Ezra 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1Na rĩrĩ, hĩndĩ ĩrĩa thũ cia Ajuda na Abenjamini ciaiguire atĩ andũ arĩa maatahĩtwo nĩmaraakĩra Jehova, Ngai wa Isiraeli, hekarũ,

2igĩthengerera Zerubabeli, o na anene a nyũmba cia maithe ma andũ acio, ikĩmera atĩrĩ, Rekei twake twĩ hamwe na inyuĩ; nĩ ũndũ tũrongoragia Ngai wanyu o ta ũguo inyuĩ mwĩkaga; na nĩwe tũtũire tũrutagĩra magongona gwata o matukũ ma Esari-hadoni, mũthamaki wa Ashuri, o ũcio watwambatirie agĩtũrehe gũkũ.

3No rĩrĩ, Zerubabeli na Jeshua, o na anene a nyũmba cia maithe ma andũ a Isiraeli, magĩciĩra atĩrĩ, Inyuĩ mũtirĩ ho o na hanini ũhoro-inĩ witũ wa gwakĩra Ngai witũ nyũmba; no rĩrĩ, ithuĩ tũũnganĩte haha, ithuene nĩ ithuĩ tũgwakĩra Jehova Ngai wa Isiraeli nyũmba, o ta ũrĩa Kurusu, mũthamaki wa Perisia, aatwathire.

4Hĩndĩ ĩo andũ acio maatũire bũrũri ũcio makĩagia andũ a Juda hinya, makĩmanyarira rĩakĩro-inĩ,

5o na makĩhaka aheani kĩrĩra nĩguo mathũkie wĩra wao matukũ mothe ma Kurusu, mũthamaki wa Perisia, nao magĩĩka ũguo o nginya hĩndĩ ĩrĩa gwathamakirũo nĩ Dario, mũthamaki wa Perisia.

6Ningĩ hĩndĩ ĩrĩa Ahasuerusu aarĩ mũthamaki, o aagwata gũthamaka-rĩ, andũ acio magĩkĩandĩka marũa ma gũthitaka andũ acio maatũũraga Juda na Jerusalemu.

7Na rĩrĩ, matukũ ma Aritashashita, Bishilamu na Mithiredathu na Tabeeli, na arĩa angĩ a thiritũ yake, makĩandĩkĩra Aritashashita, mũthamaki wa Perisia, marũa; naguo mwandĩko wa marũa macio ũkĩandĩkwo na mwandĩkĩre wa Asuriata, o na ciugo ciamo ciarĩ o cia rũthiomi rũa Asuriata.

8Nake Rehumu, mũnene wao wa cira, na Shimushai mwandĩki wake wa marũa, magĩkĩandĩkĩra Aritashashita, mũthamaki, marũa ma gũthitaka andũ a Jerusalemu, ũũ:

9Marũa maya maandĩkwo nĩ niĩ Rehumu, mũnene wa cira, o na Shimushai, mwandĩki-marũa, o na andũ arĩa angĩ a thiritũ yao, nao nĩo Adinai, na Aafarisathuki, na Ataripeli, na Aafarisi, na Aarikevi, na Ababuloni, na Ashushaniki, na Aadehai, na Aaelami,

10o na ndũrĩrĩ iria ingĩ iria Osinapari, mwathani mũnene mwĩkĩrĩre, aarehithirie gũkũ agĩciiga itũũra rĩa Samaria, o na bũrũri ũyũ ũngĩ wĩ mũrĩmo ũyũ wa rũũĩ rũa Farati, (na ciugo ingĩ ta icio.)

11Ĩno nĩyo kobi ya marũa marĩa maatwarithĩirio Aritashashita, mũthamaki: Atĩrĩrĩ, nĩ ithuĩ ndungata ciaku, o ithuĩ arĩa tũtũũraga mũrĩmo ũyũ wa rũũĩ rũa Farati, (na ciugo ingĩ ta icio.)

12Nĩkũmenyeke nĩwe, wee mũthamaki witũ, atĩ Ayahudi arĩa maambatire makiuma harĩ wee, nĩmatũkorete gũkũ Jerusalemu, na nĩmaraaka itũũra rĩu rĩa ũremi, na rĩũru; na rĩu nĩmarĩkĩtie gwaka thingo ciarĩo, o na gũcokereria itina ciarĩo kũrĩa ciathũkite.

13Nĩgũkĩmenyeke nĩwe, wee mũthamaki witũ, atĩ itũũra rĩrĩ rĩngĩakwo, o na thingo ciarĩo irĩkio, andũ arĩo matigetĩkĩra kũruta mũhothi wa mũthamaki, kana igoti rĩa ndũire, o na kana rĩa njĩra; na thutha-inĩ ũhoro ũcio nĩũgatũma mbia cia athamaki inyihe.

14Na rĩrĩ, tondũ ithuĩ tũtũire tũrĩaga cumbĩ wa nyũmba ya mũthamaki, na tũtiagĩrĩirũo nĩ gũikara o ro ũguo tũkĩonaga mũthamaki witũ akĩaga gũtĩwo-rĩ, nĩkĩo twarekania tũkũmenyithie ũhoro ũcio, wee mũthamaki witũ,

15nĩ getha ũhoro ũrĩa wandĩkĩtwo ibuku-inĩ rĩa mathoguo rĩa maũndũ ma ihinda rĩao ũtuĩrio wega; na nĩũrĩona ũhoro wao ibuku-inĩ rĩu rĩa maũndũ macio ma ihinda rĩu, na ũmenye atĩ ti-itherũ itũũra rĩrĩ rĩtũũraga rĩrĩ iremu, na rĩkagera athamaki, o na mabũrũri marĩa mathamakagwo nĩo, ngero njũru; ningĩ andũ arĩo kuuma o tene nĩmatũire mahatagĩrĩria andũ akuo maamũkane, naguo ũndũ ũcio nĩguo watũmire itũũra rĩrĩ rĩanangwo biũ.

16Na rĩu ũrĩa tũgũgĩkũmenyithia, wee mũthamaki witũ, nĩ atĩ itũũra rĩrĩ rĩngĩakwo, o na thingo ciarĩo irĩkio-rĩ, ũndũ ũcio nĩũgatuĩka wa gũtũma wage gathaka o na kanini mũrĩmo ũyũ wa rũũĩ rũa Farati.

17Nake mũthamaki wao agĩkĩandĩka marũa agĩtwarithĩria Rehumu, mũnene ũcio wa cira, o na Shimushai, mwandĩki wake wa marũa, o na andũ arĩa angĩ a thiritũ yao, arĩa maatũire Samaria o na bũrũri ũrĩa ũngĩ ũrĩ mũrĩmo ũcio wa rũũĩ rũa Farati, akĩmacokeria ũhoro akiuga atĩrĩ, Mũrogĩa na thayũ! (Na ciugo ingĩ ta icio.)

18Atĩrĩrĩ, marũa marĩa mwatũrehithĩirie-rĩ, nĩmathomeirũo o mbere yakwa na ngataũrĩrũo ũhoro wamo mũno.

19Na tondũ ũcio nĩndaathanire, naguo ũhoro ũcio nĩũtuĩrĩtio, na nĩkuonekete atĩ ti-itherũ gwata o tene, kũu itũũra rĩu, andũ arĩo nĩmaatũire mokagĩrĩra athamaki; na atĩ ũhoro wa ũremi, na wa kũhatĩrĩria andũ maamũkane, nĩwonekaga kuo.

20Ningĩ mahinda mamwe nĩkwagĩaga athamaki me hinya mũno maathamakaga Jerusalemu, na magathamaka bũrũri wothe ũrĩa wĩ mũrĩmo ũcio wa rũũĩ rũa Farati, na makarutagĩrũo mũhothi wa mũthamaki, o na igoti rĩa ndũire, o na rĩa njĩra.

21Tondũ ũcio athanai mwĩre andũ acio matige wĩra ũcio, o narĩo itũũra rĩu nĩrĩtige gwakwo, o nginya hĩndĩ ĩrĩa ngacoka gwathana ’heane ũhoro warĩo.

22Na mwĩmenyerere mũtikagĩe na thiea ũhoro-inĩ ũcio; kaĩ maũndũ ma kũgerithia athamaki ngero megũkĩrekwo maingĩhe nĩ ũndũ kĩ?

23Na rĩrĩ, kobi ya marũa ma Aritashashita, mũthamaki, yathomerũo Rehumu, na Shimushai mwandĩki wake wa marũa, o na andũ a thiritũ yao-rĩ, magĩgĩthiĩ Jerusalemu na ihenya, magĩkinya harĩ Ayahudi, makĩmatigithia kũruta wĩra ũcio na ũrũme na hinya.

24Hĩndĩ ĩo wĩra ũcio warutagwo wa nyũmba ya Ngai ĩrĩa ĩĩ kũu Jerusalemu ũgĩgĩtigwo; naguo ũgĩtiga kũrutwo o nginya mwaka wa kerĩ ĩrĩa Dario, mũthamaki wa Perisia, aakorirũo athamakĩte.

← Chapter 3 Jump to: Chapter 5 →