Colossians 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to:

1Inyuĩ aathani-rĩ, ĩkagai ngombo cianyu maũndũ marĩa marĩ kĩhooto, na marĩa merekereire, mũkĩmenyaga atĩ o na inyuĩ mwĩ na Mwathi wanyu wĩ kũrĩa Igũrũ.

2Rũmanagĩriai kũhoya na kĩyo, na mũhoyage mwĩiguĩte, mũgĩcokagĩria Ngai ngatho,

3na ningĩ mũtũhoyagĩre o na ithuĩ, atĩ Ngai atũtiirũrĩrie riigĩ nĩguo tũhunjanagĩrie Ũhoro wake, na tũheanage ũhoro wa hitho ũrĩa wa Kristo, o ũcio ndũire njohetwo nĩ ũndũ waguo;

4nĩguo ndĩũtaũranagĩre na mĩario o ĩrĩa njagĩrĩirũo nĩ kwaria nayo.

5Thiagai na mĩthiĩre ya ũũgĩ hĩndĩ ĩrĩa mũkoragwo mwĩ na andũ arĩa matarĩ a thiritũ iitũ, mũtegũte ihinda rĩrĩa rĩagĩrĩru rĩa gwĩkaga wega.

6Na mũkĩaria-rĩ, aragiai hingo ciothe na mĩario o ĩrĩa ĩrĩ na Wega wa Ngai, ĩtuĩke ta ĩĩkĩrĩtwo cumbĩ, nĩ getha mũmenyage ũrĩa mũngĩcokagĩria mũndũ o mũndũ ũhoro o ũrĩa ekũmũũria.

7Mohoro makwa mothe nĩmũkamenyithio nĩ Tukiko, mũrũ wa Ithe witũ ũrĩa twendete mũno, o we ndungata ya kwĩhokeka na ngombo ya Mwathani hamwe na niĩ

8Nĩwe ndatũma kũrĩ inyuĩ nĩ ũndũ wa ũhoro ũyũ kĩũmbe, atĩ mũmenyithio wega ũrĩa tũtariĩ, na ningĩ atĩ amũũmĩrĩrie ngoro.

9Megũũka na Onesimo, mũrũ wa Ithe witũ ũrĩa wĩhokekete, na ũrĩa twendete mũno, nake nĩ mũndũ wanyu. Acio nĩo makamũmenyithia ũhoro wa ũrĩa maũndũ mothe marathiĩ gũkũ.

10Nĩmwageithio nĩ Arisitariko ũrĩa twohetwo hamwe nake, o na Mariko, mũihawe wa Baranaba. (Nĩwe mwathĩrĩirũo ũrĩa mũkamwĩka; angĩũka-rĩ, mũkũngũĩrei.)

11Ningĩ mũkageithio nĩ Jesu ũrĩa wĩtagwo Jusito. Acio nĩo oiki a thiritũ ya andũ arĩa maruaga tũrutithanagia wĩra nao wa ũthamaki wa Ngai: nao nĩo matũire manyũmagĩrĩria.

12Ningĩ nĩmwageithio nĩ Epafara, ũrĩa wanyu, nake nĩ ngombo ya Kristo Jesu. Ũcio nĩegiaga hingo ciothe nĩ ũndũ wanyu mahoya-inĩ make, nĩ getha mũikarage mwĩhandĩte ta andũ agima, na mũkinyanĩire wega maũndũ-inĩ mothe marĩa Ngai endaga.

13Amu ndĩ mũira wake wa ũrĩa enogagia mũno nĩ ũndũ wanyu, na andũ a Laodikia, o na arĩa matũire Hierapoli.

14Nĩmwageithio nĩ Luka, mũthondekani ũrĩa mwende mũno, o na Dema.

15Geithiai ariũ a Ithe witũ arĩa matũire Laodikia, o na Numifa, o na andũ a kanitha ũrĩa wĩ kwao mũciĩ.

16Na rĩrĩ, mwarĩkia gũthomerũo marũa maya, matũmei magathomerũo andũ a kanitha wa Laodikia o nao; o ũndũ ũmwe na inyuĩ mũthome marũa marĩa makoima Laodikia.

17Na mwĩre Arikipo atĩrĩ, Wĩmenyagĩrĩre ũhingie wega wĩra wa gũtungatanĩra ũrĩa waheirũo nĩ Mwathani.

18Ngeithi ciakwa, niĩ Paulo, nĩ ici ndaandĩka na guoko gwakwa mwene. Ririkanagai ũrĩa njohetwo. Wega wa Ngai ũroikaraga na inyuĩ.

← Chapter 3 Jump to: