James 5

Kalenjin 2019 (Bukuit Ne Tilil)

← Chapter 4 Jump to:

1Ogas anyun, okweek mogoreek, oriirye ak oteeiye amu nyalwogikwok che pwonjinok.

2Kagonunio mogornatosyekwok, ak kigoam kuutik ngoroikwok.

3Kagong'emogis thahabusyekwok ak fedhaisyekwok; ak tuun egu ng'emisyennywa paornateet eng' okweek, ak tuun amei poorwekwok ko uu maat. Kaogonorchigei mogornateet eng' peetuusyek che po let.

4Ogeero, poldos melekwegap kiboitiinik che kigesei mbareenikwok, che ki onamdegei: ak ki kochut iitiigap Kiptaiyatap Lugoosyek riiregap icheek che kigesei.

5Ki omeng'iisye eng' ng'wony eng' kabaibaetapkei, ne ki obaibaegei maguutikwok; ki obai mugulelwekwok eng' peetuutap eng'seet.

6Ki orwookyi, ak ki obar chiitap imanda; ama kirindook.

7Omuite anyun, che kitupche, kot koit nyonunetap Kiptaiyat. Ogeero, igeni chiitap ko po mbareet logoek che myachen che po ng'wony, ak komuitoi agobo chooto, kot konyoor ropta ne po tai ak ne po let.

8Omuite anyun ak okweek; ogimiit mugulelwekwok: amu kagoneegitit nyonunetap Kiptaiyat.

9Among'unyng'ung'jige okweegei, che kitupche, si ma kirwookwok: ogeero, tononi kirwoogindet eng' taitap kurgotik.

10Tupchosyechu, obwaat maotik che ki ng'alaal eng' kainetap Kiptaiyat, koek karogutyetap nyalilda ak muitaet.

11Ogeero, kiguure che kimuita che poiboen: ki ogas agobo muitaetap Job, ak ki ogeer kiit ne ki yai Kiptaiyat eng' let, ole nyiitaat rireenet Kiptaiyat, ak koriiregei.

12Ago ne siirei tuguuk tugul, tupchosyekyuk, ko matoyosye kipsengwet, anan ko ng'wony, anan ko eng' kayasyoet age tugul: ago ingoek ee neng'wong', ee, ak ingoek achicha neng'wong', achicha; si mobutyi kirwooget.

13Mi chii eng' okweek ne nyalili? Ingosa. Mi ne paibai? Ingotyen kalasunet.

14Miitei ne myani eng' kwenung'wong'? Ingoguur poisyegap kaniset; ak kosa icheek agobo ineendet, koiilee mwaita eng' kainetap Kiptaiyat:

15ak kosoop saaetap kayaneet ineendet ne myani, ak kong'eet `Kiptaiyat ineendet; ak ngot ko ki koyai tengekwogik, kenyochi kaat.

16Ong'aang'jige anyun kachiliilutikwok okweegei, ak osachinigei okweegei, si kobiit kisaabok. Toretisyei miising' saaetap chiito ne po imanda ngo saa eng' kagiiletapkei.

17Ki chiito Elijah ne uu acheek, ak ki sa ko ki ilgei kole si ma robon; ak ma robonji ng'wony eng' kenyiisyek somok ak arawek lo.

18Ak ki sa kogeny; ak kigon kipsengwet ropta, ak ki ii ng'wony logoekyik.

19Che kitupche, ngot komi chii eng' kwenung'wong' ne mastoi eng' imanda, ak kowal chii ineendet;

20ko ingonai kole ineendet ne walei kiptengekyot kobagaakta mastaetap ooreennyi kosaru saboondo eng' meet, ak kotuchei tengekwogik che chaang'.

← Chapter 4 Jump to: