Obadiah 1

Kalenjin 2019 (Bukuit Ne Tilil)

Jump to:

1Ng'ang'utyetap Obadiah. Mwaei Kiptaiyat Kamuktaindet ne Toroor ko uu ni agobo Edom: Ki kegas ng'aleek che punu Kamuktaindet ne Toroor, ak ki kiyookto tononjinindet kwo ye mi pororyosyek, koleenji, ong'eetye! Ong'eetye kegirindee ineendet eng' lugeet.

2Keero, tuun aming'inin eng' pororyosyek; tuun kisasin miising'.

3Ki koberberin menoteetap muguleldang'ung', ee, inyee ne imenye ole kibetak eng' rwandet, ne toroor meng'ootennyi; ne mwaei eng' muguleldanyi kole, “Ng'oo ne tururwa?”

4Agot ngitiriren iwe parak miising' ko uu kipsiichit, agot ngiteech kesweng'ung' eng' ole mi kecheik, atururun eng' olooto, mwaei Kamuktaindet ne Toroor.

5Ngot kobwonjin chooriik, ngot kobwonjin rebiik kemoi, kebarin ne tya anyun! Tos machoorsei kot konyoor che yamei? Ngot kobwonjin piik che putei sabibuk, ko tos ma pagaaktoi turoonik?

6Kisiaktoi ano tuguugap Esau! Kicheeng'doi ano konoraikyik che ung'ootiin!

7Ki kong'aalin che ki onamegei tugul, ki koonin icheek agoi iit kiwoto; ki koterterin piik che ki oting'egei kaalyeet; riigenen mesteet `icheek che amei amitwogiguk, ma tinyei kaguiyet ineendet.

8Eng' peetuunooto, mwaei Kamuktaindet ne Toroor Ang'eme piik che utaatiin che po Edom, ak ang'em naet eng' tulweetap Esau?

9Ak toptobendos mureniguk che nyigoonen, ee Teman, si kobiit kebar chii age tugul eng' tulweetap Esau eng' parisyet.

10Tuchin teweernateet amu koroomnateet ne ki iyachi ng'eetap kamenng'ung' Jakobo, ak kebarin ak keisten koigeny.

11Eng' peetuut ne ki itononi eng' pitoniin, eng' peetuut ne ki ibe toek tuguukyik, ak kochut kipsagarek ormariichokyik, ak koseer parbareek agobo Jerusalem, ko ki iige inyee age eng' icheek.

12Ago amat igeer peetuutap ng'eetap kamenng'ung' eng' peetuutap tiritindanyi, amebaibaitu eng' lagogap Judah eng' peetuutap ng'emisyennywa; anan ing'alaal eng' menoteet eng' peetuutap pichiindo.

13Amechut ormariichetap piikyuk eng' peetuutap nyalildanywa; ee, amegeer usiisyennywa eng' peetuutap nyalildanywa, anan onam tuguukwak eng' peetuutap nyalildanywa.

14Ametonone ole tuiyechin ortinwek, ile itilde piikyik che chilildos; amegoite piikyik che ng'etu eng' peetuutap pichiindo.

15Amu kariikyi `peetuutap Kamuktaindet ne Toroor pororyosyek tugul. Ko uu ye ki iyai, keyaun ko uu nooto; weekyingei meting'ung' poisyoniguk.

16Amu ko uu ye ki oeisee eng' tulweennyu ne tiliil, eeisei ko uu nooto kotugul pororyosyek tugul, ee, eeisei ak koterteeryot, ak koigei tuguuk che ki ma komi.

17Ago piitu che chilildos eng' tulweetap Zion, ak kotiliilit; ak konam kootap Jakobo tuguugap pichooto, kobunji.

18Ak koek kootap Jakobo maat, ak koek kootap Joseph liplibenet, ak koek kootap Esau mobeek, ak kolalyo eng' kwenunnywa ak kobeel kogees, ama ng'etu chii eng' kootap Esau; amu kagomwa Kamuktaindet ne Toroor ng'olyoondoniito.

19Ak konam icheek che po murot tai tulweetap Esau kobunji; ak konam icheek che menyei emet ne soi ne po Philistiik; ak konam emetap Ephraim ak emetap Samaria kobunji, ak konam Benjamin emetap Gilead kobunji.

20Ak konam che kiga keluul che po lugoniito po piigap Israel che mi kwenutap Kanaanik, namei icheek kot koit Sarepat; ak namei che kiga keluul che po Jerusalem che mi Separad, nganasook che mi murot tai.

21Ak togosu `saruunik tulweetap Zion korwookyi tulweetap Esau; ak kobunji pounateet `Kamuktaindet ne Toroor.

Jump to: