2 Peter 3

Kalenjin 2019 (Bukuit Ne Tilil)

← Chapter 2 Jump to:

1Chamanichu, parwaani asirwok nguno ko ne po aeng', ak eng' tuwai ang'eeti kabwaatutikwok che ma tinyei keniisyet ye agoonok obwaat;

2si obwaat ng'aleek che ki mwa maotik che tiliileen eng' tai, ak ng'atuutyetap Kiptaiyat ak ko Yetindet eng' piikwok che kiyooktoi:

3korook, ongen ole tuun pwoonei chombilik ak chombilisyet eng' peetuusyek che po let, che isubi maguutikwak,

4ak komwaei koleen, Mi ano arorutyetap nyonunennyi? Amu, kobooch ye kingo ruiyo kwanisyekyok, komi tuguuk tugul ko uu kiit ne ki uu kobooch taunetap yaetap ng'wony.

5Amu kwetyin icheegei koutye kole ki mi kipsengwet kobooch keny, ak ng'wony ne ki kiyai eng' peek ak komi kwenutap peek, eng' ng'olyootap Kamuktaindet;

6kimaranee peechooto ng'wonyut ne ki po peetuusyechooto, ak kilus:

7ago kipsengwet ak ng'wonyut che po nguno, ko ki kigonorchi maat eng' ng'olyoondonooto, kogonor agoi peetuutap kirwooget ak ng'emisyetap piik che ma iywei Kamuktaindet.

8Ago amoutye ng'olyoondoni, chamanichu, ole peetuut agenge eng' Kiptaiyat ko kergei ak kenyiisyek eliphuut, ak ko kergei kenyiisyek eliphuut ak peetuut agenge.

9Ma igaegei Kiptaiyat eng' arorutyennyi, ko uu ye iiti alak kagaetapkei; ago muitoi agobo okweek, ma machei kolus chii age tugul, ago machei kobwonji tugul siguunet.

10Ago tuun nyoonei peetuutap Kiptaiyat ko uu choriin; ne siirtoe kipsengwet eng' cheet ne oo, ak kochootyo tuguuk tugul che ki kiyae ng'wony ak parak eng' maat ne koroom, ak kolal ng'wonyut ak poisyonik che mi.

11Amu tuun chotoos tuguuchuuto tugul ko uu niito, ko nyolu oegu piik che uu nee eng' atebeet ne tiliil ak kayweetap Kamuktaindet,

12ogeni nyonunetap peetuutap Kamuktaindet, ak ogiili, amu nooto anyun chotoos kipsengwet eng' maat, ak kochootyo tuguuk tugul che ki kiyae parak eng' maat ne koroom?

13Ago, kigeni kipsengwet ne leel ak ng'wonyut ne leel ko uu arorutyennyi, ole menyei imanda.

14Nooto anyun, chamanichu, amu ogeni tuguuchooto, ogiilgei si tuun kenyoorwok omi eng' kaalyeet ko motinye tisya amotinye leluut eng' tainnyi.

15Ak oiit ole muitaetap Kiptaiyandennyo ko yetunet; ko uu ye kisirwak agine Paulo, tupchennyo ne kechame, ko uu utaatyet ne ki kigoochi;

16ko uu eng' paronokyik tugul ak icheek, kong'alaal agobo tuguuchuuto eng' paronochooto; ole mi tuguuk alak che uueen kiguiyo, che igunuuri che ma ingen kiy, ak che ma tononiotiin, ko uu ye itoi siruutik chuun alak, kot koit ng'emisyennywa.

17Ko okweek anyun, chamanichu, amu kaosip onai tuguuchuuto, oriipkei, si ma ichuutok kachiliiletap pistoik, ak obutye eng' tononeng'wong'.

18Ago oneryee eng' myeeindo ak naet ne po Kiptaiyandennyo ak ko Yetindennyo Jeso Kristo. Nenyi toroornatet nguno agoi koigeny. Amen.

← Chapter 2 Jump to: