Hosea 14

Kalenjin 2019 (Bukuit Ne Tilil)

← Chapter 13 Jump to:

1Ee Israel, weekyigei Kamuktaindet ne Toroor Kamuktaindeng'ung'; amu ki ibut eng' tengektong'ung'.

2Ip ng'aleek, ak iweekyigei Kamuktaindet ne Toroor: ileenji ineendet: Iste tengekwogik tugul, ak itaach che myach: kigoitoi anyun kagoochinetap kutusweekyok ne kata kigoitoi kiruugik.

3Ma sarwech Ashur; ma kilaanye paraisisyek: ama keleenjini kogeny poisyonigap eunekyok, Oo kamuktaikyok: amu nyoorunenen rireenet icheek che ma tinyei kwanisyek.

4Asoobi kachuchugeng'wong' pogei, achame icheek miising': amu kogoistoegei ineendet nereegekyuk.

5Aigeitu rewoot eng' Israel: yiei ineendet ko uu taapteet ne karaaran, ak kowakta tigitikyik ko uu Lebanon.

6Iwaktoi mooriikyik, ak koigei mseituni karaaranindanyi, ak koigei siiptanyi Lebanon.

7Weeksei icheeget che menyei urwennyi; saptos ko uu peek, ak koyiei ko uu keetitap sabibuk: igeitu ng'uunennyi ne po divaigap Lebanon.

8Tuun mwaei Ephraim kole, ta keting'egei nee kogeny ak kanamonik? Kaawolu, ak ageer ineendet: auu piribiret ne tuon; punwa logoeguk.

9Ng'oo ne ng'oom, si koguiyo tuguuchuuto? Ng'oo ne utaat, si konai tuguuchooto? Amu lititen ortinwegap Kamuktaindet ne Toroor, ak pendotee che po iman ortinwechooto; ago ibutyin olooto pistoik.

← Chapter 13 Jump to: