Jonah 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to:

1No rĩrĩ, ũhoro ũcio nĩwaiguithirie Jona ũũru mũno, nake akĩrakara.

2Akĩhoya Jehova akiuga atĩrĩ: Ndakũhoya atĩrĩ, wee Jehova, githĩ to ũguo ndoigire, o rĩrĩa itoimĩte gwitũ? Na nĩkĩo ndahiũhire kũũrĩra Tarishishi: amu-rĩ, nĩndoĩ atĩ wee ũrĩ Mũrungu o ũrĩa muuma-andũ, na ũrĩ wa matha maingĩ, na ndũhiũhaga kũrakara, o na ũrĩ wa ũtugi mũingĩ, ũkericũkagwo ũgatiga gwĩka andũ ũũru.

3Tondũ ũcio, rĩu, Jehova, ngũgũthaitha ũkĩndute muoyo; tondũ nĩkwagĩrĩire ngue kũrĩ ndũũre muoyo.

4Nake Jehova akĩũria atĩrĩ, Nĩ wega weka, warakara?

5Hĩndĩ o ĩo Jona akiuma itũũra rĩu, agĩthiĩ gũikara thĩ hakuhĩ narĩo mwena wa irathĩro, akĩĩakĩra gathũnũ, agĩikara thĩinĩ wako egitĩtie na kĩĩruru gĩako mũira wa one ũrĩa itũũra rĩu rĩgwĩkwo.

6Nake Jehova Ngai nĩaathĩrĩirie rũũngũ, agĩtũma rũtambĩrĩre igũrũ rĩa hau Jona aarĩ, nĩguo rũtuĩke rũa kũmwĩkĩrĩra kĩĩruru mũtwe-inĩ wake, nĩ getha athĩnũrũo thĩna ũcio wake. Nake Jona agĩgĩkena gĩkeno kĩnene nĩ ũndũ wa rũũngũ rũu.

7No rĩrĩ, kwaroka gũkĩa mũthenya ũyũ ũngĩ, Ngai agĩathĩrĩria kĩgunyũ, nakĩo gikĩrĩa rũũngũ rũu, rũgĩkĩhoha.

8Na gũgĩtuĩka atĩrĩ, atĩ riũa rĩaratha, Ngai agĩathĩrĩria rũhuho ruume na irathĩro rũrĩ na ũrugarĩ mũnene; nake Jona agĩatio nĩ riũa mũtwe, kinya akĩringĩka, akĩĩhoera etĩkĩrio akue, akiuga atĩrĩ, Nĩkwagĩrĩire ngue kũrĩ ndũũre muoyo.

9Nake Ngai akĩũria Jona atĩrĩ, Nĩweka wega, warakara nĩ ũndũ wa rũũngũ rũu? Nake agĩcokia Ĩĩ-ni, nĩnjagĩrĩirũo nĩ kũrakara o kinya nyende gũkua.

10Nake Jehova akiuga atĩrĩ, Wee-rĩ, nĩũiguĩrĩire rũũngũ tha, o rũu ũtekũrutĩire wĩra, kana ũgatũma rũkũre; o rũu rũratambire na ũtukũ o ũmwe, na rũrathira na ũtukũ o ro ũmwe:

11niĩ na niĩ-rĩ, githĩ ndiagĩrĩirũo nĩ kũiguĩra Nineve tha, itũũra inene ũũ, rĩrĩ rĩĩ na andũ gũkĩra ngiri igana rĩa ngiri mĩrongo ĩĩrĩ thĩinĩ warĩo, arĩa matangĩmenya gũkũũrana guoko kwa ũrĩo kana kwa ũmotho; o na ningĩ rĩĩ na mahiũ maingĩ?

← Chapter 3 Jump to: