1 John 1

Kikuyu (Kĩrĩkanĩro Gĩa Gĩkũyũ)

Jump to: Chapter 2 →

1Tũramwandĩkĩra Ũhoro ũkoniĩ Kiugo kĩa muoyo, ũrĩa ũtũire kuo kuuma o kĩambĩrĩria. We Kiugo, ithuĩ nĩtũmũiguĩte na nĩtũmuoneete na maitho maitũ, na tũkamwĩrorera o na tũkamũhuutia na mooko maitũ.

2Hĩndĩ ĩrĩa muoyo ũcio waguũranĩirio, nĩtwawonire, na nĩkĩo twaragia ũhoro waguo tũkĩmwĩraga ũhoro wa muoyo wa tene na tene, ũrĩa warĩ hamwe na Ngai Ithe, o ũrĩa twamenyithirio ithuĩ.

3Ũndũ ũrĩa ithuĩ tweyoneire na tũkĩĩiguĩra nĩguo tũmũmenyithagia ũhoro waguo, nĩ geetha o na inyuĩ mũnyiitanĩre na ithuĩ ngwatanĩroinĩ ĩrĩa tũkoragwo nayo na Ngai Ithe na Mũũrũwe Jesũ Kristũ.

4Tũramwandĩkĩra ũndũ ũyũ nĩ geetha gĩkeno giitũ gĩtuĩke gĩkinyanĩru.

5Ũhoro ũyũ nĩguo ithuĩ twaiguire kuuma kũrĩ Mũũrũwe na nĩguo tũmũmenyithagia atĩ: Ngai nĩ ũtheri, na thĩinĩ wake gũtirĩ gatuma o na kaniini.

6Tũngiuga atĩ twĩ na ngwatanĩro naake na tũkoragwo tũikarĩĩte o ndumainĩ nĩtũraheenania na ciugo na ciĩko ciitũ.

7No tũngĩikara ũtheriinĩ, ta ũrĩa we arĩ ũtheriinĩ, tũrĩkoragwo na ngwatanĩro gatagatĩinĩ gaitũ, nayo thakame ya Mũũriũ Jesũ nĩrĩtũtheragia tũgathirwo nĩ meehia moothe.

8Tũngiuga atĩ tũtirĩ na meehia nĩkwĩheenia tũkwĩheenia, na tũtirĩ na ũhoro wa ma thĩinĩ witũ.

9No tũngiumbũrĩra Ngai meehia maitũ nĩegũtuohera na atũtherie meehia maitũ moothe, tondũ we nĩahingagia ũrĩa eeranĩire na nĩ wa kĩhooto.

10Tũngiuga atĩ tũtiĩhĩĩtie tũgũtua Ngai wa maheeni na ũhoro wake ndũrĩ thĩinĩ witũ.

Jump to: Chapter 2 →