Jude 1

kumaoni

Jump to:

1मैं यहूदा, जो यीशु मसीह को एक सेवक और याकूबो को नान भाई छूँ। मैं यो चिठ्ठी तुम लोगून लिखून मरैयू, जिनून परमेश्वरेले अपून में विश्वास करून खिन बुलाछ। हमोरो पिता परमेश्वर तुमून प्रेम करछो और तुम यीशु मसीह का द्वारा सुरक्षित छा।

2मैं प्रार्थना करछूँ कि परमेश्वर में तुमून दया, शान्ति और प्रेम मिलनै रौ।

3हे म्यारा विश्वासी भाईयो, हालाकि मैं तुमून परमेश्वरा का उद्धार का बारिमें भौत कुछ लिखून चाछ्यू, जैमें हम सब भागीदार छा, लेकिन अब मैंस यो जरूरी लगून मर्योछ कि तुमून प्रोत्साहित करन खिन लिखू कि सच्ची शिक्षा की रक्षा खिन लड़ा। परमेश्वरेले अपून लोगून यो सत्य एक बार हमेशा खिन दी दीछ जो कभै नै बदलनो।

4मैं तुमून यो लिखून मरैयू किलैकी कुछ लोग जो यीशु मसीह में विश्वास करना को दिखावा करनान, उन तुमार बीच में शामिल हो ग्यान। उन परमेश्वरो को आदर नै करना और उन गलत शिक्षा दीनान कि परमेश्वर अपून अनुग्रह ले हमार पापून माफ कर दीछो, येक कारण हम गलत कामून में जीवन जी सकनू। उन यीशु मसीह स अस्वीकार करनान, जो हमोरो एकमात्र मालिक और प्रभु छै। भौत बखत पैलि भटे, पवित्रशास्त्र में लिखीना को छै कि परमेश्वर इस लोगून दण्ड द्योलो।

5अब मैं तुमून याद दिलून चाछूँ, हलाकि तुमून पैलि है मालूम छै, कि परमेश्वर ले इस्राएली लोगून गुलामी है आजाद करवाछ और उनून मिस्र देश भटे भ्यार ली आछ, लेकिन बाद में उले उन सबून मार डालछ्य, जिनूनले जंगल में उमें विश्वास नै कर्यो।

6याद करा कि प्रभु ले उन स्वर्गदूतून कसकैं दण्ड दीछ, जिनूनले अपूनी जिम्मेदारीन नै निभाई, बल्कि उनूनले अपूनी पदविन त्याग दीछ। प्रभु ले इन दुष्ट दूतून अन्यार जाग में राख रैछ, और इसा जंजीरून ले बाँद रैछ जिनून कोई नै तोड़ सकनो ताकि महान दिन में उनोरो न्याय हो सको।

7येक कारण इन इस्राएली लोगून और उन स्वर्गदूतून, उन लोगून ले याद राखा जो सदोम और अमोरा शैहरून और उक आश-पासा का शैहरून में रूछ्या कि उनार दगाड़ कि भ्योछ। उन लोग ब्यभिचारी हो गैछ्या और हर प्रकार का कुकर्म में भ्रष्ट हो गैछ्या। येक कारण परमेश्वरेले उनून आग ले नाश कर दीछ। उनार दगाड़ जो भ्योछ उ झूठ्ठा शिक्षकून खिन एक चेतावनी बन गैछ कि उनूनले हमेशा का आग ले दण्ड दीई जालो।

8उसीकैं, यो अधर्मी लोग दावा करनान कि परमेश्वरेले उनून दर्शन में दिखाछ कि उन गलत कामून में अपूनो जीवन जी भेरन अपून शरीरून भ्रष्ट कर सकनान, और परमेश्वरा का अधिकार स नै मानना और उन महिमामय स्वर्गदूतून का बारिमें बुरा बोलनान।

9लेकिन याँ तक कि प्रधान स्वर्गदूत मीकाईल ले ऊसो नै कर्यो जसो यो अधर्मी लोग करनान। जब शैतान ले मीकाईल थैं यो बात में विवाद करछ्य कि उनूनमें भटे को परमेश्वरो को संदेश दिनवाला स मूसा का शरीर स दफनूना को अधिकार छै, त मीकाईल स्वर्गदूत का पास इन लोगून की तुलना में भौत ज्यादा अधिकार छै, फिरले उले शैतान थैं बुरी बात नै कर्या और उमें दोष नै लगायो। बल्कि उले सिर्फ इतुक क्योछ, “प्रभु तैंस डाँठौ।”

10इन लोग जो परमेश्वरै की अराधना नै करना और उन बातुन को बिरोध में बुरा शब्दून को इस्तमाल करनान जो उनून समझ में नै ऊँना; और जब उन जानवरून की नियाती ब्यवहार करनान और जिन कामून उन जाणनान उनून उन बिना सोचे-समझे करनान, त उन परमेश्वरै की तरफ भटे दण्ड भुगताला।

11उन लोगून में हाय। किलैकी उनूनले आदमा का पुत्र कैनाक नियाती दुष्टताले ब्यवहार करिना को छै, जैले अपून भाई की खून कर दीछ किलैकी उ उखिन जलछ्यो, किलैकी परमेश्वरेले उक भाई को बलिदान स स्वीकार करछ्य और उक बलिदान स स्वीकार नै कर्यो। उन बिलाम की नियाती छन, जैले परमेश्वरा का लोगून पाप करून खिन उसकूना की कोशिश करछ्य, ताकि उ, उ धन स पा सको। उन कोरह का नियाती नाश हो जाला, जैले उ अधिकार का खिलाफ में बिरोध करछ्य जो परमेश्वरेले मूसास दीईना छ्यो।

12जब यो लोग प्रभु का प्रेम स याद करभेरन तुमार दगाड़ खानखिन खानान, त यो उन खतरनाक चट्टानून की नियाती हुनान जो समुद्रा का तलि लुकिनाका हुना जो तुमोरो डूबना क कारण बन सकछो। उ उन ग्वालान का नियाती छन जो सिर्फ अपूनी चिन्ता करनान। उ उन बादलून का नियाती छन जो भूमि में बरखा करिना का बिना बस गरजनान। उन जाड़ा का मौसम का रूखून का नियाती हुनान जिनरी द्वी बार मौत हुछी किलैकी उ कोई फल नै दीना और जड़ है उखड़ जानान।

13जसकैं समुन्द्र की प्रचण्ड लहर गन्दो झाग बनूछी, उसकैं इन लोग बेशर्मी का काम करनान। उन थ्वाड़ा तारान की नियाती छन जो एक सिदा बाट में नै हिटना, उन सही बाटो नै देखून। प्रभु उनूनखिन एक जाग राखून मर्योछ जो पुरी रीतिले अन्यारा में छन जाँ उनून हमेशा खिन रून पड़लो।

14हनोक ले, जो आदम भटे सतूँ पीढ़ी में पैद भ्योछ, इन लोगून का बारिमें भविष्यद्वाणी करीनाकि छी, जब उले क्योछ, देखा प्रभु जरूर अपून पवित्र लाखू स्वर्गदूतून का दगाड़ वापिस आलो,

15कि सब लोगून को न्याय करून खिन और सब अधर्मी लोगून में उनार द्वारा करिनाका बेशर्मी और बुरा कामून का कारण दोष लगून खिन और उन सारी भद्दी बातुन का कारण जो पापी लोगून ले उक खिलाफ कईनाका छन।

16इन लोग हमेशा परमेश्वरा का खिलाफ बोलनान और दुसरा लोगून में गलती खोजनान। उन लगातार उन बुरा कामून करनान जो उनार दिल करून चांछो। उन अपून बारिमें घमण्ड ले दावा करनान और अपून फैद खिन दुसरा लोगून की चापलूसी करनान, उन पिता परमेश्वरा का तरफ भटे दण्ड भुगताला।

17लेकिन हे म्यारा विश्वासी भाईयों, तुम उन बातुन याद राखा; जो हमार प्रभु यीशु मसीह का प्रेरित भौत पैलिक बता चुकियान।

18उन तुमूनथैं कुछ्या, “हमार प्रभु यीशु का लौटून है पैलिक, इसा लोग होला जो प्रभु और उक लोगून की मजाक उड़ाला। योई उन लोग छन जिनोरो जीवन उनेरि अपूनी बुरी इच्छान का वश में छै।”

19इन उन लोग छन जो तुमून अलग-अलग दलून में बाँणना को कारण बननान। उन अपूनी इच्छान का अनुसार ब्यवहार करनान, और उनूनमें पवित्र आत्मा नाहातिन।

20लेकिन हे म्यारा विश्वासी भाईयो, तुमून एक-दुसरा की मद्दत करनै रून चांछो ताकि उ पवित्र सच्चाई में जिनूनमें तुम विश्वास करछा, एक दुसरा स बढ़ा सकां। तुमून पवित्र आत्मा की सामर्थ ले मार्गदर्शन पाभेरन प्रार्थना करून चांछो।

21तुमून यो जाणभेरन अपूनो जीवन जीन चांछो परमेश्वर तुमूनथैं प्रेम करछो। जब की तुम उ दिनेकी आश करछा, जब हमोरो प्रभु, यीशु मसीह वापस आलो ताकि तुमून अनन्त जीवन मिलो किलैकी उले हमूनमें दया करछ्य।

22उन लोगून का प्रति दयालु बना जो नै जाणना कि केमें विश्वास करा।

23थ्वाड़ा दुसारा लोग जिनून तुम जाणछा, उन नरक का तरफ जानमर्यान। उनून उ अनन्त आग भटे जल्दी खीचभेरन बचा ली। और दुसरान में ले दया दिखा। लेकिन फिरले ऊसो तरीका को पाप करून है बचुन खिन सतर्क रौ। याँ तक कि उन कपड़ान भटे ले नफरत करा जिनूनमें उनूनले अपून पापी कामून ले दाग लगायान।

24एकमात्र परमेश्वरै छै जो तुमेरि रक्षा कर सकछो, और तुमून निर्दोष और आनन्दित बना सकछो, जब उ तुमून अपूनी महिमा में अपून सामुनि ठाड़ करछो। उले हमून हमार प्रभु यीशु मसीह का द्वारा बचाछ। महिमा, गौरव, सामर्थ और अधिकार हमारा प्रभु यीशु मसीह का द्वारा जसकैं हमेशा भटे छै, अब हो, और हमेशा-हमेशा तक रौ। आमीन।

Jump to: