1 Corinthians 5

Kikuyu Bible (IBUKU RĨRĨA ITHERU RĨA NGAI)

← Chapter 4 Jump to: Chapter 6 →

1Nĩkũmemerekete mũno atĩrĩ, atĩ thĩinĩ wanyu kũrĩ na ũtharia, na atĩ nĩ wa mũthemba ũtangĩoneka o na harĩ andũ a Ndũrĩrĩ, naguo nĩ atĩ mũndũ ũmwe wanyu nĩathiĩte na mũtumia wa ithe.

2Na inyuĩ-rĩ, mũgatũũra o mwĩtũũgĩrĩtie, na mũtiigue kĩeha nĩguo mũndũ ũcio wĩkĩte ũndũ ũcio eherio thĩinĩ wanyu!

3Niĩ hakwa-rĩ, o na ndatuĩka atĩ ndirĩ kuo na mwĩrĩ, ndĩ o kuo na roho; na nĩndĩkĩtie gũtuĩra mũndũ ũcio cira, ũcio wĩkĩte ũguo-rĩ, o ta ndĩ kuo,

4ngagĩtua igũrũ rĩa rĩĩtwa rĩa Mwathani witũ Jesu atĩrĩ, atĩ inyuĩ mũũnganĩte hamwe, na roho wakwa ũrĩ o ho, o na ũhoti wa Mwathani witũ Jesu ũrĩ ho-rĩ,

5mũndũ ũcio ũhaana ũguo aneanwo kũrĩ Shaitani, ũhoro wake wa kĩĩmwĩrĩ ũninwo, nĩ getha roho wake ũkahonokio mũthenya ũrĩa wa Mwathani Jesu.

6Ũhoro ũcio wanyu wa kwĩraha-rĩ, ti mwega. Kaĩ mũtoĩ atĩ gacunjĩ kanini ka ndawa ya kũimbia mũgate nĩkaimbagia kĩmere kĩu gĩothe?

7Tei ndawa ĩo ya tene, ĩthire biũ, nĩ getha mũtuĩke kĩmere kĩa mũkiyano, mũtakĩrĩ ekĩre ndawa ĩo. Nĩ gũkorũo Bathaka iitũ nĩĩrĩkĩtie gũthĩnjwo ya igongona, nayo nĩyo Kristo.

8Tondũ ũcio-rĩ, nĩtũkĩrĩage gĩathĩ, hatarĩ na ndawa ĩo ya tene ya kũimbia mũgate, ĩo ningĩ ya ũũru na ya waganu; no nĩtũkĩrĩage kĩrĩ na mũgate ũrĩa ũtarĩ mũimbie, ũguo nĩ kuuga tũkĩrĩage tũtarĩ na ũhinga, na tũrĩ na ũhoro-ũrĩa-wa-ma.

9Marũa-inĩ marĩa ndĩramwandĩkĩire ndĩramwĩrire mũtigage gũthiĩ thiritũ na ahũri-maraya,

10Ũguo ti kuuga mũthenganĩre o kũna na ahũri maraya othe a gũkũ thĩ, o na kana andũ othe a riitho iraya, na arĩa ahahanyi, kana arĩa othe ahoi-mĩhianano; amu hĩndĩ ĩo no mũkiumire gũkũ thĩ o kuuma.

11No rĩrĩ, ũrĩa ndĩrendaga kuuga ngĩandĩka nĩ atĩ mũndũ o na ũrĩkũ wĩtagwo mũrũ wa Ithe witũ-rĩ, angĩkorũo nĩ mũhũri-maraya, kana arĩ wa riitho iraya, kana e mũhoi-mĩhianano, kana e mũrumani, kana mũndũ ũrĩagwo nĩ njohi, kana mũhahanyi-rĩ, mũtigage gũthiĩ thiritũ na ũcio; ĩĩ-ni, o na mũtigage kũrĩanĩra na mũndũ ta ũcio.

12Amu-rĩ, ndĩ na bata wa kĩ njirithie andũ matarĩ a thiritũ iitũ? Inyuĩ githĩ ti arĩa a thiritũ iitũ mũcirithagia,

13nao arĩa matarĩ ayo-rĩ, magacirithagio nĩ Ngai? Mũtieheriei mũndũ ũrĩa mwaganu oime harĩ inyuĩ.

← Chapter 4 Jump to: Chapter 6 →