Daniel 12

Kalenjin 2019 (Bukuit Ne Tilil)

← Chapter 11 Jump to:

1Ak kotonon eng' peetuunooto Mikael, pounindet ne oo ne toreti lagogap piiguk. Tuun piitu peetuusyek che po nyalilda, che ki tomo kobiitu kobooch ngap kobiit pororyet agoi peetuunooto. Ago kisaru piiguk eng' peetuusyechooto, age tugul ne ki kisirchi kainennyi bukuit.

2Ak kong'eetyo che chaang' eng' icheek che ki koruiyo eng' ng'ung'unyek, pendi alak sobodap koigeny, ak kobendi alak teweernateet ak chotisyet ne po agoi.

3Tuun iluu che utaatiin ko uu kakweng'et ne po parak; ak kooluu koigeny ak koigeny ko uu kecheik icheek che imutyin che chaang' imanda.

4Ago tuch ng'aleechu, ee Daniel, ak ing'ooch bukuit agoi peetuusyek che po let. Tuun rwaati che chaang', ak kotesak naet.

5Ki ageer anyun anee Daniel, ak ogeero, ki tononso alak aeng'u, ki tonone age ngeguutap aineet pitoni, kotonone age ngeguutap aineet pitoniin.

6Ki teebe age ne ki ilaachi ngoroigap katanit, ne ki mi paragutap peegap ainonooto koleenji, “Tyanitu si koek kagesunetap kwang'utichu?”

7Agas chiito ne ki ilaachi ngoroigap katanit ne ki mi paragutap peegap ainonooto, ye kinamjin parak eunnyi ne po tai ak eunnyi ne po kaataam kotokyi kipsengwet. Ak ki agas koyasyo eng' ineendet ne sabei koigeny kole punjin kenyiit, kenyiisyek ak kebebertap kenyiit, ak ye tuun kagogees icheek tonet ne tonatoni kimnateetap piik che tiliileen, kogeskei anyun tuguuchuuto tugul.

8Ki agas ago ma aguiye; yeityo amwa ale, “Ee kiptaiyandennyu, egu nee kagesunetap tuguuchuuto?”

9Ki le ineendet, ui inyee Daniel, amu kagituch ng'aleechuuto ak keng'och kot koit peetuusyek che po kagesunet.

10Ianyinyegei che chaang', ak koyaegei koleelagitu, ak kotiliilegei; ago yaei kiptengeginik tengekto. Ama iguitos kiptengeginik agot agenge, ago iguitos icheek che utaatiin.

11Kobooch peetuusyek che ki istoi kagoochinet ne kibeelei ne po kotugul, ak kinde kiit ne kiwechei ne ng'emisyei, ko egu peetuusyek eliphuut agenge ak pogol aeng' ak tamanwogik sogool.

12Iberuurot ineendet ne igenisyei, ne itei peetuusyek eliphuut agenge ak pogol somok ak sosom ak muut.

13Ago ui inyee oldang'ung' agoi koit kagesunet: amu imuunyi, ak tuun itononi eng' komostang'ung', eng' kagesunetap peetuusyechooto.

← Chapter 11 Jump to: