3 John 1

Kalenjin 2019 (Bukuit Ne Tilil)

Jump to:

1Anee poiyot ne asirchini Gaio chamaneet ne achame eng' imanit.

2Chamanani, asaae ale iberuuroge komyee eng' tuguuk tugul ak itepte chametapkei, ko uu ye iberuurot saboondang'ung'.

3Amu ki abaibaitu miising' kingo pwa che ketupche kobaoryan agobo imaning'ung', ko uu ye iwendote imanit.

4Ma tinyei poiboiyet age ne siirei ni, ye agase keele pendoti lagokyuk eng' imanit.

5Chamanani, iyae poisyetap iman eng' kiit age tugul ne iyae agobo tupchosyek ak toek;

6che paoryani agobo chamyeng'ung' eng' kaniset. Iyae ne myee ye iyomisi eng' pandanywa ko uu ye nyolu eng' Kamuktaindet;

7amu ki pa icheek agobo Kristo, ama ip kiy eng' che ma kayanik.

8Nooto anyun kanyoljech ketaach che uu icheek, si kobiit keegu che kiboisyei kobooto icheek eng' imanit.

9Ki asirchi ng'olyoo kaniset; ago ma taachech Diotrophe, ne chamei koek ne oo eng' kwenunnywa.

10Ara anyun, ngot anyoo, anyoone abwaati poisyonikyik che yaei; mwaei ng'aleek che yaacheen che po puch agobo acheek. Ama yamei chooto kityo, mataachei ineendet tupchosyek, ak koete icheek che machei kotaach ak koonei eng' kaniset.

11Chamanani, amesup yaityet ago isup ne myee. Ineendet ne yaei ne myee ko po Kamuktaindet; ineendet ne yaei yaityo ko tomo kogeer Kamuktaindet.

12Kigobaoryan piik tugul agobo Demetrios, ak kobaoryani imanit agine. Ee, kibaoryani agacheek; ak ingen ile po iman paornatennyo.

13Katinye tuguuk che chaang' che katasirun, ago ma mache asirunenen wino ak kalamit:

14ago amang'u ageerin ko neegit, ak keng'alaal togoch eng' togoch.

15Ingotep kaalyeet kobooten. Igatin choronok. Igat choronok eng' kainaikwak.

Jump to: