Hebrews 3

Kalenjin 2019 (Bukuit Ne Tilil)

← Chapter 2 Jump to: Chapter 4 →

1Nooto anyun, che kitupche che tiliileen, yamdoigap kuurseetap kipsengwet, obwaat miising' Kayooktoindet ak Tisiindet ne oo ne po ng'ang'ennyo, ineendet Jeso;

2ne ki ek ne kiyani eng' ineendet ne ki lewen, ko uu Musa agine eng' kootap Kamuktaindet tugul.

3Amu ki kiit keele nyoljin toroornatet ne oo kosiir Musa, ko uu ye tinyei ineendet ne kiteechei koot teegisto kosiir koot.

4Amu teechei chiito koot age tugul; ago ineendet ne kiteechei tuguuk tugul ko Kamuktaindet.

5Ak ki ek Musa iman ne kiyani eng' kootap Kamuktaindet tugul ko uu kiboityot, agobo paornateet ne po tuguuchooto che kitun kemwa eng' let;

6ago Kristo ko uu weeriit, ne pou koonnyi; acheek koonnyi, ngenam miising' nyiganatennyo ak toroornatetap kamang'unennyo agoi kagesunet.

7Nooto anyun, ko uu ye mwaei Kabuuset ne Tiliil kole, Ngot ogas kutinnyi rani,

8Ko matouiit mugulelwekwok, ko uu eng' kaiimset, Ko uu eng' peetuutap yoomseet eng' surkwen,

9Ye kiyoma kwanisyekwok kotyema, Ak ki keer poisyonikyuk kenyiisyek artam.

10Eng' nooto anyun ki anereekyi ibini, Ak ki ale, ichiliili kotugul eng' mugulelwekwak: Ago ki ma kongen ortinwekyuk;

11Ko uu ye ki ayosye eng' nereegekyuk ale, Ma itei icheek kamuung'ennyu.

12Oriipkei anyun che kitupche, si ma piit chii age tugul eng' okweek ne tinyei muguleldo ne ya ne po pistoet, koistoegei Kamuktaindet ne sabei:

13ago oteechigei peetuut age tugul, eng' ye ta kemwaei keele rani; si ma kiuit chii age tugul eng' okweek amu kenisyetap tengekto:

14amu kigeegu yamdoigap Kristo, ngenam miising' taunetap kamang'unennyo agoi kagesunet:

15ye ta kemwaei keele, Ngot ogas kutinnyi rani, Ko matouiit mugulelwekwok, ko uu eng' kaiimset.

16Amu ng'oo che kitagis ye kingo kas? Tos ma icheek tugul che ki mang'une Misiri eng' Musa?

17Ak ng'oo che ki nereekyi ineendet kenyiisyek artam? Tos ma icheeget che kichalwogenso, che ki ibutyi muuswekwak surkwen?

18Ak ng'oo che ki iyasyechi ineendet kole ma koi iit kamuung'ennyi, tos ma icheek che ki ingelelso?

19Kigeere anyun keele ki ma imuuch icheek koit amu ma iyan.

← Chapter 2 Jump to: Chapter 4 →