2 Peter 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1NO rĩrĩ, nĩkwagĩaga na anabii a mathara thĩinĩ wa andũ a Ngai a tene, o ta ũrĩa gũkagĩa na arutani a mathara thĩinĩ wanyu, arĩa makarehithie na wara morutani mahĩtanu ma gũtũma andũ more, o nginya magakaana Mwathani ũrĩa wamagũrire, na megĩragĩrĩre ũhoro wa kũũra o narua.

2Andũ aingĩ nao nĩmakarũmanagĩrĩra na maũndũ mao ma ũũra-thoni; nayo njĩra ĩrĩa ya ma ĩcambithagio nĩ ũndũ wao.

3Ningĩ, tondũ wa gũcumĩkĩra indo, nĩmagetongagia harĩ inyuĩ, makĩmũhenagia na ciugo cia ũhinga; nao ituĩro rĩrĩa maatuĩrĩirũo gwata o tene rĩtigondereire, na kũũra kwao gũtiikaraga ta kwarahĩte.

4Nĩ ũndũ-rĩ, kuona Ngai ndaacaĩire araika rĩrĩa maahĩtirie, no gũikia aamaikirie Jehanumu thĩinĩ, akĩmohithia marima-inĩ ma nduma, marangagĩrũo mũira wa magatuĩrũo cira-rĩ;

5ningĩ kuona ndaacaĩire kĩrĩndĩ kĩrĩa kĩarĩ gũkũ thĩ tene, tiga kũhonokia aahonokirie Nuhu, ũrĩa warĩ mũhunjia wa ũhoro wa ũthingu, o na andũ angĩ mũgwanja hamwe nake, hĩndĩ ĩrĩa aarehithĩirie kĩrĩndĩ kĩu gĩtetigagĩra Ngai kĩguũ kĩnene-rĩ;

6na ningĩ kuona nĩaatũmire matũũra ma Sodomu na Gomora macinwo, magĩtuĩka o mũhu, agĩkĩmatuĩra cira atĩ maanangwo biũ, nĩguo ituĩro rĩu rĩao rĩtuĩke rĩa gũkaania andũ arĩa mangĩikaraga matetigĩrĩte Ngai thutha ũcio-rĩ;

7O na ningĩ kuona atĩ nĩaahonokirie Loti, mũndũ ũrĩa mũthingu waiguithĩtio kĩeha nĩ mĩtugo ya ũũra-thoni ya andũ acio aaganu-rĩ;

8(nĩ ũndũ rĩrĩa mũndũ ũcio mũthingu aaikaranĩtie nao, ngoro yake thingu nĩyaiguithagio ruo mũthenya o mũthenya nĩ kuonaga na kũiguaga maũndũ mao matarĩ ngererero);

9hakĩrĩ ũguo-rĩ, Mwathani nĩoĩ kũhonokia andũ arĩa mamwĩamũrĩire moime magerio-inĩ, na gũikarithia andũ arĩa aaganu makĩherithagio o nginya rĩrĩa mũthenya ũrĩa wa cira ũgakinya;

10o na makĩria andũ arĩa mathiaga na mĩthiĩre ya kĩĩmwĩrĩ, makĩĩriragĩria maũndũ marĩa marĩ magigi, na makanyararaga wathani o wothe. Andũ acio ndũrĩka na eathi matirĩ rũbutu makĩruma anene arĩa marĩ na riri,

11o na gwatuĩka atĩ araika, arĩa mamakĩrĩte ũhoro-inĩ wa hinya na ũhoti, matimarumaga makĩmathitaka kwĩ Mwathani.

12No andũ acio-rĩ, mahaanaine na nyamũ itarĩ na meciria, iria iciaragwo ikĩrĩ o nyamũ cia kũgwatio na kũninwo; nĩmarumanaga ũhoro-inĩ wa mohoro marĩa matoĩ, na nĩ kũninwo makaninwo kũna nĩ ũndũ wa ũguo mathũkĩte;

13naguo cira ũcio mũũru ũkamakinyĩrĩra, ũtuĩke mũcara wa ũũru ũcio matũire mekaga. O nĩo monaga atĩ kũrĩwo o mũthenya barigici nĩ ũndũ wĩ gĩkeno. Thĩinĩ wa maruga mao ma kĩendano no imeni na ũũgũ, na nĩmang’eng’erekaga ũũru hĩndĩ ĩrĩa marĩanagĩra hamwe na inyuĩ.

14Me na maitho maiyũirũo nĩ rũitho rũa ũtharia, makaremwo nĩ kwĩrigĩrĩria wĩhia. Nĩ kũgucĩrĩria magucagĩrĩria andũ arĩa matakindagĩria ngoro; me na ngoro imenyeretio gũcumĩkĩra, na nĩ ciana igwatĩtwo nĩ kĩrumi.

15Gũtiga nĩmatigĩte njĩra ĩrĩa nũngarũ, makora, magakĩgerera njĩra ĩrĩa ya Balaamu wa Beori, ũrĩa wendaga mũno kũheo mũcara ũrĩa wa gwĩka ũũru.

16Ĩndĩ nĩaakaanirio nĩ ũndũ wa ihĩtia rĩake, ndigiri ĩtoĩ kwaria ĩgĩkĩaria na mũgambo wa mũndũ, ĩkĩriĩra ũrimũ wa mũnabii ũcio.

17Andũ acio-rĩ, nĩ ithima itarĩ maĩ, na ibii iria itwaragwo nĩ kĩhuhũkanio, nao no ũirũ wa nduma maigĩirũo.

18Tondũ rĩrĩ, maaragia mohoro manene ma kwĩĩkĩrĩra, makagucagĩrĩria na merirĩria mao ma mwĩrĩ, o na ũũra-thoni, andũ arĩa maraambĩrĩria kũhonoka kuuma kũrĩ arĩa matũire mahĩtagia.

19Magakĩmeragĩra atĩ nĩmekũrutwo ũkombo-inĩ, nao ene no matũire marĩ o ngombo cia ũhoro wa kũbutha; amu-rĩ, ũndũ ũrĩa mũndũ atoretio nĩguo nĩatuĩkaga ngombo ya ũndũ ũcio ũmũtoretie.

20Nĩ ũndũ-rĩ, maakorũo nĩmahonokete maũndũ-inĩ ma gũkũ thĩ marĩa marĩ magigi nĩ ũndũ wa kũmenyana na Mwathani witũ na Mũtũhonokia Jesu Kristo-rĩ, mangĩgĩcoka kũgwatwo nĩmo rĩngĩ na matorio nĩmo, mĩtũũrĩre yao ya kũrigĩrĩria no ĩthũke kũrĩ ĩrĩa ya mbere.

21Nĩ ũndũ-rĩ, wega wao no matangĩamenyire njĩra ya ũthingu, gũkĩra hĩndĩ ĩrĩa maarĩkia kũmĩmenya, macoke kũhutatĩra watho ũrĩa mũtheru marutĩtwo.

22Andũ acio-rĩ, nĩmakinyĩrĩirũo nĩ ũhoro wa thimo ĩrĩa ya ma, atĩrĩ, Ngui nĩĩcokagĩrĩra matahĩko mayo, nayo ngũrũe ya mũgoma ĩrĩa ĩthambĩtio ĩcokaga kwĩgaragaria mũtondo-inĩ.

← Chapter 1 Jump to: Chapter 3 →