Malachi 1

Kalenjin 2019 (Bukuit Ne Tilil)

Jump to: Chapter 2 →

1Nyigiisindap ng'olyootap Kamuktaindet ne Toroor ne ki igoochi `Malaki Israel.

2Ki achamak, mwaei Kamuktaindet ne Toroor. Ago omwae ole, “Ki ichamenech nee?” Komwa Kamuktaindet ne Toroor kole: Tos ki ma ko ng'eetap kametap `Jakobo Esau? Nga uu nooto ko ki acham Jakobo;

3awech Esau, ak ayai emennyi ne po tuloonook koguber, ak agoochi porotennyi lelwek che po surkwen.

4Nga mwaei Edom kole ki kiterterech, ago kiweeksei ak keteech komoswek che ki koek karatwek, ko mwaei Kamuktaindet ne Toroor ne po lugoosyek kole, “Tuun teechei icheek ago abute. Kuuree piik icheek emetap yaityet, piik che ating'ee nereegek koigeny”

5Tuun ogeere ak omwa ole, “Ingotoroorok Kamuktaindet ne Toroor kot kosiir kiwotetap Israel.”

6Igoochin konyit weeriit kwandanyi, ak kogonyiti otwogindet kiptaiyandennyi. Ngot ko aa kwanda anyun, komi ano teegistanyu? Ak ngot ko aa kiptaiyat, komi ano kaiyweisyet ne kiywea? Mwaiwok Kamuktaindet ne Toroor ne po lugoosyek ee tisiik, che osase kainennyu. Omwae ole ki kisaste ano kaineng'ung'?

7Ogoitoi magatiinik che murwonen eng' kaptisisyennyu ak omwae oleen, “Ki kimurwonden ano?” Ye omwae oleen sasaat meesetap Kamuktaindet ne Toroor.

8Ye ogoitoi che koryotiin koek tiseiywek, ko tos ma yaityet nooto? Ak ye ogoitoi che ing'waldos ak che myandos, ko tos ma yaityet nooto? Ye igoochi anyun nooto pounindeng'ung' ko tos paibaitunenen? Anan tos taachin ye keerin? Mwaei Kamuktaindet ne Toroor ne po lugoosyek.

9Asoomok anyun ale, osoom chametap Kamuktaindet si kobiit korirenech. Ye ogoonu chooto kobun eunekwok, ko tos taach age eng' okweek ye keer? Mwaei Kamuktaindet ne Toroor ne po lugoosyek.

10Kaigai onde chii ne kerei kurgotik si molaal maat eng' kaptisisyennyu puch! Ma paibai eng' okweek agot kitigin, amataache kagoochinet ne punu eunekwok, mwaei Kamuktaindet ne Toroor ne po lugoosyek.

11Amu oo kainennyu eng' pororyosyek kobooch ole charunee asiis agoi ole roroktoe; ak kigoitoi eng' komosta age tugul nyamdutik che kibeelei agobo kainennyu, kobooto kagoochinet ne tiliil: amu oo kainennyu eng' pororyosyek, mwaei Kamuktaindet ne Toroor ne po lugoosyek.

12Ago ong'waniti ye omwae ole, Murwon meesetap Kamuktaindet ne Toroor, ak ko sasootin logoekyik, agot amitwogikyik.

13Omwae kogeny ole, Ogeero, kaimetapkei ne tya! Ak ogututae seruunek, mwaei Kamuktaindet ne Toroor ne po lugoosyek. Ki oibu che ki koam tyondo, che ing'waldos ak che myandos; oibu chooto koek tiseiywek. Tos ataach chuuto kobun eunekwok? Mwaei Kamuktaindet ne Toroor.

14Ago chuboot kaberberindet, ne tinyei mengit eng' akweennyi, ak koarorto, yeityo koeng'ji Kiptaiyat kiit ne tinyei perutyet. Amu Aa Laitoryat ne oo, ak kiywei kainennyu eng' pororyosyek mwaei Kamuktaindet ne Toroor ne po lugoosyek.

Jump to: Chapter 2 →