Philippians 2

kumaoni

← Chapter 1 Jump to: Chapter 3 →

1अगर तुम लोगून मसीह में थ्वाड़ा ले भरोस और प्रेम में तसल्ली और पवित्र आत्मा को दगाड़ छै, और किलैकी मसीह तुमून खिन करूणामय और दयालु छै,

2त एक दगाड़ रैभेरन और एक्कै प्रेम, एक्कै मन, और एक इरादा राँख भेरन मेरि यो खुशी पुर करा।

3अपून फैदा खिन और घमण्ड में केले जन करा, लेकिन जतुक समान तुम अपूनो आप स दीछा उ है ज्यादा सम्मान दुसरान दी।

4हरेक अपूनी भलाई खिन नै, ले दुसरा की भलाई की ले फिकर करा।

5जसो यीशु मसीह को स्वभाव छ्यो ऊसोई तुमोरो ले स्वभाव हो;

6हालाकि मसीह परमेश्वर छ्यो, फिरले उले परमेश्वरा का बराबर हुना को अपून अधिकार बनायी राखून ठीक नै समझयो।

7लेकिन उले अपून आप स इसो शून्य कर दीछ और एक आदिमी बन ग्यो।

8और आदिमी का रूप में आभेरन अपून आप स दीन करछ्य, और परमेश्वरा का हुकमून मानून खिन उ मरून खिन ले तैयार छ्यो, या तक कि सूली की मौत एक अपराधी की नियाति सह लीछ।

9येक कारण परमेश्वर ले ऊस सबून है ऊची पदवी दीछ, और ऊस उ नाम दीछ जो सब नामून में महान छै,

10जो स्वर्ग में और धरती में और जो धरतीका तलि छन; उन सब यीशु का नामोको सम्मान करून खिन घुणा टेकाला,

11और पिता परमेश्वर की महिमा खिन हरेक अपून मुँख ले यो मान ले कि यीशु मसीह प्रभु छै।

12येक कारण हे प्रिय दगड़ियो, तुमून ले हमेशा म्यारा हुकुमून को पाल करछ्य, जब मैं तुमार दगाड़ छ्यू। अब जब मैं दूर छूँ, त यो और ले जरूरी छै, कि तुम परमेश्वरो को डर मानून और काँपूनै अपूना उद्धारा कामून करून चैछो, जो उन लोगून खिन ठीक छन, जिनून परमेश्वर ले बचा लीछ।

13क्याखिनकि परमेश्वरई छै, जो तुमूनै में काम करूनमर्योछ, तुमून उ करना की इच्छा और ताकत दीनै रियोछ जो ऊस खुश करछो।

14सब काम बिना कुड़कुड़ाई और बिना बहस करा;

15ट्याड़ा और बेईमान लोगून ले भरिना का संसारा में तुम परमेश्वरा का निकी सन्तान नियाती निर्दोष और साफ सुथरो जीवन जीया, और जिनारा बीच तुम जीवनो को बचन लीभेरन यो संसारा में जलीना का दीया नियाती दिखाई दीछा

16जब मसीह दुबारा वापस आलो तब यो बात में घमण्ड कर सकूँलो कि मेरि कोशिश और मेरि मेहनत बेकार नै गै।

17प्रभु में तुमोरो विश्वास और तुमेरि सेवा परमेश्वर स चढ़ाईना को बलिदान की नियाती छै। अगर उन मैंस मार ले दीयून, त ले मैं खुश छूँ, और तुम सबून का दगाड़ खुशी मनू छूँ।

18उसीकैं तुम ले खुश हो, और म्यारा दगाड़ खुशी मना।

19मैंस प्रभु यीशु में उमीद छै, कि मैं तीमुथियुस तुमार पास जल्दी भेजूलो, ताकि तुमार बारिमें सुणिभेरन म्योरो हौंसला बढ़ौ।

20येक कारण म्यारा नजरून में तीमुथियुस को जसो दुसोरो कोई आदिमी नाहातिन, जो सच्ची में मेरि जसी तुमेरि चिन्ता कर सकौ।

21क्याखिनकि सब अपून फैदा की खोज में रूनान, लेकिन उन यीशु मसीह का कईना का बातुन का बारिमें चिन्ता नै करना।

22लेकिन तुम जाणछा कि तीमुथियुस ले खुद कसीकैं साबित करिना को छै। जस तरीका ले एक च्योलो अपून बबा का दगाड़ रूछो, उसीकैं सुसमाचार सुणून में फैलून में म्योरो दगड़ो दीछ।

23येक कारण मैंस उमीद छै कि जसीकैं मैंस पत्तो लाग जालो कि मेरि की दशा होलि, उसीकैं मैं ऊस जल्दी तुमार पास भेज द्यूलो।

24और प्रभु में मैंस उमीद छै कि मैंले जल्दी तुमार पास उलो।

25लेकिन मैंले इपफ्रुदीतुस स तुमार पास भेजून जरूरी समझछ्य। जो म्योरो विश्वासी भाई छै, और प्रभु में म्यारा दगाड़ सेवा करून वालो और दगड़िया योद्धा और तुमार संदेश पुजून वालो, और जरूरी बातुन में म्योरो सेवा टहल करून वालो।

26उ मन तुम सब में लागिना को छ्यो, उ येक कारण बैचेन रूछ्यो। क्याखिनकि तुम लोगून उकी बिमारी को पत्तो चल ग्यो छ्यो।

27सच्ची मैं उ भौत बिमार छ्यो और याँ तक कि मरून वालो छ्यो; लेकिन परमेश्वर ले उमें दया करभेरन ऊस चंगो करछय। परमेश्वर ले केवल उमें नै लेकिन मैंमें ले दया करछय, ताकि मैं उहै ले ज्यादा दुख सहन नै करूँ जतुक मैंले पैल सहन करिना को छ्यो।

28येक कारण मैं ऊस तुमार पास भेजना की भौत कोशिश करछ्य, तुम ऊस फिर मिलभेरन खुशी हो जा, और मेरि चिन्ता ले कम है ज्यौ।

29येक कारण तुम प्रभु में उको दगाड़ भौत खुशी का दगाड़ मिल्या, तुमून उको और उक जसा लोगून को सम्मान करून चैछो।

30क्याखिनकि उ मसीह का काम खिन अपून प्राणस खतरा में डालभेरन मौता का नजिक आ गैछ्यो। ताकि उ उन तरिकान ले मेरि मद्दत कर सकौ जो तुम नै कर पान मरैछा क्याखिनकि तुम भौत दूर छा।

← Chapter 1 Jump to: Chapter 3 →