1 Timothy 6

Kalenjin 2019 (Bukuit Ne Tilil)

← Chapter 5 Jump to:

1Ingoiityi otwogik alak tugul che ratotiin kole nyoljin kiptainikwak teegisto tugul, si ma kichup kainetap Kamuktaindet ak kaneetisyet.

2Ak icheek che tinyei kiptainik che iyanotin, ko mat kosas icheek, amu tupchosyek; ago kaigai koot icheek, amu icheeget che nyooru toreteet ko che iyani ak ko chamanik. Ineet ng'aleechu ak iteechi.

3Ngo neeti chii age tugul kaneetisyet ne teer, ama chamei ng'aleek che po iman, ng'aleegap Kiptaiyandennyo Jeso Kristo, ak kaneetisyet ne namegei ak atebeet ne po kaiyweisyetap Kamuktaindet;

4komeenei, ama naei kiy, ago tinyei myando agobo teebutik ak tiiyasyegap ng'aleek che punu ng'etkonda, suryet, chemerereet, kabwaatutik che yaacheen,

5pooryosyegap piik che ki kong'emogis kabwaatutikwak, ak che ki kirebe imanit, koleen kayweet ne kiywei Kamuktaindet ko ooreet ne kibore.

6Ago kayweet ne kiywei Kamuktaindet kobooto yametapkei eng' tuguuk che ki tinyei, ko poroteet ne oo:

7amu ki ma kiibu kiy konyo ng'wony, ama kimuuchi keip kiy komanda eng' ng'wony;

8ago ki tinyei amitwogik ak ngoroik; yamech chooto.

9Ago icheek che machei koek mogoreek kobutyin yoomseet ak mesteet ak maguutik che chaang' che perberen, che ibu ng'wanindo, che lugui piik koba ng'emisyet ak luseet.

10Amu chametap silingisyek ko tigityot agenge ne po yaitwogik alak tugul. Kigong'asyigei piik alage kot kometo kayaneet ak ki kotorgei eng' aragenosyek che chaang'.

11Ago inyee, ee, chiitap Kamuktaindet, mwee tuguuchuuto; ak isup imanda, ak kayweet ne kiywei Kamuktaindet, kayaneet, chamyet, muitaet, mutyonet.

12Yai lugeet ne myee ne po kayaneet, nam saboondo ne po koigeny, nooto ne ki kiguurchin, ak ki ing'aany ng'ang'et ne myee eng' taitap paorinik che chaang'.

13Kang'atiin anyun eng' taitap Kamuktaindet, ne riibei tuguuk tugul kosapcho, ak eng' taitap Kristo Jeso, ne kibaoryan ng'ang'et ne myee eng' taitap Pontio Pilato;

14ale iriip ng'atuutyet amanyoor peruut, ne ma kimuuchi keger kong', agoi tagunetap Kiptaiyandennyo Jeso Kristo:

15ne tuun iboortoi eng' peetuusyekyik, ne ineendet ne iberuurot ak ko Kamuktaindet ineegei, Laitoryat ne po laitorinik, ak Kiptaiyat ne po kiptainik;

16ne tinyei ineegei saboondap koigeny, ne menyei eng' lapkeiyet ne ma kimuuchi keriikyi; ne tomo kogeer chii, amaimuuchi kogeer: ingobunji ineendet teegisto ak kamuktaet koigeny. Amen.

17Ng'at mogoreek che po peetuusyechu, si ma menio, anan konde kamang'unennywa mogornatosyek che ma tonondos, ago eng' Kamuktaindet ineendet ne koonech tuguuk tugul eng' aiyebindo si kobiit keboiboitune;

18ile koyai ne myee, si kobiit koek mogoreek eng' poisyonik che myach, si kochobogis kogoito, koyomogei ak alak;

19kogonorchigei lumdaet ne myee, agobo peetuusyek che pwoonei, si kobiit konam saboondo nooto ne po iman.

20Ee, Timoteo, riip anyun nooto kigegoonin, istoegei ng'aleek che ma namegei ak ooreetap Kamuktaindet, ak kabeletapkei ne po naet, nooto kiguure eng' lembech naet;

21ne kigosup alage ak ki kochiliil eng' kayaneet. Ingotep myeeindo kobooten.

← Chapter 5 Jump to: