2 Chronicles 35

Kalenjin 2019 (Bukuit Ne Tilil)

← Chapter 34 Jump to: Chapter 36 →

1Ak kiriipchi `Josiah Kamuktaindet ne Toroor paska eng' Jerusalem; ak kieny aarwetap paska eng' peetuutap taman ak ang'wan ne po arawet ne po tai.

2Ak ki inde tiisik riipsosyekwak, ak ko ki il icheek eng' otisyetap kootap Kamuktaindet ne Toroor.

3Ak ki leenji Lawiik che ki ineeti Israel tugul, che kitiliileen eng' Kamuktaindet ne Toroor, Onde moinget ne tiliil koot ne ki teech Solomon weeriitap Daudi laitoryatap Israel; ma koegu mileet ne mi tigigoikwok: oot anyun Kamuktaindet ne Toroor Kamuktaindeng'wong', ak piikyik Israel.

4Ak ochopkei obee kooriigap kwanisyekwok ko uu riipsosyekwok, ko uu siruutigap Daudi laitoryatap Israel, ak siruutigap Solomon, weeriinnyi.

5Ak otononse eng' ole-tiliil ko uu ole ki kipcheita kooriigap kwanisyek che po tupchosyekwok lagogap piik, ak ingobunji age tugul kebebertap kootap kwanisyegap Lawiik.

6Ak oeny aarwetap paska ak oanyinyge, ochopchji tupchosyekwok, koyai ko uu ng'olyootap Kamuktaindet ne Toroor ne ki ng'at eng' Musa.

7Ak ki igoochi `Josiah piik, che po akweetap keechiirek, aaregap keechiir ak che po ng'oroorek, kobunji chooto tugul che po kagoochinoigap Paska, kogoochi piik tugul che ki mi yooto; ki ek tugul eliphuusyek sosom, ak kiruugik eliphuusyek somok: ki po laitoryat chuuto.

8Ak ki igoochi pounikyik piik ak tisiik, ak Lawiik, kagoochinetap chamyet. Ki igoochi Hilkiah ak Zekariah ak Jehiel, che pounigap kootap Kamuktaindet, kogoochi tisiik, tuuga eliphuusyek aeng' ak pogol lo, ak eiik pogol somok koek kagoochinoigap paska.

9Ak ki igoochi Konaniah, ak Semaiah ak Nethanel, tupchosyekyik, ak Hasabia, Jeiel, ak Josabad, che eecheen eng' Lawiik, kogoochi Lawiik, tuuga eliphuusyek muut, ak eiik pogol muut, koek kagoochinoigap paska.

10Kochobok anyun otisyet ak kotononso tisiik eng' komostanywa, ak Lawiik eng' riipsosyekwak, ko uu ng'atuutyetap laitoryat.

11Ak kieny aarwetap paska, ak ki isisye tisiik korotiik che kitaachei eng' eunegap Lawiik, ak kieny Lawiik tiseiywechooto.

12Ak ki isto kagoochinoik che kibeelei, si kobiit kogoito, ko uu ole ki kipcheita kooriigap kwanisyegap lagogap piik, kogoochi Kamuktaindet ne Toroor ko uu ye siraat eng' bukuitap Musa. Ak ki yachi ko uu nooto eiik.

13Ak ki peel aarwetap paska eng' maat ko uu kayomiset: ak ki iyo kagoochinoik che tiliileen eng' tereenik, ak saburyonik, ak taaboogap kariik, ak koipchi lagok tugul che po piik kochaaktae.

14Ye ibata kochopchigei ak tisiik; amu kichirchirendos tisiik weeriigap Aron kogoitoi kagoochinoik che kibeelei ak mwanik agoi kemoi: kichopchigei anyun Lawiik, ak tisiik, weeriigap Aron.

15Ak kimi komostanywa tyeniik weeriigap Asaph, ko uu ng'atuutyetap Daudi, ak Asaph, Herman, ak Jeduthun keerindetap laitoryat; ak kimi riibiik ormariichet age tugul; ki ma ko nyoljin kobagaakta poisyennywa, amu kichopchin Lawiik tupchosyekwak tugul.

16Kichobok anyun otisyet tugul ne po Kamuktaindet ne Toroor eng' peetuunooto, si koriip paska, ak kogoito kagoochinoik che kibeelei eng' kaptisisyetap Kamuktaindet ne Toroor, ko uu ng'atuutyetap Laitoryat Josiah.

17Ki riip piigap Israel che ki mi yooto, paska, eng' peetuusyechooto, ak koriip igoortap magatiinik che ma kinde mermereek eng' peetuusyek tisap.

18Ak kitom kobiit paska age kobooch peetuusyegap maotyot Samuel ne kergei ak nooto ki kiriip eng' Israel; ama riip age tugul eng' laitorinigap Israel ne uu nooto koyai Josiah, ak tisiik, ak Lawiik, ak Judah tugul ak Israel che ki mi yooto, ak piik che ki menyei Jerusalem.

19Ki kiriip paskainooto eng' kenyiitap taman ak sisiit ne po laitornatetap Josiah.

20Kingo pata chooto tugul ko kagochop Josiah Hekaluut, kotogos Neko laitoryatap Misiri kobargei ak Karkemish ye neegitee Yufrets: ak ki wo Josiah kobargei ak ineendet.

21Ago ki iyookto Neko piik koba ole mi ineendet, koleenji, “Kiting'egei nee ak inyee, laitoryatap Judah? Ma pookyin inyee, peetuuni, ago abookyini koot ne ating'ee pooryeet; ak kang'ata Kamuktaindet achokyi: pagakte, amegirinde Kamuktaindet ne mi kobooto, si ma parin ineendet.”

22Ago ki ma cham Josiah kobagaakta ineendet, ago kiwalgei koek age si kobiit kobargei ak ineendet, ama kas ng'aleegap Neko che ki punu kutitap Kamuktaindet, ak ki nyo kobargei eng' atebweetap Megiddo.

23Ak kimwok mwogik Laitoryat Josiah; ak ki leenji laitoryat otwogikyik, Omuta; amu kagiguotena miising'.

24Komut anyun otwogikyik ineendet eng' chepkichutit, ak konde ineendet chepkichutit ne po aeng' ne ki tinyei, ak ki imut ineendet konyo Jerusalem; ak kime ak ki kitupchi kereeriisyegap kwanisyekyik. Ak ki riirchi Josiah Judah tugul ak Jerusalem.

25Ak ki riir Jeremiah agobo Josiah: ak ki riirchi Josiah tyeniik tugul che murenik ak kwonyiik, eng' riirekwak agoi kora; ak ki yachi icheek kayomiset eng' Israel: ak ogeero, siraatiin eng' bukuitap riirek.

26Ak poisyonik che ng'etunotiin che po Josiah, ak poisyonikyik che myach, ko uu che siraatiin eng' bukuitap Ng'atuutigap Kamuktaindet ne Toroor,

27ak poisyonikyik, che po tai ak che po let, ogeero, siraatiin eng' kitabuutap laitorinigap Israel ak Judah.

← Chapter 34 Jump to: Chapter 36 →