Habakkuk 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1ŨYŨ NĨGUO ũhoro mũritũ ũrĩa waguũrĩirio Habakuku, ũrĩa mũnabii.

2Ĩ Jehova, nĩ nginya hĩndĩ ĩ ngũtũũra ngũkayagĩra na ndũnjigue? Ndũire ngũkayagĩra nĩ ũndũ wa maũndũ ma ũhinya, nawe ũkaaga kũhonokania.

3Ũtũmaga ndĩonere gũgĩĩkwo ũũru, na ũkandekereria nyonage maũndũ ma ũremi nĩ ũndũ kĩ? Nĩ ũndũ-rĩ, ũhoro wa gũtahwo na wa ũhinya nocio itũire mbere yakwa, na kũgurumũkanĩrũo na ngiano, o na ngarari.

4Tondũ ũcio watho nĩ mwagithie hinya, o namo matuĩro ma cira makaaga kũhingio, amu andũ arĩa aaganu nĩmathiũrũrũkĩirie arĩa athingu, na nĩ ũndũ ũcio matuĩro ma cira makahotomio.

5Atĩrĩrĩ, ta rorai ndũrĩrĩ-inĩ, na mwĩonere ũhoro wacio, na mũkĩmake mũno mũno; nĩ ũndũ-rĩ, he wĩra ndĩraruta matukũ-inĩ manyu, na mũtiĩtĩkia atĩ nĩndĩraũruta o na mũngĩheo ũhoro waguo.

6Nĩ ũndũ-rĩ, nĩndĩraarahũra Akalidei, na nĩ rũrĩrĩ rũĩĩ mũno, na rũhiũ ma, na nĩruo rũgeraga thĩ yothe o ta ũrĩa yaramĩte, rũkegwatĩre kũndũ gwa gũtũũrũo gũtarĩ kwaruo.

7Nĩ andũ a gũtuana nda, na nĩ a kũmakania mũno, ningĩ nĩ gwĩtuĩra metuagĩra cira, o na metĩaga, o ta ũrĩa meyendeire.

8Mbarathi ciao irĩ ihenya gũkĩra ngarĩ, nao nĩ eĩ gũkĩra njũi iria icangaga kĩhwaĩ-inĩ; nao andũ ao arĩa mathiaga mahaicĩte mbarathi nĩ etĩi mũno; ĩĩ, ti-itherũ andũ ao arĩa mathiaga mahaicĩte mbarathi maroima kũndũ kũraya, makahanyũka mũno ta mombũkĩte o ta nderi ĩkĩhanyũkĩra ũrĩani.

9Nao othe mokĩte makarehe maũndũ ma ũhinya, na makerekeria mothiũ mao na mbere na kũrĩa rũhuho rũa irathĩro rũhurutanagĩra, na magataha andũ aingĩ o ta mũthanga.

10Ĩĩ, ti-itherũ nĩ kũnyarara manyararaga athamaki, o nao anene magatuĩka o ta ũndũ wa gũthekererũo nĩo; ihingo iria ciakĩtwo nũmu macimenagĩrĩria o ro ũguo, nĩ ũndũ maitithagia ihumbu nene cia tĩri rũirigo-inĩ rũacio, magacitoria.

11Thutha wa ũguo magacoka gwĩthiĩra na mbere na ihenya o ta rũhuho, na magakĩrĩrĩria kwagarara watho magatuĩka ehia, tondũ matuĩte atĩ hinya wao nĩguo ngai yao.

12Atĩrĩrĩ, Jehova Ngai wakwa, wee Ũrĩa wakwa Mũtheru, githĩ wee ndũtũire ũrĩ o kuo kuuma o tene na tene? Tondũ ũcio tũtigakua. Atĩrĩrĩ, Jehova, wee nĩũmatũmĩte a kũhinganĩria matuĩro ma cira; wee Rũaro rũa Ihiga, nĩwe ũmethurĩire nĩguo maherithanie.

13Wee wĩ maitho matheru marĩa matangĩcũthĩrĩria ũũru, o na kana merorere ũmaramari; nĩ kĩ gĩgĩtũmaga wĩrorere andũ arĩa magarũkaga andũ arĩa angĩ na ũrĩa-ng’ũũrũ, ta wĩtĩkĩrĩte ũhoro ũcio mekaga, o na ũgekirĩra ki hĩndĩ ĩrĩa mũndũ mwaganu ekũmeria mũndũ ũrĩa wĩ mũthingu kũmũkĩra amũnine;

14o na ũgatua andũ ta marĩ ciũngũyũ cia iria-inĩ, o na kana nyamũ iria ithiaga ikurumĩte, iria itarĩ mũciathi?

15Nĩ kũnyita mamanyitaga othe na ndwano, na makamagwatia na rũtego rũao rũa ndigi, o na makamacokereria wabu-inĩ yao ĩrĩa ya kũmagucũrũria; na tondũ ũcio nĩ akenu, na magacanjamũka ngoro.

16Tondũ ũcio rũtego rũu rũao rũa ndigi-rĩ, nĩmarũrutagĩra igongona, o nayo wabu ĩo yao ya kũgucũrũrania makaũcinĩra ũbumba, tondũ indo icio nĩ cio itũmĩte igai rĩao rĩongerereke, na igatũma irio ciao ciingĩhe.

17Tondũ wa ũhoro ũcio-rĩ, anga nĩ gũkĩrĩrĩria megũkĩrĩrĩria gũtegana na rũtego rũu rũao rũa ndigi, na makagĩta o gũtũũra moragaga andũ a ndũrĩrĩ, matekũiguanĩra tha?

Jump to: Chapter 2 →