Titus 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to:

1MARIRIKANAGIE atĩ maathĩkagĩre anene na andũ arĩa maathanaga, na mamaiguage, na maikarage mehaarĩirie kũruta wĩra o wothe mwega,

2ningĩ matikanacambie mũndũ, kana mogitanage, no nĩmatuĩke acayanĩrĩri, na monagie andũ othe mĩtugo ya ũhoreri.

3Nĩ ũndũ kwarĩ hĩndĩ o na ithuĩ twarĩ akĩgu, na twarĩ aremi, na tũkahenekaga; twarĩ ngombo ciohetwo nĩ merirĩria moru na maũndũ ma gwĩkenia ma mĩthemba mĩingĩ, na twatũire tũiganagĩra muku na tũkaiguanagĩra ũiru, ningĩ tũgathũũrũo, o na tũgathũũrana o mũndũ na mũndũ ũrĩa ũngĩ.

4Ĩndĩ rĩrĩa ũtugi wa Ngai Mũhonokia witũ naguo wendani ũrĩa endete andũ naguo ciaguũkire-rĩ,

5nĩ kũhonokia aatũhonokirie, ti tondũ wa ciĩko iria twekaga ithuene cia gwĩtua athingu, no nĩ ũndũ wa tha ciake, nĩ gũtũthambia o gũthambio kũrĩa gũtũmaga mũndũ aciarũo rĩngĩ na erũhio na Roho Mũtheru.

6Na nĩ Roho ũcio aatũitĩrĩirie na ũtana na ũndũ wa Jesu Kristo Mũhonokia witũ,

7nĩ getha tũtuwo athingu nĩ ũndũ wa Wega wake, na agai a gũkagaĩrũo muoyo ũrĩa ũtagathira, kũringana na ũrĩa tũtũire tũwĩrĩgĩrĩire.

8Ũhoro ũcio nĩ wa kwĩhokeka; ngũkĩenda waragie ũhoro wa maũndũ macio ũmagwatĩirie, nĩ getha andũ arĩa metĩkĩtie Ngai mekagĩre kĩyo gĩa kwĩmenyeria kũrutaga mawĩra mega. Maũndũ macio nĩ mega na nĩ ma kũguna andũ.

9No rĩrĩ, themaga maũndũ marĩa moranganagio na ũrimũ, na ũhoro wa njiarũa, na ngarari, na kũrũĩra maũndũ ma watho; nĩ ũndũ matirĩ na uumithio marehage, na nĩ ma tũhũ.

10Na ha ũhoro wa mũndũ wĩtĩkĩtie ũrutani mũhĩtanu-rĩ, warĩkia kũmũkaania hĩndĩ ya mbere na ya kerĩ, regana nake:

11ũkĩmenyaga atĩ mũndũ ũrĩa ũtariĩ ũguo nĩ mũgariũkanu na akahĩtia, nake nĩ gwĩtuĩra etuĩrĩire cira atĩ nĩ mwĩhia.

12Atĩrĩrĩ, ndatũma Aritema kana Tukiko kũrĩ wee, geria na kĩyo gũũka kũrĩ niĩ o kũrĩa Nikopoli: tondũ nĩkuo nyonete arĩ wega atĩ njikare hĩndĩ ya heho.

13Zena ũrĩa wakiri, na Apolo-rĩ, ũmohere rũgendo na kĩyo, nĩguo matikae kwaga kĩndũ.

14Nao andũ aitũ-rĩ, nĩmakĩĩmenyerie kũrutaga mawĩra mega, nĩguo mateithanagie kwagĩa na mabata marĩa matangĩtigĩka, nĩ getha matigatuĩke ta mathatĩte ũhoro-inĩ wa gwĩkaga wega.

15Andũ arĩa othe tũrĩ nao nĩmaakũgeithia. Wee nawe ũgeithie andũ othe arĩa matwendete, me rũmwe na ithuĩ ũhoro-inĩ wa gwĩtĩkia. Wega wa Ngai ũrogĩa na inyuĩ inyuothe.

← Chapter 2 Jump to: