James 2

The New Testament in Koya Language © The Word for the World International and Koya Translation Samithi, Malkangiri, Odisha 2020

← Chapter 1 Jump to: Chapter 3 →

1ଆ ନା ଦାଦାଲଡ଼ି ନୁ ଏଲାସ୍କ୍‍, ମାନ୍‍ ଗୌରବ୍‍ତଣ୍ଡ୍ ପ୍ରବୁ ଜିସୁ କ୍ରିଷ୍ଟନାଗ୍ ବିଶ୍ୱାସ୍ ମାଡ଼ିମାନାଙ୍କ୍ ନାରୁଡ଼୍‍କିଂଙ୍କ୍ ଆଦ୍‍ଲେକାମ୍‍ କେଲ୍‍ମାଟ୍ ।

2ବାତେଙ୍କ୍ଇତ୍କେ ସୁନାତାଦ୍ ମୁଦ୍‍ ନୁ ସାୟେତ୍ ଚକେ କେର୍‍ସ୍ ବେନ ମିୟାଦ୍ ମିଟିଙ୍ଗ୍‍ତାଗ୍ ୱାଦ୍‍ତଣ୍ଡ୍, ମେଣ୍ଡେ ୱେରଣ୍ଡ୍ ଗରିବ୍ ନାରୁଡ଼୍ ମୁର୍କ୍ ଆତ୍‍ତାଦ୍ ଚକେ କେର୍‍ସ୍ ୱାଦ୍‍ତଣ୍ଡ୍,

3ମେଣ୍ଡେ ମିଡ଼୍ ସାୟେତ୍ ଚକେ କେର୍‍ତେନଙ୍କ୍ କେତିତିଡ଼୍, ଇଗେ ସାୟେତ୍ ପଡ଼୍‍ୟେତାଗ୍ କୁଦ୍‍ଦା, ମେଣ୍ଡେ ଗରିବ୍ ନାରୁଙ୍କ୍ କେଲାଟ୍, ଆଗେ ନିଲ୍‍ମ୍, ବା ନେଲ୍ କୁଦେ ।

4ଆଲେକେ ମିଡ଼୍ ବାତ୍ ନିଜେତ୍ ନିଜେତ୍ ଲୋପେ ୱେଏକ୍ ଆସ୍ ମେଣ୍ଡନ୍ ରକମ୍ ବ୍ୟବହାର୍‌ ନୁ କାରାପ୍ ବିଚାର୍ ମାଡ଼ୁତିଡ଼୍?

5ଆ ନା ଦାଦାଲଡ଼ି ନୁ ଏଲାସ୍କ୍‍, କେଞ୍ଜାଟ୍, ଇଶ୍ୱର୍ ବାତ୍ ଇଦ୍ ଜଗତ୍‍ତେ ଗରିବ୍ ନାରୁଡ଼୍‍କିଂଙ୍କ୍ ବିଶ୍ୱାସ୍‍ତାଦ୍ ଦନ୍‍ତାଗ୍ ସାଉକାର୍ ଆଦାନଙ୍କ୍, ମେଣ୍ଡେ ନିଜେ ପ୍ରେମ ମାଡ଼ାନକିଂଙ୍କ୍ ବେନ୍ ରାଜ୍ୟ ଇଦାନଙ୍କ୍ ଶପତ୍ ମାଡ଼୍‍ତଣ୍ଡ୍, ଆଗେତ୍ ଅଦିକାରି ଆଦାନଙ୍କ୍ ଏଞ୍ଚଣ୍ଡ୍ କି?

6ଇତ୍‍କେ ମିଡ଼୍ ଗରିବ୍ ନାରୁଡ଼୍‍କିଂଙ୍କ୍ ପାସ୍କ୍‍ତିଡ଼୍ । ସାଉକାର୍ ନାରୁଡ଼୍ ବାତ୍ ମିଇ ପର୍‍ର ଅତ୍ୟାଚାର୍ ମାଡ଼ଡ଼୍‍ କି ମେଣ୍ଡେ ମିକିଂଙ୍କ୍ ବିଚାର୍ ମାଡ଼ାନାଗ୍ ଲାଗି ଆୟ୍‍ୱିଡ଼୍ କି?

