1 Thessalonians 2

kumaoni

← Chapter 1 Jump to: Chapter 3 →

1हे म्यारा विश्वासी भाईयों, तुम खुद जाणछा कि हमोरो तुमार पास उनो बेकार नै भ्यो।

2तुम खुदै जाणछा कि तुमार पास उन है पैलि हमूले फिलिप्पी शैहर में कतुक दुख उठाछ। फिरले परमेश्वर ले हमून इतुक हिम्मत दीछ, कि तुमार शैहरा लोगून का द्वारा हमोरो भौत बिरोध हुना का बाद ले हमूले परमेश्वरो को सुसमाचार तुमून सुणाछ।

3क्याखिनकि हमोरो उपदेश नै त ध्वाका को छै और नै कोई गलत इरादा ले और नै छल का दगाड़ छै।

4पर जसो परमेश्वरे ले हमून योग्य समझभेरन सुसमाचार सौप रैछ। येक कारण हम लोगून नै बल्कि हमार मन परखून वाला परमेश्वर स खुश करनू खिन उपदेश दीनू।

5तुम जाणछा, कि हम नै त कभै चापलूसी बात करछ्या, और नै हमूले कभै रूपयान खिन इसो करछ्य, यो बात को परमेश्वर गवा छै, कि हम इसा लोग नाहातिन।

6हम यीशु मसीहक प्रेरित हुना का कारण तुमूनथैं मद्दत पाना को हम हकदार छ्या, फिरले हम लोगूनथैं आदर नै चाँना, और नै तुमूनथैं, और नै कैथैंई।

7पर जसीकैं ईजा अपूनी नन्तिना को पालन-पोषण करछी, उसीकैं हमूले तुमार बीच में रैभेरन ऊसोई प्रेम दिखाछ।

8हम तुमून इतुक प्रेम करनू कि केवल परमेश्वरो को निको सुसमाचार सुणून खिन नै बल्कि तुमून खिन अपूनो प्राण दिन खिन तैय्यार छ्या, येक कारण कि हम तुमून भौत प्रेम करनू।

9हे म्यारा विश्वासी भाईयो, तुम हमार काम और मेहनत स याद राखछा; येक कारण हमूले रात-दिन काम धन्धा करभेरन तुमार बीच में परमेश्वरो को सुसमाचार को प्रचार करछ्य, कि हमून तुमूनथैं भटे के लीना की जरूरत नै पड़ौ।

10तुम खुद यो बात का गवाह छा, और परमेश्वर ले गवाह छै, कि तुम सब विश्वासी का दगाड़ हमोरो ब्यवहार कतुक सच्चो और धार्मी और निर्दोष छ्यो।

11तुम जाणछा कि जसीकैं एक पिता अपून नान्तिनान का दगाड़ ब्यवहार करछो, ऊसोई हमूले तुम में भटे हरेक स शिक्षा, और तसल्ली दीछ्या, और समझूछ्या।

12तुम इसो जीवन जीया जैस देखभेरन परमेश्वर खुश हुछो, जो तुमून अपून राज्य और महिमा में भागीदार हुन खिन बुलूछो।

13येक कारण हम ले परमेश्वरो को हमेशा धन्यवाद करनू; कि जब हमार द्वारा परमेश्वरो को सुसमाचार को वचन तुमार बीच में प्रचार करछ्य, त तुमून ले ऊस आदिमीन को नै पर परमेश्वरो को वचन समझभेरन ग्रहण करछ्य, और अब परमेश्वरो को यो वचन तुमार जीवन में काम करूनमर्योछ जो मसीह में विश्वास रखनान।

14हे विश्वासी भाईयों, तुम यहूदिया प्रदेशा का विश्वासीन का नियाती बन गैछा, जो यीशु मसीह में विश्वास करनान, क्याखिनकि तुमूले अपून लोगून में ऊसोई सताव सह रैछ, जसो उनूनले यहूदी लोगून का द्वारा सताव सह राख छ्यो।

15उन यहूदीन ले प्रभु यीशु स और परमेश्वरो को संदेश दिनवालान लोगून ले मार डालछ्य और हमून ले सताछ, और परमेश्वर उनूहै खुश नाहतिन, और उन सब लोगून को विरोध करनान,

16उन हमून गैर-यहूदीन यो बतून है रोकना की कोशिश करून मरैछ्या कि परमेश्वर उनून कसीकैं बचा सकछो और उन पाप में पाप करनै जानान, और अन्त में परमेश्वर उनून सजा द्योलो।

17हे म्यारा विश्वासी भाईयों, जब हम तुमून है थ्वाड़ा देर खिन दूर हो गैछ्या, शरीर में त हम दूर छ्या लेकिन हमोरो मन तुमार पास छ्यो, तो हमूले तुमून मिलून खिन और ले ज्यादा कोशिश करछ्य।

18येक कारण हम, खास करभेरन मैं पौलुस एक बार नै बल्कि कई बार तुमार पास उन चाछ्यू, लेकिन शैतान ले तुमार पास उन है हमून रोक छै।

19हमरि आश, या आनन्द या बड़ाई को मुकुट को छै? उ तुमी होला जब हमोरो प्रभु यीशु दुबारा वापस आला।

20हमरि बड़ाई और आनन्द तुमी छा।

← Chapter 1 Jump to: Chapter 3 →