Titus 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Ĩndĩ we waĩlĩte kũmanyĩsya maũndũ ala mosanaa na ũmanyĩsyo ũla wa w'o.

2Manyĩsya atumĩa methĩwe na wĩting'o, ma kwĩkwatw'a, na me na mosũanĩo maseo; methĩwe andũ ma w'o mũĩkĩĩonĩ, wendonĩ na wũmĩĩsyonĩ.

3O ta ũu manyĩsya aka ala akũũ kwĩthĩwa na mwĩkalo ũla waĩlĩte. Maikethĩwe andũ ma nzukũ kana athengi. Nĩmamanyĩasye maũndũ ala maĩlĩte.

4Nĩvo ĩndĩ meĩthĩwa matonya kũmanyĩsya aka ma mũika kwenda aamũũme na syana syoo,

5kwĩthĩwa me na wĩting'o, ũtheu wa ngoo, na kwĩthĩwa aka aseo ma mũsyĩ, me tei na menyivĩasya aũme moo, nĩ kana mũndũ o na wĩva ndakaneene ndeto nthũku ĩũlũ wa ndeto ya Ngai.

6O ta ũu thangaasya anake methĩwe na mwĩkalo mũseo.

7Maũndũnĩ onthe waĩlĩte kwĩthĩwa we mwene wĩ ngelekany'o nzeo nthĩnĩ wa mwĩkalo waku. Kũmanyĩsyanĩ kwaku onany'a ũima, na ndũkethĩwe na ngũĩ.

8Neenaa ndeto syĩ kĩtumi ila itatonya kumw'a ĩvĩtyo, nĩ kana amaitha maku makwatwe nĩ nthoni, nũndũ wa kwaĩwa nĩ ũndũ o na wĩva mũthũku maneena ĩũlũ waitũ.

9Na o ta ũu manyĩsya athũkũmi menyivĩasye anene moo, mamathũkũmae nesa mate kũmatũngĩthya,

10kana kũmoyĩa. Ĩndĩ methĩwe me aĩkĩĩku maũndũnĩ onthe, nĩ kana ũmanyĩsyo ĩũlũ wa Ngai Mũtangĩĩi waitũ, wĩthĩwe wĩ wa kwendeesya.

11Nũndũ Ngai nũvuanĩtye mumo wake, nĩ kana andũ onthe makwate ũtangĩĩo.

12Mumo ũsu nũtũtonyethasya kũtiana na mwĩkalo ũte na ũtheu wa Ngai, na mawendi ma maũndũ ma kũũ nthĩ, na kwĩthĩwa na mwĩkalo wĩ na wĩting'o, mũlũngalu, na wa kũmũkĩa Ngai twĩ kũũ ĩũlũ wa nthĩ.

13Tũendeeaa na kweteela kĩla tũtũaa twĩkwatĩtye, nakyo nĩ kũsyoka ĩngĩ na ũkumyo kwa Ngai waitũ mũnene, nake nĩ mũtangĩĩi Yesũ Klĩsto.

14Nĩweeyumisye mwene kwondũ witũ, atwovosye kuma mothũkunĩ onthe, na kũtũthesya atũtw'e andũ make ala menenganĩte kwĩkaa ũlũngalu.

15Manyĩsya maũndũ asu na ũitũmĩa ũkũmũ w'onthe yĩla ũũthangaasya na kũkany'a andũ. Ndũketĩkĩle mũndũ o na wĩva akũvũthye.

← Chapter 1 Jump to: Chapter 3 →