7ବେନ୍ ଜିସୁକ୍ରିଷ୍ଟନ୍ ପେଦେର୍ତେ ମିଡ଼୍ ପାଏମ୍ ଆତ୍‍ତିଡ଼୍, ଆଦ୍ ପେଦେର୍‍ତେ ବାତ୍ ଅଡ଼୍‌ ନିନ୍ଦ୍ ମାଡ଼ଡ଼୍‍?

8ମିଡ଼୍ ମିଇ ଗାରେତଡ଼୍‍କିଂଙ୍କ୍ ଜିୱୁତଡ଼୍‍ ପ୍ରେମ ମାଡ଼ାଟ୍, ଶାସ୍ତ୍ରତାଗ୍ ଇଦ୍ ଇଶ୍ୱର୍‌ତେ ନିୟମ୍ ଯଦି ନିଜାମ୍ ପାଲନ୍ ମାଡ଼୍‍କେ, ଆଲେକେ ସାୟେତ୍‍ କାମ୍ ମାଡ଼୍‍ତିଡ଼୍,

9ଯଦି ନାରୁଡ଼୍‍କ୍ ପକ୍ଷପାତ ବ୍ୟବହାର୍‌ ମାଡ଼ୁତିଡ଼୍, ଆଲେକେ ମିଡ଼୍ ପାପ୍ ମାଡ଼ୁତିଡ଼୍, ମେଣ୍ଡେ ଇଦ୍ ମୋଶାନ୍‌‍ ନିୟମ୍‍ ଲେକାମ୍‍ ଦଷି ଆଦ୍‍ତିଡ଼୍ ।

10ବାତେଙ୍କ୍ଇତ୍କେ ବେନ ସାର୍‍ରେ ନିୟମ୍ ପାଲନ୍ ମାଡ଼ି ଅଣ୍ଡୟ୍‌ ନିୟମ୍‍ତିଙ୍କ୍ ପାଲନ୍‍ ମାଡ଼ନ୍, ଆଲେକେ ଅଣ୍ଡ୍‌ ଆଦ୍ ସାର୍‍ରେ ନିୟମ୍‍ତିଙ୍କ୍ ପାଲନ୍‍ ମାଡ଼ଣ୍ଡ୍ ଇଞ୍ଜ ଦଣ୍ଡ୍ ପାଏମ୍ ଆଦ୍‍ତନ୍ ।

11ଆଦିଙ୍କ୍ ବେନ ଇଶ୍ୱର୍‍ ବେବିଚାର୍ ମାଡ଼୍‍ମାଟ୍ ଇଞ୍ଜ କେସ୍‍ମାତ୍‍ତଣ୍ଡ୍, ଅଣ୍ଡ୍‌ ଗାଲା ଆୱୁକ୍‍ମାଟ୍ ଇଞ୍ଜ କେସ୍‍ମାତ୍‍ତଣ୍ଡ୍, ଆଦିଙ୍କ୍ ମିଡ଼୍ ଯଦି ବେବିଚାର୍ ମାଡ଼କଟ୍ ନାରୁଡ଼୍‍କ୍ ଆୱୁକିତିଡ଼୍, ଆଲେକେ ନିୟମ୍‍ତିଙ୍କ୍ ପାଲନ୍ ମାଡ଼୍‍ୱିଡ଼୍ ।

12ବେନ୍ ସ୍ୱାଦିନ୍‍ତେ ନିୟମ୍ ତଡ଼୍ ମିଡ଼୍ ଯେ ବିଚାର୍ ଆଦ୍‍ତିଡ଼୍, ଇଦ୍ ପୁଞ୍ଜ୍ ଆଦେରକମ୍ କେଲାଟ୍ ନୁ ପାଡ଼୍‍ୟି ମାଡ଼ାଟ୍ ।

13ବାତେଙ୍କ୍ଇତ୍କେ ବେନ ୱେରେ ତଡ଼୍‍କିଙ୍କ୍ ଦୟା ମାଡ଼ଣ୍ଡ୍, ବିଚାର୍ ସମୟ୍‍ତେ ଇଶ୍ୱର୍‍ ଅଡ଼୍‌‍କିଂଙ୍କ୍ ଦୟା ତତିତନ୍ ।

14ଆ ନା ଦାଦାଲଡ଼ି ନୁ ଏଲାସ୍କ୍‍, ଯଦି ବେନ ନାୟାଦ୍ ବିଶ୍ୱାସ୍ ମିନ୍ଦେ ଇଞ୍ଜ କେତିତଣ୍ଡ୍, ଇତ୍‍କେ ଅନ୍‌ ପାଡ଼୍‍ୟି ଇଲ୍‍ୱେମାନ୍ତେ, ଆଲେକେ ଆଦ୍ ବାତ୍ ଲାବ୍? ଇଦ୍ ରକମ୍ ବିଶ୍ୱାସ୍ ବାତ୍ ବେନଙ୍କ୍ ମୁକ୍ତି ଇଦ୍ ପାର୍‍ଦ୍‍ତେ କି?

15ହେର୍କେ ମାଡ଼ାଟ୍ ଯଦି ବେନ ତାମୁଣ୍ଡ୍ ଆୟି ବା ଏଲାଡ଼୍‍ ଆୟି, ଚକାସିଲେ ନୁ ତିନ୍ଦାନାଦ୍‍ କାଦି ଦର୍‍କ,

16ଇଶ୍ୱର୍‍ ମିକିଙ୍କ୍ ଆର୍ଶିବାଦ୍ ମାଡ଼ିତ୍ ତିଞ୍ଜ୍ ଉଞ୍ଜ୍‍ ଶାନ୍ତିତେ ମାନୁଟ୍ ନିଯାତ୍‍ ଗଟ୍ ଆଙ୍ଗ୍‍ଡ଼ାମ୍ ଆୟକି?

17ଆଦେ ରକମ୍ ବିଶ୍ୱାସ୍ ନୁ ପାଡ଼୍‍ୟି ଇଲକଟ୍ ମାତ୍‍ତ୍କେ ବିଶ୍ୱାସ୍ ଡଲ୍‍ତେ ।

18ଇତ୍‍କେ ବେନ ବା କେତିତଣ୍ଡ୍, ୱେରନାଦ୍ ବିଶ୍ୱାସ୍ ମିନ୍ଦେ, ମେଣ୍ଡେ ଅର୍ତିନାଦ୍ ପାଡ଼୍‍ୟି ମିନ୍ଦେ, କିନ୍ତୁ ନାନେ କେତୁତାନ୍ ପାଡ଼୍‍ୟି ୱିଡ଼୍‍ସି ମିୟାଦ୍ ବିଶ୍ୱାସ୍ ନାକିଂଙ୍କ୍ ତଅମ୍, ମେଣ୍ଡେ ନାନ୍ ପାଡ଼୍‍ୟିତଡ଼୍ ନିକିଂଙ୍କ୍ ମିକିଂଙ୍କ୍‍ ନାୟାଦ୍ ବିଶ୍ୱାସ୍ ତଅତିତାନ୍ ।

19ଇଶ୍ୱର୍ ଯେ ୱେରଣ୍ଡ୍, ଇଦ୍ ମିଡ଼୍ ବିଶ୍ୱାସ୍ ମାଡ଼ୁତିଡ଼୍; ସାୟେତ୍ ଗଟ୍, ବୁତ୍‌କ୍ ଗାଲା ବିଶ୍ୱାସ୍ ମାଡ଼ି ୱେର୍‍ଦେ ୱାଡ଼୍‍କିତା ।

20ଇତ୍‍କେ ଆ ମୁର୍କ ନାରୁଡ଼ି, ପାଡ଼୍‍ୟି ୱିଡ଼୍‍ସି ବିଶ୍ୱାସ୍ ବାତେଏ ବା ଆୟ୍‍ୟ, ଇଦ୍ ବାତ୍ ପୁନ୍‍ୱିଡ଼୍‍?

21ମାନ୍‍ ମୁନେତ୍‍ ବାବାଲ୍ ଅବ୍ରାହାମ୍‌ ବେଦି ପର୍‍ର ନିଜେତ୍ ମାର୍‌ ଇସ୍‍ହାକ୍‍ତିଙ୍କ୍ ବଲି ମାଡ଼ାନ୍ ୱେଲେ ବାତ୍ ପାଡ଼୍‍ୟିତଡ଼୍ ଦାର୍ମାମ୍ ଆସ୍ ମାନଣ୍ଡ୍?

22ମିଡ଼୍ ଉଡ଼ୁତିଡ଼୍ ଯେ ବିଶ୍ୱାସ୍ ଅନ୍‌ ତଡ଼୍ ମାତ୍‍ତେ, ମେଣ୍ଡେ ଆଦ୍ ପାଡ଼୍‍ୟିତଡ଼୍ ବିଶ୍ୱାସ୍ ନିଜାମ୍ ଆତ୍‍ତେ;

23ଆଗାଙ୍କ୍ ଶାସ୍ତ୍ରତାଗ୍ ଇଦ୍ ଲେକ୍‍ତେ ବାକ୍ୟ ସାରେ ଆତ୍‍ତେ, ଅବ୍ରାହାମ୍‌ ଇଶ୍ୱର୍‌ତାଗ୍ ବିଶ୍ୱାସ୍ ମାଡ଼୍‍ତଣ୍ଡ୍, ମେଣ୍ଡେ ଆଦ୍ ଅଂକିଙ୍କ୍‌ ଦାର୍ମାମ୍ ମାଡ଼୍‍ତେ, ମେଣ୍ଡେ ଅଣ୍ଡ୍‌ ଇଶ୍ୱର୍‌ତେ ସାଙ୍ଗ ଇଞ୍ଜ ପେଦେର୍ ଆତ୍‍ତେ ।

24ଆସାମ୍ ବିଶ୍ୱାସ୍ ମାଡ଼୍‍କେ ଯେ ଦାର୍ମାମ୍ ଆୟ୍‍ୟଣ୍ଡ୍ ପାଡ଼୍‍ୟି ମାଡ଼୍‍କେ ଦାର୍ମାମ୍ ଆଦ୍‍ତନ୍, ଇଦ୍ ମିଡ଼୍ ଉଡ଼ୁତିଡ଼୍ ।

25ଆଦେ ରକମ୍ ଦାରି ରାହାବ ଦୂତ୍‍କିଂଙ୍କ୍ ନିଜେତ୍ ମାଡ଼ି ମେଣ୍ଡେ ଅଣ୍ଡ୍‌ ହାର୍ ଇସ୍ ଆୱିଙ୍କ୍ ରହସିତ୍‍ତାଙ୍କ୍ ବାତ୍ ପାଡ଼ୟିତଡ଼୍ ଦାର୍ମାମ୍ ଆୟ୍‍ୟଣ୍ଡ୍?

26ବାତେଙ୍କ୍ଇତ୍‍କେ ଆତ୍ମା ୱିଡ଼୍‍ସି ବେଲା ମେନ୍ଦୁଲ୍ ଡଲିତ୍, ଆଦେ ରକମ୍ ପାଡ଼୍‍ୟି ୱିଡ଼୍‍ସି ବିଶ୍ୱାସ୍ ଡଲିତ୍ ।

← Chapter 1 Jump to: Chapter 3 →