte nzĩanĩ ya weũnĩ, nginya Kĩĩmanĩ kya Saioni.

2Eĩtu ma Moavi me masyũkonĩ ma Alinoni, makeethĩwa mailyĩ ta maswii ma nyũnyi mekũũlũka kũũ na kũũ, malũngĩtw'e kuma ndalanĩ syamo.

3Amoavi meĩa andũ ma Yuta atĩĩ, “Tũnengei ũtao, tũtavyei ũndũ twaĩlĩte kwĩka; tũsũvĩei ũndũ mũtĩ wĩthĩawa na muunyĩ mũthithu syũa yĩ ĩvyũ mũno. Tũvithei ithyĩ andũ ala tũlũngĩtw'e, mũikatavany'e vala tũĩ ithyĩ ala tũkĩĩte.

4Tũekei ithyĩ andũ ma Moavi ala tũkĩĩte twĩkale katĩ wenyu; tũsũvĩei kuma kwa ũla ũkũtũmina.” Yĩla ũla ũmathĩnasya wĩĩthĩwa ate vo, na kwanangwa kũithela, na ala mamavithũkĩĩte nthĩ ĩsu mayuma vo,

5nĩvo ĩndĩ kĩvĩla kya kĩ-ũsumbĩ kĩlũlũmĩĩlw'a na wendo, na mũndũ kuma nzyawanĩ sya Ndeviti akasumbĩka kwa ũĩkĩĩku, Akasilĩlaa na sila wa katĩ, na ndakaseleawa kwĩka ũla ũlũngalu.

6Andũ ma Yuta measya atĩĩ, “Nĩtwĩw'ĩte ũvoo wa ngathĩĩo sya Amoavi, ũndũ meany'a ngathĩĩo; nĩtwĩw'ĩte ĩũlũ wa ũng'endu woo, ngathĩĩo syoo na kĩvũthya kyoo, ĩndĩ mĩtũlyo ĩsu yoo yonthe no ya mana.”

7Kwoou Amoavi nĩmaĩe, nĩmaĩe onthe nũndũ wa nthĩ yoo. Nĩmaĩe kĩĩo kĩ woo, nũndũ wa mĩkate ĩseũvĩtw'e na nzavivũ mbovu, ĩla maĩsaa me ndũanĩ ya Kili-alesethi.

8Mĩũnda ya Esivoni nĩkũma, na mĩsavivũ ya Sivima o nayo nĩkũma, ĩla ndivai ya yo yatumaa atongoi ma nthĩ ingĩ mamilwa. Mbonge sya mĩsavivũ ĩsu syatambĩte ikavika Yaseli, na ikanyaĩĩka nginya weũnĩ; nthongoo syayo syeenyaĩtye mũno, o na ikathi kũvika mũingo wa ũkanga.

9Kwoou nĩngũĩa vamwe na Yaseli, nũndũ wa mĩsavivũ ya Sivima; we Esivoni na Eleale ngamũnyithya na methoi makwa, ngĩĩa nĩkwĩthĩwa mawasya menyu ma ũtanu, ĩvindanĩ ya ngetha ya matunda na ya lĩu wa mbaa mbeke nĩmathelu.

10Ũtanu na mũyo nivetangĩtwe mũũndanĩ ũla ũsyaa nesa, na vai mbathi ikwinwa mĩũndanĩ ya mĩsavivũ, o na vai kũlonzany'a. Vai mũndũ o na ũmwe ũkũangĩa nzavivũ kĩvivĩonĩ kyasyo aseũvye ndivai, nĩnĩminĩte wasya wa ũtanu kwondũ wa ngetha ya nzavivũ.

11Kwoou ngoo yakwa yĩkaya ta ngitaa nũndũ wa Moavi, na thayũ wakwa wĩna kĩĩo nũndũ wa Kili-alesethi.

12Yĩla andũ ma Moavi mathi kũndũnĩ kwoo kũtũlu kũthaitha, methĩawa mayĩnosya mana; yĩla mathi vandũnĩ voo vatheu kũvoya, vai ũseo meona.

13Isu nĩsyo ndeto ila Mwĩai Ngai waneenie ĩũlũ wa Moavi ĩvindanĩ ĩvĩtũku.

14Ĩndĩ yu Mwĩai Ngai easya atĩĩ, “Ĩtina wa myaka ĩtatũ ki, ĩtalĩtwe ũndũ mũthũkũmi ũtalaa mĩthenya yake, ndaĩa ya Moavi ĩkathela. O na vala andũ mayo nĩ aingĩ, ala makatiala thayũ makeethĩwa me anini na onzu.”

← Chapter 15 Jump to: Chapter 17 →