James 2

kumaoni

← Chapter 1 Jump to: Chapter 3 →

1हे म्यारा प्यारा दगड़ियो, तुम हमार महिमामय प्रभु यीशु मसीहक शिष्य छा, येक कारण तुमूनमें भेदभाव नै हो।

2अगर कोई आदिमी सुना की अंगूठी और बड़िया कपाड़ा पैन भेरन तुमारा मण्डली में उछो और एक गरीब ले मैल-कुचाला कपाड़ा पैन भेरन उछो

3और तुम उ बड़िया कपाड़ा पैनून वाला स ज्यादा सम्मान दीभेरन कुँछा, “तैं याँ खास जाग में बैठा,” और उ गरीब थैं कुँछा, “तैं वाँ ठाड़ रौ,” या “म्यारा खुटान का पास तलि बैठ जा।”

4तो क्या तुमूले याँ भेदभाव नै कर्यो और बुरो बिचार करभेरन न्याय करूनवाला नै भ्या।

5हे म्यारा प्यारा दगड़ियो, सुणा। क्या परमेश्वरले संसाराक गरीबून नै चुनियो, कि उन विश्वास में धनी और उ राज्य का वारिस बना, जेको वादा परमेश्वर ले उनूनथैं कर रैछ, जो ऊस प्रेम करनान।

6लेकिन तुमूले गरीबून को अपमान करछ्य। तुम यो खुद यो जाणछा, कि धनवान लोग छन जो तुमून में अत्याचार करनान और जबरदस्ती कचेहरीन में घसीट भेरन में लिजानान।

7उन उई छन जो यीशुक बारिमें बुरी बात बोलनान, जो नाम ले तुमेरि पछयाण छै।

8अगर तुम पवित्रशास्त्र को यो बचनाक अनुसार, कि “तैं अपून पड़ोसीस अपून जसो प्रेम राँख,” सच्ची में उन खास नियम-कानून पुरो करछा, त निको करछा।

9लेकिन अगर तुम भेदभाव करछा, त पाप करछा; और नियम-कानून तुमून दोषी ठैहरू छो।

10क्याखिनकि जो कोई सब नियम-कानून को पालन करछो लेकिन उमें भटे एक हुकुम स नै माननो त उले पुर नियम-कानून को पालन नै कर्यो और उ सब बातुन में दोषी ठहरछो।

11येक कारण परमेश्वरे ले यो क्योछ, “कि तैं ब्यभिचार जन कर,” उले यो ले क्योछ, “खून जन कर” येक कारण अगर तुमूनले ब्यभिचार त नै कर्यो लेकिन खून करछै तब ले तैं नियम-कानून स तोड़ून वालो ठैरछै।

12तुम उन लोगून का नियाती बोला और काम ले करा, जिनोरो न्याय पापून भटे आजाद करूनवाला नियम-कानूनक अनुसार होलो।

13क्याखिनकि जो कोई दुसरान में दया नै करोलो, त परमेश्वर ले उमें दया नी करोलो जब उ न्याय करोलो। लेकिन जो दुसरान में दया करोलो, त परमेश्वर ले उमें दया करोलो जब उ न्याय करोलो।

14हे म्यारा प्यारा दगड़ियो, अगर कोई क कि मैंस प्रभु यीशु में विश्वास छै लेकिन दुसरान खिन भलाई नै करनो, त ये भटे कि फैद? क्या इसो विश्वास उको उद्धार कर सकछोई?

15अगर कोई विश्वासी भाई-बैनिन का पास कपाड़ा और खाना की जरूरत हो,

16और तुमून में भटे कोई उनूथैं क, “ परमेश्वर तुमून आशीष दे, तुम गरम-गरम कपाड़ा पैना, और पेट भर भेरन खा,” लेकिन जो चीज शरीर खिन जरूरी छै उ तुम उनून नी देला, त उ उनेरि बिल्कुल मद्दत नै करूनमर्योछ।

17उसीकैं विश्वास ले, अगर भल कामून का दगाड़ नै हो, इसो विश्वास बेकार छै।

18अगर कोई आदिमी कुंछो, मैं यीशु मसीह में विश्वास करछूँ, और दुसोरो आदिमी कुंछो की मैं भल काम करछूँ, “त मैं कुछूँ, कि भल काम करीन बिना तैं यो साबित कर कि यीशु मसीह में विश्वास करछै; और मैं अपून भल कामून का द्वारा यो साबित कर सकछूँ कि मैं यीशु मसीह में विश्वास करछूँ।”

19तैंस विश्वास छै कि एक्कै परमेश्वर छै; त तैं ठीक करछै; भूत ले विश्वास करनान, और थरथरानान।

20लेकिन हे मूर्ख, क्या तैं यो ले नै जाणनै, कि भल कामून का बिना विश्वास बेकार छै?

21जब हमार पूर्वज अब्राहम ले अपून च्योलो इसहाक स वेदी में चढ़ाछ, त उले जो भल काम करछ्य उक द्वारा उ परमेश्वरा का सामुनि धर्मी ठैहराई ग्योछ।

22तैंले दिख है छै कि विश्वास ले उक कामून का दगाड़ मिलभेरन प्रभाव डालछै और उक विश्वास उक भल कामून का जरियाले सिद्ध भ्योछ।

23और यो पवित्रशास्त्र को बचनाक अनुसार पुरो भ्योछ, “अब्राहम ले परमेश्वर में विश्वास करछय, और उक विश्वासा का कारण परमेश्वर ले ऊस एक धर्मी आदिमीक रूप में ग्रहण करछ्य,” और उ परमेश्वरो को मित्र कहलाछ।

24तुमले देख हालछै कि आदिमी केवल विश्वास ले नै बल्कि भल कामून का जरियाले ले धर्मी बनछो।

25उसीकैं राहाब वेश्या ले, जब उले भेद लीनवालान अपून घर में रून खिन जाग दीछ, और उनून दुश्मनून भटे बचुन खिन दुसारा बाट भटे भेजछ्य, त क्या उ अपून भल कामून का कारण धर्मी नै बनि?

26जसीकैं शरीर आत्मा का बिना मरिना को छै ठीक उसीकैं विश्वास भल कामून का बिना बेकार छै।

← Chapter 1 Jump to: Chapter 3 →