Romans 15

The New Testament in Koya Language © The Word for the World International and Koya Translation Samithi, Malkangiri, Odisha 2020

← Chapter 14 Jump to: Chapter 16 →

1ବେନଡ଼୍ ବିଶ୍ୱାସ୍‍ତାଗ୍ ନାର୍ଗ୍, ଅଡ଼୍‌ ବିଶ୍ୱାସ୍‍ତାଗ୍‍ ଦୁର୍ବଲ୍‍ ମାନ୍ଦାନ୍‍ ତାମୁନ୍‍ତାଦ୍ ଦଷ୍ ସେଙ୍ଗେ ଶକ୍ତିତଡ଼୍ ଆୟ୍‍ମୁଟ୍ । ବେନ ନିଜେତିଙ୍କ୍ ୱେଡ଼୍‍କ୍‍ ମାଡ଼ାନ୍ ସେଙ୍ଗେ ଆଲ୍‍ସ୍‍ମାକିଣ୍ଡ୍ ।

2ଇତ୍‍କେ ମେଣ୍ଡେଅଡ଼୍‌‍ତିଡ଼୍ ସାୟେତ୍‍ ସେଙ୍ଗେ ନୁ ଅଡ଼ାଦ୍‌ ବିଶ୍ୱାସ୍‍ତିଙ୍କ୍ ନାର୍ଗ୍ ମାଡ଼ାନ୍ ସେଙ୍ଗେ ଅଡ଼୍‌‍କିଂଙ୍କ୍ ୱେଡ଼୍‍କ୍‍ ମାଡ଼ାନାଦ୍ ମାନ୍‍ ଦାୟିତ୍ ।

3କ୍ରିଷ୍ଟ ନିଜେତ୍ ସୁକାମ୍‍ତେ ସେଙ୍ଗେ ବାତ୍ ମାଡ଼୍‍ୱେ ମାତ୍‍ତଣ୍ଡ୍ । ଇତ୍‍କେ ଶାସ୍ତ୍ର ବାକ୍ୟ ଲେକାମ୍, “ଅଡ଼୍‌ ମିକିଂଙ୍କ୍ ଇସମାନ୍ଦାନ୍ ଅପ୍‍ମାନ୍ ନାନ୍ ସୟ ମାଡ଼ୁତାନ୍ ।”

4ଶାସ୍ତ୍ରତାଗ୍ ଲେକାମାନ୍ଦାନ୍‍ ଶିକ୍ଷା ସାର୍‍ରେ ମାନାଦ୍‍ ଉପ୍‍କାର୍ ସେଙ୍ଗେ ମିନ୍ଦେ । ବର୍‍ସାତାଗ୍ ଗାଡ଼୍‍ସ୍ ମାନ୍ଦାନ୍ ସେଙ୍ଗେ ଶାସ୍ତ୍ର ମାନାକିଙ୍କ୍ ଗାଡ଼୍‍ସ୍ ନୁ ସାର୍‍ଦେ ଇଦ୍‍ତେ ।

5କ୍ରିଷ୍ଟ ଜିସୁନ୍ ଆଦର୍ଶତାଗ୍ ମାନ୍ଦାନଡ଼୍ ଲେକାମ୍ ସାର୍ରେତଡ଼୍‍ୱାଦ୍ ଆଦେ ରକମ୍ ମନ୍‍ବାବ୍ ଆଦ୍‍ଦାନ୍ ସେଙ୍ଗେ ଗାଡ଼୍‍ସ୍ ନୁ ୱେଡ଼୍‍କେତଣ୍ଡ୍ ଇଶ୍ୱର୍ ମିକିଂଙ୍କ୍ ଯୋଗ୍ୟ ମାଡ଼ିଣ୍ଡ୍ ।

6ସାର୍ରେତଡ଼୍ କାୟ୍‍ଲିମେଣ୍ଡେ ୱେରଡ଼୍ ଲେଙ୍ଗ୍‍ଦେ ପ୍ରବୁ ଜିସୁ କ୍ରିଷ୍ଟ ବାବାଲ୍ ଇଶ୍ୱର୍‌ତିଙ୍କ୍ ପ୍ରସଂଶା ମାଡ଼ାଟ୍ ।

7ଆଦିଙ୍କ୍‍ କ୍ରିଷ୍ଟ ବେଲା ମିକିଂଙ୍କ୍ ଗ୍ରହନ୍ ମାଡ଼୍‍ତଣ୍ଡ୍, ଇଶ୍ୱର୍‌ତେ ମହିମା ସେଙ୍ଗେ ମିଡ଼୍ ଆଦେରକମ୍ ମିଇ ମିଲୋପେ ଗ୍ରହନ୍ ମାଡ଼ାଟ୍ ।

8ବାତେଙ୍କ୍‍ଇତ୍‍କେ କ୍ରିଷ୍ଟନ୍ ସେବାତାଦ୍ ଜିୱୁଣ୍ଡ୍ ଇହୁଦୀଡ଼୍ ସେଙ୍ଗେ ତିୟାର୍ ଆସ୍‍ମାତ୍‍ତେ । ଅଡ଼୍‌‍କିଂଙ୍କ୍ ଅଣ୍ଡ୍‌ ତଅତାଙ୍କ୍ ଆଲ୍‍ସମାତ୍‍ତଣ୍ଡ୍ ଜେ ଇଶ୍ୱର୍ ବିଶ୍ୱାସ୍‍ତଣ୍ଡ୍‍, ଇହୁଦୀ ଗୋଷ୍ଠୀତ୍‍ ଆନିଦାଦିଡ଼୍‍କିଙ୍କ୍ ଇସ୍‍ମାନ୍ଦାନ୍ ସତ୍‍ ପ୍ରତିଜ୍ଞା ସାର୍‍ରେ ଅଣ୍ଡ୍‌ ପାଲନ୍ ମାଡ଼ିତନ୍ ।

9ଅନ୍‌‍ୱାଦ୍ ଅନୁଗ୍ରହ ସେଙ୍ଗେ ଅଣଇହୁଦୀଡ଼୍ ଗାଲା ଅନ୍‌‍ୱାଦ୍ ପ୍ରସଂଶା ମାଡ଼ିତଡ଼୍ । ଇଦ୍ ବିଷୟ୍‍ତେ ଶାସ୍ତ୍ରତାଗ୍ ଲେକାମିନ୍ଦେ, “ଅଣଇହୁଦୀଡ଼୍ ଲୋପେ ମିୟାଦ୍ ପ୍ରସଂଶା ମାଡ଼ିତାନ୍, ସାର୍ରେଦାମ୍ ମିୟାଦ୍ ସ୍ତୁତିଗାନ୍ ମାଡ଼ିତାନ୍ ।”

10ମେଣ୍ଡେ ମିକା ଲେକାମିନ୍ଦେ, “ଅଣଇହୁଦୀଡ଼୍ ଇଶ୍ୱର୍‌ତେ ନାରୁଡ଼୍‍ତଡ଼୍ ୱେଡ଼୍‍କ୍‍ ମାଡ଼ିଡ଼୍!”

11ମେଣ୍ଡେଅନ୍‌‍ନ୍ଦାମ୍, “ସାର୍‍ରେ ଅଣଇହୁଦୀଡ଼୍‍ ନାରୁଡ଼୍ ଅନ୍‌‍ୱାଦ୍ ସ୍ତୁତିଗାନ୍ ମାଡ଼ିଡ଼୍!”

12ମେଣ୍ଡେ ଯିଶାଇୟ କେତ୍‍ତଣ୍ଡ୍, “ଯେଶୀନ୍ ବଂଶତଣ୍ଡ୍ ୱେରଣ୍ଡ୍ ପୁଟିତଣ୍ଡ୍, ଅଣ୍ଡ୍‌ ଅଣଇହୁଦୀଡ଼୍‌କିଂଙ୍କ୍ ଶାସନ୍‍ ମାଡ଼ିତନ୍ ନୁ ଅଡ଼୍‌ ଅନାଗେ ବରସା ମାଡ଼ିତଡ଼୍ ।”

13ସାର୍‍ରେ ବରସାତଣ୍ଡ୍, ଇଶ୍ୱର୍ ମିକିଂଙ୍କ୍ ବିଶ୍ୱାସ୍‍ତେ ମାୟ୍‍ଦିଙ୍କ୍ ମିକିଂଙ୍କ୍ ୱେଡ଼୍‍କ୍‍ ନୁ ଶାନ୍ତିତଡ଼୍ ସାରେ ମାଡ଼ିଣ୍ଡ୍ । ପବିତ୍ର ଆତ୍ମାତେ ଶକ୍ତିତଡ଼୍ ମିୟାଦ୍ ବରସା ନାର୍ଗେ ଆୟି ।

14ଦାଦାଲଡ଼ି ନୁ ଏଲାସ୍କ୍‍, ନାୟାଦ୍ ବିଶ୍ୱାସ୍, ମିଡ଼୍ ସାର୍‍ରେ ସାୟେତ୍ ଗୁନାମ୍ ବା ଜ୍ଞାନ୍‍ତଡ଼୍ ନିଣ୍ଡିମେଣ୍ଡେ ନୁ ମି ମିଲୋପେ ଶିକ୍ଷା ଇଦାନଙ୍କ୍ ପାର୍‍ଦ୍‍ତିନ୍ ।

15ଇଦ୍ ଚିଟିତାଗ୍ ମିକିଂଙ୍କ୍ ବେସ୍‍କେ ବିଷୟ୍ ସଚେତନ୍ ମାଡ଼ାନ୍ ସେଙ୍ଗେ ଇଶ୍ୱର୍‌ତେ ତଡ଼୍‍ ନାନ୍ ଗାଡ଼୍‍ସ୍ ଆତ୍‍ତାନ୍,

16ବାତେଙ୍କ୍ଇତ୍‍କେ କ୍ରିଷ୍ଟ ଜିସୁନ୍ ଦାସ୍ ଇସାପ୍‍ତେ ଅଣଇହୁଦୀଡ଼୍ ସେଙ୍ଗେ ପାଡ଼୍‍ୟି ମାଡ଼ାନ୍ ମାୟ୍‍ଦିଙ୍କ୍ ଇଶ୍ୱର୍ ନାକିଂଙ୍କ୍ ସୁଯୋଗ୍ ଇତ୍‍ତନ୍ । ଇଶ୍ୱର୍‌ତାଦ୍ ସାୟେତ୍ କାବୁର୍ ପ୍ରଚାର୍ ମାଡ଼ାନ୍ ସେଙ୍ଗେ ନାନ୍ ୱେରଣ୍ଡ୍ ଦର୍ମଗୁରୁ ଲେକାମ୍ ପାଡ଼୍‍ୟି ମାଡ଼ୁତାନ୍ । ଅଣଇହୁଦିଡ଼୍ ପବିତ୍ର ଆତ୍ମା ତଡ଼୍ ଇତ୍‍ତାୱୁ ଜିନିଷ୍ ଲେକାମ୍ ଇଶ୍ୱର୍‌ତେ ବକେତ୍ ଗ୍ରହନ୍ ଆୟିଡ଼୍, ଇଦ୍ ନାୟାଦ୍ ଉଦେଶ୍ୟ ।

17କ୍ରିଷ୍ଟ ଜିସୁନ୍ ତଡ଼୍ କାୟ୍‍ଲି ଇଶ୍ୱର୍‌ତେ ସେଙ୍ଗେ ଇଦ୍ ସେବା ପାଡ଼୍‍ୟି ମାଡ଼ମାନ୍ଦାନ୍ ମାୟ୍‍ଦିଙ୍କ୍ ନାନ୍ ଗର୍ବ ମାଡ଼ୁତାନ୍ ।

18ଅଣଇହୁଦୀଡ଼୍‌କିଂଙ୍କ୍ ଇଶ୍ୱର୍‌ତାଦ୍ ନିୟମ୍ ପାଲନ୍ ମାଡ଼ାନ୍ ସେଙ୍ଗେ କ୍ରିଷ୍ଟ ନା ତଡ଼୍ ବାତ୍ ପାଡ଼୍‍ୟି ମାଡ଼୍‍ତଣ୍ଡ୍, ଇଦ୍‍ଏ ଗଟ୍ କେତ୍‍ତାନ୍ ସେଙ୍ଗେ ନାନ୍ ଗାଡ଼୍‍ସ୍ ଆତ୍‍ତାନ୍ ।

19ଇଦ୍ ଅଣ୍ଡ୍‌ ମାଡ଼୍‍ତଣ୍ଡ୍, ବାକ୍ୟ ନୁ ପାଡ଼୍‍ୟି ତଡ଼୍ ନୁ ଇଶ୍ୱର୍‌ତେ ଆତ୍ମାତେ ଶକ୍ତିତେ । ଆଦିଙ୍କ୍ ନାନ୍ ଯିରୁଶାଲମ୍‍ତାଗାଙ୍କ୍ ଇଲିରିକମତାଗ୍ ଆଦାନ୍ ୱେଲେ ଆର୍ର୍‍ଦାଗ୍ କ୍ରିଷ୍ଟନାଦ୍ ସାୟେତ୍ କାବୁର୍ ସାୟେ ପ୍ରଚାର୍ ମାଡ଼୍‍ତାନ୍ ।

20ବେନ୍ ପଡ଼୍‍ୟେତାଗ୍ ନାରୁଡ଼୍ କ୍ରିଷ୍ଟନାଦ୍ ବିଷୟ୍ କେଞ୍ଜଡ଼୍, ଆଗେ ଅନ୍‌‍ୱାଦ୍ କାବୁର୍ କେତାନାଦ୍ ନାୟାଦ୍ ଇଚ୍ଛା, ବାତେଙ୍କ୍‍ଇତ୍‍କେ ମେଣ୍ଡେଅଡ଼୍‌‍ତିଡ଼୍ ୱାଟିମାନ୍ଦାନ୍ ପାଉଣ୍ଡେସନ୍ ପର୍‍ର ଲୋନ୍‌ ମାଡ଼ାନଙ୍କ୍ ନାନ୍ ଚାଏମ୍ ଆୟନ୍ ।

21ଶାସ୍ତ୍ରତାଗ୍ ବେଲା ଲେକାମିନ୍ଦେ, “ବେନଡ଼୍ ଅନ୍‌‍ୱାଦ୍ କାବୁର୍ ପାଏମ୍ ଆୟ୍‍ୟଡ଼୍, ଅଡ଼୍‌ ଉଡ଼ିତଡ଼୍; ବେନଡ଼୍ କେଞ୍ଜଡ଼୍, ଅଡ଼୍‌ ବୁଜେମ୍ ଆଦ୍‍ତଡ଼୍ ।”

22ନାର୍ଗେଦାମ୍ ମିଇ ବକେତ୍ ୱାଦାନ୍ ସେଙ୍ଗେ ନାୟାଦ୍ ଯୋଜନା ଆଙ୍ଗ୍‍ଡ଼ାମ୍ ଆତ୍‍ତେ ।

23ଇତ୍‍କେ ଇଦ୍ ପଡ଼ିୟେତାଗ୍ ନାୟାଦ୍ ପାଡ଼୍‍ୟି ତେରିଆତ୍‍ତେ ନୁ ନାୟାଦ୍ ଆଶେ, ମିକିଂଙ୍କ୍ ଉଡ଼ାନ୍ ସେଙ୍ଗେ ନାୟାଦ୍ ନାର୍‍ଗେ ଏଣ୍ଡ୍‍ତାଦ୍ ଇଚ୍ଛା ଇଞ୍ଜେ ସାରେ ପୁରା ଆଦ୍‍ତେ ।

24ନାନ୍‍ ସ୍ପେନ୍ ଆଦାନ୍ ଆର୍‍ଦାଗ୍ ମିକିଂଙ୍କ୍ ଉଡ଼ି ୱାଦ୍‍ତାନ୍ ଇଞ୍ଜ ଆଲ୍‍ସ୍‍ତାନ୍ । ମିଇ ଗାର୍ରେ ବେସ୍‍କେ ଦିନାମ୍ ମାତ୍‍ତେ ପେର୍‍କେ ମିୟାଦ୍ ସାହାଯ୍ୟତେ ସ୍ପେନ୍ ଆଦ୍‍ତାନ୍ ।

25ଇଞ୍ଜେନେ ଇଶ୍ୱର୍‌ତେ ନାରୁଡ଼ାଦ୍ ସେବା ମାଡ଼ାନଙ୍କ୍ ନାନ୍ ଯିରୁଶାଲେମ୍ ଆଦୁତାନ୍ ।

26ଯିରୁଶାଲେମ୍‍ତାଗ୍ ଇଶ୍ୱର୍‌ତେ ବେନ୍ ନାରୁଡ଼୍ ଅବାବ୍ ମିନ୍ଦେଡ଼୍‍, ଅଡ଼୍‌ ସେଙ୍ଗେ ବେସର୍ ଡାବ୍‍କ୍ ରଅତାନ୍ ମାୟ୍‍ଦିଙ୍କ୍ ମାସିଦୋନିଆ ନୁ ଆକାୟତେ ମଣ୍ଡଲି ପବିତ୍ର ମାଡ଼୍‍ତଡ଼୍ ।

27ଇଦ୍ ଅଡ଼ାଦ୍‌ ନିଜର୍‍ ଇଚ୍ଛାତାଦ୍ ନିଷ୍ପତି; ନିଜାମ୍ ଇଲା ମାଡ଼ାନାଦ୍ ଅଡ଼ାଦ୍‌ କାମ୍‌ । ଇହୁଦି ନାରୁଡ଼୍ ନିଜେତ୍ ଆଦ୍ୟାତ୍ମିକ୍ ଆର୍ଶିବାଦ୍‍ତଡ଼୍ ଅଣଇହୁଦୀଡ଼୍‌କିଂଙ୍କ୍ ଅଂଶୀଦାର୍ ମାଡ଼୍‍ତାଙ୍କ୍, ଇହୁଦୀଡ଼୍‍କିଙ୍କ୍ ନିଜେତ୍ ଡାବ୍‍କିନ୍ ଆର୍ଶିବାଦ୍‍ତଡ଼୍ କାଲ୍‌ପି ଅଡ଼୍‌‍କିଂଙ୍କ୍ ସାହାଯ୍ୟ ମାଡ଼ାନାଦ୍ ଅଣଇହୁଦିଡ଼ାଦ୍ କାମ୍‌ ।

28ଯିରୁଶାଲେମ୍‍ତାଗ୍ ଆୱୁ ଡାବ୍‍କ୍ ଇସ୍ ନାୟାଦ୍ ପାଡ଼୍‍ୟି ତେର୍‍ସ୍ପ୍‍ତେ ପେର୍କେ, ନାନ୍ ସ୍ପେନ୍ ଦେଶ୍‍ ଆଦ୍‍ତାନ୍ ନୁ ଆର୍‍ଦାଗ୍ ମିକିଂଙ୍କ୍ ଉଡ଼ି ୱାଦ୍‍ତାନ୍ ।

29ନାନ୍ ପୁତ୍‍ତାନ୍, କ୍ରିଷ୍ଟନାଗାଙ୍କ୍ ସାରେ ଆର୍ଶିବାଦ୍ ପୟ୍‍ସ୍ ନାନ୍ ମିଇ ବକେତ୍ ୱାଦ୍‍ତାନ୍ ।

30ପ୍ରିୟ ଦାଦାଲଡ଼୍‍ ନୁ ଏଲାସ୍କ୍‍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍‍ତେ ନୁ ପବିତ୍ର ଆତ୍ମା ଇତ୍‍ତେ ପ୍ରେମ ସେଙ୍ଗେ ନାନ୍ ମିକିଂଙ୍କ୍ ଅନୁରଦ୍‌‍ ମାଡ଼ୁତାନ୍, ନା ସେଙ୍ଗେ ବିଶ୍ୱାସ୍‌ତେ ପ୍ରାର୍ତନା ମାଡ଼ାଟ୍ ।

31ଅବିଶ୍ୱାସୀ ନାରୁଡ଼ାଗାଙ୍କ୍ ନାନ୍ ବେଲା ପବିତ୍ରଆସ୍‌ ସାୟେ ମାନ୍‍ତାନ୍ ନୁ ଯିରୁଶାଲେମ୍‍ତାଗ୍ ନାୟାଦ୍ ପାଡ଼୍‍ୟି ବେଲା ଆଗେ ଇଶ୍ୱର୍‌ତେ ନାରୁଡ଼୍ ପସନ୍ଦ୍ ମାଡ଼ିତଡ଼୍, ଆଦିନ୍‌ସେଙ୍ଗେ ପ୍ରାର୍ତନା ମାଡ଼ମାନୁଟ୍ ।

32ଇଶ୍ୱର୍‌ତେ ଇଚ୍ଛା ଆତ୍‍କେ, ନାନ୍ ମିଇ ବକେତ୍ ୱେଡ଼୍‍କେତଡ଼୍ ୱାଦ୍‍ତାନ୍ ନୁ ମିଇ ତଡ଼୍ ବେସ୍‍କେ ଦିନା ମାଞ୍ଜ୍ ନା ମନ୍‍ତାଗ୍ ସାର୍‍ଦେ ଆଦ୍‍ତାନ୍ ।

33ସାର୍‍ରେ ଶାନ୍ତିତଣ୍ଡ୍ ଇଶ୍ୱର୍ ମିଇ ତଡ଼୍ ମାନିଣ୍ଡ୍ । ଆମେନ୍‍ ।

← Chapter 14 Jump to: Chapter 16 →

Recommended Reading

Commentary Romans Commentaries → Devotional Romans Devotional Guide → Get This Bible The New Testament in Koya Language © The Word for the World International and Koya Translation Samithi, Malkangiri, Odisha Study Bible →