Philemon 1

Kamba (MBIVILIA ŨVOO MŨSEO)

Jump to:

1Kuma vala nĩĩ nyie Vaũlo, ũla nĩ yela kwondũ wa kũthũkũma Klĩsto Yesũ, na kuma kwa mwana-a-asa waitũ Timotheo. Valũa ũũ nĩ kwaku we Vilemoni mũnyanyae waitũ, ũla tũtethasya wĩa ĩmwe,

2na kwa ĩkanisa yĩla yũmbanĩaa nyũmba kwaku, na kwa mwĩĩtu-a-asa waitũ Avia, o vamwe na Akivasi ũla wũkitĩaa Ũvoo Mũseo ĩmwe naitũ.

3Mumo na mũuo nĩsyĩthĩwe nenyu kuma kwa Ngai Asa, na kwa Mwĩai Yesũ Klĩsto.

4Mwana-a-asa Vilemoni, kĩla ĩvinda ngũvoya nĩngũvoyeaa na kũtũngĩa Ngai wakwa mũvea,

5nũndũ nĩnĩw'aa ũvoo wa wendo waku kwa aĩkĩĩi onthe, na mũĩkĩĩo waku nthĩnĩ wa Mwĩai Yesũ.

6Nĩvoya mũamba waku naitũ ta twĩ aĩkĩĩi, ũkũtonyethye kũmanya mbee na mbee, moathimo onthe ala tũkwataa nthĩnĩ wa Klĩsto.

7Mwana-a-asa mwendwa, wendo waku nũndanĩthĩtye mũno na ũkanthangaasya vanene, nĩkwĩthĩwa nũvuũkĩtye ngoo sya aĩkĩĩi onthe.

8Kwoou o na kau nĩ na ũkũmbaũ w'onthe nthĩnĩ wa Klĩsto, wa kũkwĩaĩa wĩke kĩla waĩlĩte kwĩka,

9nĩĩka ũkwĩsũva wĩke ũu kumana na wendo. Nyie Vaũlo mũtũmwa wa Klĩsto Yesũ, ũla yu nĩ yela kwondũ wa kũmũthũkũma,

10nĩngũkwĩsũva kwondũ wa Onesimasi mwana wakwa, ũla nĩnatw'ĩkie ĩthe wake wa kĩ-veva nĩ vaa yela.

11Navu ĩtina ndanaĩ akũuna na kĩndũ, ĩndĩ yu e na ũuno mũnene kwaku na kwakwa.

12Nĩngũmũtũma asyoke kwaku yu, nake nĩmwendete mũno.

13Nĩĩ nenda kwĩkala nake kũũ andetheeasye vandũ vaku, ĩvindanĩ yĩĩ nĩ yela kwondũ wa Ũvoo Mũseo.

14Ĩndĩ nonie ti ũseo kwĩka kĩndũ tũtew'anĩte, nĩ kana kũndethya kwaku kũikethĩwe kumanĩte na kũingĩĩw'a, ĩndĩ kwĩthĩwe kumanĩte na ngenda yaku mwene.

15Kĩu no kwĩthĩwa nokyo kĩtumi Onesimasi wambie kũtaanĩw'a naku kwa kavinda, nĩ kana ũtonye kwĩthĩwa nake ĩngĩ tene na tene.

16We yu tyo ngombo, e ĩũlũ wa ngombo: Nĩ mwana-a-asa wendekete nthĩnĩ wa Klĩsto. E vata mũno kwakwa, ĩndĩ mũno mbee kwaku ta mũndũ na ta mwana-a-asa nthĩnĩ wa Mwĩai.

17Kwoou ethĩwa ũmbosaa ta tũkwatanĩĩte ũthũkũmi, mũthokye ĩngĩ o ũndũ ũtonya kũnthokya.

18Ethĩwa nĩwakũvĩtĩisye kwa ũndũ o na wĩva, kana e na thiĩ naku, andĩka ta thiĩ wakwa.

19Yu vaa nĩkũandĩkĩa na kw'oko kwakwa mwene: Nyie Vaũlo ngakũĩva! (Ĩndĩ lilikana kana we wĩ thiĩ nakwa wa thayũ waku mwene.)

20Kwoou mwana-a-asa, mbĩke nesa ũndũnĩ ũsu kwondũ wa Mwĩai, mbuũkye ngoo ta nĩ mwana-a-au nthĩnĩ wa Klĩsto.

21Nĩnĩsĩ wĩ mwĩwi, na kwoou nĩkũandĩkĩa nĩsĩ nesa kana nũkwĩka o na mbee wa kĩla ngũkũlĩtye.

22Ũndũ ũngĩ: Nĩngũũkũlya ũnzeũvĩsye vandũ va kwĩkala, nũndũ nĩngwĩkwatya kana kwondũ wa mboya syenyu Ngai akandũnga kwenyu ĩngĩ.

23Nĩwakethw'a nĩ Evavulasi, ũla twovetwe ĩmwe kwondũ wa kwĩthĩwa twĩ mũamba na Klĩsto Yesũ.

24O ta ũu Maliko, Alisitaliko, Ndemasi, na Lũka, ala ndethasya wĩa namo nĩmakũkethya.

25Mumo wa Mwĩai Yesũ Klĩsto nĩwĩthĩwe nenyu inyw'onthe.

Jump to: