Job 39

Kamba (MBIVILIA ŨVOO MŨSEO)

← Chapter 38 Jump to: Chapter 40 →

1“Nĩũkũlya, nĩwĩsĩ ĩvinda yĩla mbũi sya kĩĩmanĩ isyaa? Waasyaĩĩsya nthia ĩisyaa?

2Nĩwĩsĩ ikuaa myei yĩana ata iyĩsa kũsyaa? Nĩwĩsĩ ĩvinda yĩla isyaa?

3Nĩwĩsĩ yĩla nthia ikomaa nthĩ nĩ kana isyae, na kũsyaa tũtena tasyo?

4Tũtena twasyo nĩtũmeasya vinya na tũkeanĩa kĩthekanĩ, nĩtũendaa na tũilea kũsyoka.

5“Nũũ ũla walekilye ĩng'oi ya kĩthekanĩ yathi? Nũũ ũla wathaisye ĩng'oi yĩla yĩendaa mĩtũkĩ?

6Nĩnayĩnengie vandũ weũnĩ yĩkalae, nthĩ ndindimalu yĩ mũnyũ yĩthĩwe ũtũo wayo.

7Yĩiendaa ndũanĩ nũndũ kwĩthĩawa kĩlonzo kingĩ, yĩyĩsaa kwĩw'a mũndũ ũkũyĩkelelya nĩ kana yĩthũkũme.

8Ĩng'oi yĩu yĩĩsaa iĩmanĩ, yĩmanthaa nyeki ya mũthemba o na wĩva yĩye.

9“Nĩkũlya, mboo no yĩtĩkĩle ũkũtethesya wĩa? Nĩyĩtĩkĩla kwĩkala ũtukũ kĩtũũnĩ kyaku?

10Nũtonya kũmyova na ĩkanda ũkatuma ĩĩma, kana ũkatuma ĩĩma myandanĩ ĩkũatĩĩe?

11Nũtonya kũmĩkwatya nũndũ yĩ vinya mwingĩ, na ũimĩekea wĩa waku mwingĩ ĩtethye?

12Nũtonya kũĩkĩĩa kana nĩkũsyoka, na ĩikũetee ngetha ya mbaa mbeke kĩvũĩonĩ kyaku?

13“Nyaa nĩkũnanganasya nthwau syayo na ngathĩĩo, ĩndĩ ndĩtonya kũũlũka.

14Ĩtiaa matumbĩ mayo mũthanganĩ, nĩ kana mũthanga ũmekĩe muutĩa.

15Ndĩkũlasya kana nĩmatonya kũkinywa makakw'a, kana nyamũ ya kĩthekanĩ ĩkamoaa.

16Yĩkalanasya na tũswii twayo ta tũte twayo, ndĩkũlasya wĩa ũla yatethisye wa kũlekya matumbĩ.

17Ninyie natumie yĩthĩwa ĩte na ũĩ, na ndyaamĩnenga ũmanyi.

18Ĩndĩ ũu wĩ o vo, yĩla yatambũũkya nthwau ĩsembe, nĩthekeeaa mbalasi na ũla ũmĩlĩsĩte.

19“Nĩũkũlya, we Yovu nue ũnengae mbalasi vinya, kana ũkaivw'ĩka ngingo na w'ĩa mũasa?

20Nue ũtumaa mbalasi ithaanyũka ta kĩtoli, ikatelemya andũ iitiva?

21Nĩvulasya nthĩ na maũũ yĩ mwandanĩ, nĩsembaa na vinya wayo w'onthe iendete kaũnĩ.

22Mbalasi ndĩsaa kwĩthĩwa na w'ĩa, na vai ũvyũ ũtonya kũmĩtelemya.

23Mĩio ya kaũ ĩla ala mailĩsĩte makuĩte, nĩyumasya wasya na kũtisatisa yaathwa nĩ syũa.

24Nĩtetemaa ĩyenda kũthi na kũkĩlya kĩtoo ĩendete. Yĩla soo wavuvwa mbalasi ndĩtonya kũũngama vamwe.

25Ĩvinda yonthe yĩla soo wavuvwa, nĩyanasya; nĩmanyaa kana kaũ wĩ vakuvĩ ĩtanamba kũthengeea, na nĩyĩw'aa wasya wa atongoi ma asikalĩ ma kaũ mayumya mĩao.

26“Nĩũkũlya, we Yovu nũmanyĩasya kĩlũĩ ũndũ kyaĩlĩte kũũlũka, yĩla kyatambũũkya nthwau syakyo syelekele ngalĩko ya ĩtheo?

27Ndiũ nĩyeteelaa ũmyumĩsye mwĩao, nĩ kana yake ndala iĩmanĩ ĩũlũ?

28Nĩseũvasya nyũmba ya yo mavianĩ ĩũlũ, nĩyakaa mũsyĩ wayo mĩthyanĩ ya iĩma.

29Kuma vau nĩmanthaa lĩu wayo, metho mayo nĩmonaa kĩndũ kya ũya yĩ vaasa.

30Ndiũ nĩsyũmbanĩaa vala ve syĩndũ ngw'ũ, na tũswii twasyo nĩtũnyusaa nthakame.”

← Chapter 38 Jump to: Chapter 40 →

Recommended Reading

Commentary Job Commentaries → Devotional Job Devotional Guide → Get This Bible Kamba (MBIVILIA ŨVOO MŨSEO) Study Bible →