2 Thessalonians 1

kumaoni

Jump to: Chapter 2 →

1यो चिठ्ठी पौलुस, सिलवानुस और तीमुथियुस का तरफ भटे छै। थिस्सलुनीके का शैहरा का विश्वासीन की मण्डली खिन हम लिखूनमर्या, जो पिता परमेश्वर और प्रभु यीशु मसीह का छन।

2हम प्रार्थना करनू कि हमार पिता परमेश्वर और यीशु मसीह तुमून में अनुग्रह करौ और तुमून शान्ति दे।

3हे म्यारा विश्वासी भाईयों, तुमार बारिमें हमून हमेशा परमेश्वरो को धन्यवाद करून चैछो। इसो करूनो ठीक ले छै, क्याखिनकि तुमोरो विश्वास यीशु मसीह में बढ़नै जानमर्योछ, और एक-दुसारा खिन ले तुमोरो प्रेम बढ़नै जानमर्योछ।

4येक कारण हम परमेश्वरा का विश्वासीन की मण्डली में तुम लोगून का बारिमें गर्व करनू, हलाकि, तुम परीक्षान में होभेरन जाछा, फिरले तुम धैर्यपूर्वक सहनै रूछा और तुम अब ले यीशु मसीह में विश्वास करछा।

5तुम दुख उठून मरैछा और योई तुमून परमेश्वरा का राज्य में प्रवेश करून योग्य बनूछो, यो बात को सबूत छै कि परमेश्वर धार्मिकता ले न्याय करोलो।

6क्याखिनकि परमेश्वर हमेशा न्यायपूर्वक न्याय करछो, उ उन लोगून दुख द्योलो जिनुले तुमून दुख दीछ।

7उ तुमून चैन द्योलो जो अब दुख उठूनै रूनान, और हमून ले, यो तब होलो जब प्रभु यीशु अपून सामर्थी स्वर्गदूतून का दगाड़ स्वर्ग भटे धधकतो आग में प्रकट होलो।

8और जो परमेश्वर स नै जाणना, और हमार प्रभु यीशु का सुसमाचार स नै मानना उ उनून सजा द्योलो।

9और प्रभु उनून अपूना पास भटे भ्यार कर द्योलो और उनून अपूनी महानता में अपूनी शक्ति को अनुभव करून को हुकुम नी द्योलो, और उ उनून अनन्त विनाश का द्वारा सजा पाला।

10यो उ दिना होलो जब प्रभु यीशु विश्वासी लोगून का द्वारा महिमा पान खिन स्वर्ग भटे वापस आलो। त तुम ले उ झुण्ड में शामिल होला क्याखिनकि तुमूले उ संदेश में विश्वास करछ्य जो हमूले तुमून उक बारिमें बताछ।

11येक कारण हम हमेशा तुमून खिन प्रार्थना ले करनू, ताकि परमेश्वर तुमून उ जीवन का योग्य बना दे जैस जीन खिन उले तुमून बुला गैछ। और उ अपून सामर्थ का द्वारा तुमेरि हरेक भलि इच्छान और जो कुछ तुम विश्वास ले करून मरेछा उ पुरो हो।

12हम यो प्रार्थना करनू कि लोग तुमार कारण हमार प्रभु यीशु का नाम की महिमा करून और तुम ले आदर पाला क्याखिनकि तुम उक छा। यो जरूर होलो क्याखिनकि हमोरो परमेश्वर और प्रभु यीशु मसीह तुमून में भौत अनुग्रहकारी छै।

Jump to: Chapter 2 →