Habakkuk 1

Kalenjin 2019 (Bukuit Ne Tilil)

Jump to: Chapter 2 →

1Maonateet ne ki keer maotyot Habakkuk.

2Ee Kamuktaindet ne Toroor, aguursei kot kotyanit, amegase? Anan ariirchinin aleen “Koroomnateet” ago mesaru.

3Amu nee si iboorwo tengekto, ak igoono ageer kamaaset? Mi tainnyu ng'emisyet ak poryeet; ak komi polateet ak kong'eetei suryeet.

4Ki kochoriren ng'atuutyet amu nooto; ama komi kirwooget ne kirwoochi. Yiemei kiptengekyot chiito ne po iman; kirwoochi anyun kirwooget kimaasi.

5Ogeer, okweek kwenutap pororyosyek, ak obwaat! Ak okwong'ye miising', amu ayae poisyet eng' peetuusyekwok, ne moyani agot ngemwaiwok.

6Amu, keero, ang'eeti Kaldeik, pororyet ne koroom ne choktoi; che punei kwenutap emet, si konam meng'otosyek che ma chechwaak kobunji.

7Imuisei icheek, ak kiywei: mang'une icheeget kirwoogennywa ak toroorindanywa.

8Chepcheben kogeny paraisisyekwak kosiir keteet, ak ko koroomen kosiir suik che po koskoleny; ak koboortogei piikwak che ketei paraisisyek: ee, punu pichooto ole loo; tirirendos ko uu kipsiichit ne choktoi kowendi koamisyei.

9Pwoonei tugul agobo koroomnateet; tokyin togoochikwak eng' kimnateet ko uu usoonetap kong'asiis; ak koyumi luulenik ko uu ng'aniek.

10Ee, chotei laitorinik, roryot pounik eng' ineendet: rorechin irimeet age tugul; amu iyumi temburyek, ak koip.

11Iwiktogei ko uu usoonet, ak kosiirto, ak konam ng'oogisto: ineendet ne kamuktaindennyi kimnateennyi.

12Tos, me po koigeny, inyee, ee Kamuktaindet ne Toroor Kamuktaindennyu, Ineendet ne Tiliil ne nenyu? Ma kibegu. Ee Kamuktaindet ne Toroor, ki ichopchi ineendet kirwooget; ak ee inyee rwandet, ki igimit ineendet si kobiit kitigon.

13Inyee ne itinye koonyek che tiliileen kot ko mechame igeer yaityet, amechame igeer kamaaset, amu nee anyun si igeere che yaei kaberberisyet, ak isise ye igeere kiptengekyot kolugui chiito ne po iman kosiir ineendet;

14ak igoochini piik koigei njireenigap nyanjet, koigei tuguuk che ichuutegei, che ma tinyei pounindet?

15Name icheek tugul kateet ne uu kombet, name icheek regereiywondennyi ne kiname njireenik, ak koyumji regereiywondennyi ne oo: paibaitu anyun ak kogaskei.

16Eng'jin anyun regereiywondennyi ne kiname njireenik, ak kobeeljin nyamdutik regereiywondennyi ne oo; amu nyoorunee chooto tuguukyik che myach, ak amitwogikyik che chaang'.

17Tos tumdoi anyun tuguuk che mi regereiywondennyi, ama pagaktoi ineendet kobar pororyosyek kotugul?

Jump to: Chapter 2 →