1 Timothy 5

kumaoni

← Chapter 4 Jump to: Chapter 6 →

1कोई ले स्याना आदिमीस अपमान का इरादा ले जन डाँटा, लेकिन उक दगाड़ आदर ले बर्ताव कर जसीकैं की उ तेरो बबा हो। और जो त्यारा है नाना उमरा का छन उनार दगाड़ अपून भाई का नियाती बर्ताव कर।

2और तैंस स्याना‍ स्यैनिन अपूनी ईजा की नियाती समझभेरन बर्ताव कर। और अपूनी है नाना उमर का स्यैनिन अपूनी बैनि समझभेरन साफ मन ले बर्ताव कर।

3और उन विध्वान का प्रति आदर दिखा, जिनारा पास उनेरि जरूरत पुरी करून खिन और उनेरि देखभाल करून खिन कोई नाहातिन।

4अगर कोई विध्वाक बच्चा या नाती-पोता हुन, त उन सबून है पैलि अपून परिवार का प्रति जिमेदारी निभून सिखून, जसो एक विश्वासी करून ले चैंछो, और यो करभेरन उ अपून ईजा-बबा का उपकारून चुका सकछी, क्याखिनकि येलेई परमेश्वर खुश हुनान।

5जिन विध्वान का पास उनेरि जरूरत पुरी करून खिन और उनेरि देखभाल करून खिन कोई नाहातिन, और उ परमेश्वर मेंई भरोस राखभेरन रात-दिन प्रार्थना और बिनती में लागिना की रूनान।

6जो विध्वा अपूनो पुरो बखत सुख-सुविधा में बितूनान, उन शाररीक रूप में ज्यूना छन, लेकिन आत्मिक रूप में मरिनाका छन।

7विश्वासीन यो चेतावनी दे, ताकि उनोरो चाल-चलन निर्दोष बनिना को रौ।

8अगर कोई अपून रिश्तेदारून की और खास करभेरन अपून परिवार की देख-भाल नै करूनो, त उ अपून विश्वास में मुकर ग्योछ, और एक अविश्वासी है ले बुर बन ग्योछ।

9उई विध्वाको नाम सूची में लिखी जौ, जिनरी उमर साठी साल भटे ज्यादा हो, और अपून घरवाला का प्रति वफादार हो।

10और निका कामून का कारण उको नाम हो, जेलै अपून नन्तिना को निकीकैं पालन-पोषण करिना को हो, मेहमानून की सेवा करिना की हो, परमेश्वरा का लोगून सेवा एक दासी का नियाती हो, दीन-दुखी लोगून की मद्दत करिना की हो, और हरेक निका काम में मन लागिना को हो।

11लेकिन जवान विध्वान को नाम सूची में जन लिखा, क्याखिनकि जब उनून शरीरे की इच्छा परमेश्वरे की सेवा करना की इच्छा है ज्यादा बढ़ जाछी, त उ दुसारा बार ब्या करून चाँछी।

12और दुबारा ब्या करभेरन उन अपून पास दोषी बनूछी, क्याखिनकि उनूनले दुसोरो ब्या नै करना को वादा करिना को छ्यो।

13और येक दगाड़-दगाड़ उन घर-घर घुम भेरन आलसी बन ग्यान, और नै केवल आलसी रूनान लेकिन और दुसारा लोगून का बारिमें चुगली करछी और बकबक करनै रूनान और औरून का काम में दखल दीछी, और इस बात बोलनान जो नै बोलून चैछी।

14येक कारण मैं यो सलाह दीछूँ, कि जवान विध्वान ब्या करून और नान्तिना पैद करून, और घर की देख-भाल करून और कोई बिरोधीन बदनामी करनाको मौक जन दी।

15क्याखिनकि कुछ जवान विध्वान पैलि भटे परमेश्वर है दूर हो ग्यान, और उक बजाय शैतान का पछिल चलून शुरू कर हालछ्य।

16अगर कोई विश्वासी स्यैनिका घर में इसी विध्वा हो जैको को देखभाल करून वालो नै हो, त उ उनेरि मद्दत करो, ताकि उन विश्वासीन की मण्डली में बोझ नै बनौ, और विश्वासी की मण्डली उनेरि मद्दत करौ जिनून सुच्ची में मद्दत की जरूरत छै।

17कोई ले विश्वासीन को अगुवा जो अपून काम स सही तरीका ले करछो, ऊस आदर और ठीक तनखा का योग्य समझी जान चैछो, खास करभेरन उन लोग जो परमेश्वरा का बचन स सुणून और सिखून खिन कड़ी मेहनत करनान।

18एक जाग में पवित्रशास्त्र में यो लिखीना को छै, कि “जब बल्दून जोती जाछो तब उनार मुँख में मुवाल जन बाँधिया,” और एक जाग में पवित्रशास्त्र में यो ले लिखीना को छै, “मजदूर अपूनी मजूरी को हक्कदार छै।”

19एक विश्वासी अगुवा का बिरोध में दोष लगून खिन कोई आरोपस स्वीकार जन कर, जब तलक द्वी या द्वी है ज्यादा लोग यो नै कुंन उनूनले ऊस गलत काम करून देखछ्य।

20जो लोग पाप करनै रूनान, तैंस उन लोगून सब विश्वासीन का सामुनि डाँठ लगूनी चैछी, ताकि और विश्वासी ले पाप करूँ भटे डरून।

21परमेश्वर, और यीशु मसीह, और चुनिना का स्वर्गदूतून का सामुनि जाणिभेरन मैं तैंस हुकुम दीछूँ, कि तैं बिना भेद-भाव इन बातुन माना कर, और कोई काम भेद-भाव ले जन कर।

22कैमें ले जल्दी हात राखभेरन ऊस अगुवा का रूप में नियुक्त जन कर, अगर तैं इसो करछै, त तैं उक पापून खिन जिम्मेदार होलै, और अपूनास बुरी बातुन है दूर राख।

23भविष्य में केवल पानि पिनवालो जन रौ, पर अपून पेट और बार-बार बिमार हुन वाला रोगून का कारण थ्वाड़ा अंगूर को रस स को ले इस्तमाल कर लिया कर।

24क्याखिनकि थ्वाड़ा लोग खुलेआम पाप करनान। याँ तक कि न्याय हुना है पैलि ही उन विश्वासीन का सामुनि साफ तरीका ले दोषी छन। लेकिन थ्वाड़ा लोगून को पाप त बाद में दिखाई दीनान।

25उसीकैं, जब लोग भल काम करनान, त उनार भल काम साफ तरीका ले दिख जानान। और अगर नाहातिन, त उ देर तक लुक ले नै सकना।

← Chapter 4 Jump to: Chapter 6 →

Recommended Reading

Commentary 1 Timothy Commentaries → Devotional 1 Timothy Devotional Guide → Get This Bible kumaoni Study Bible →