1 Chronicles 17

Kalenjin Bible Revised (BUKUIT NE TILIIL Sireet ne Dutero Kanon)

← Chapter 16 Jump to: Chapter 18 →

1Ye ki menyei Daudi koonnyi, koleenji `ineendet maotyot Nathan, “Keero, amenye kootap keetiigap taragonik, ago menyei moingetap arorutyetap Kamuktaindet ne Toroor emait oriit.”

2Ki leenji `Nathan Daudi, “Yai tuguuk tugul che mi muguleldang'ung', amu mi Kamuktaindet ne Toroor kobooten.”

3Ak eng' kemounooto konyonji ng'olyootap Kamuktaindet Nathan koleenji

4ui ileenji Daudi otwogindennyu kamwa Kamuktaindet ne Toroor kole: “Meteekwo koot ne amenye.

5Tomo ameny koot kobooch peetuut ne ki amutu Israel kotogos, agoi ra; ago ki ameng'oote emait ak koot ne kituiyechin.

6Eng' komoswek tugul che ki awendotee kobooto Israel, ko tos ki amwachi ng'olyoo age eng' kirwoogigap Israel, che ki ang'at kobai piikyuk aleenji amu nee si moteekwo koot ne po taragonik?”

7Nooto anyun imwachini otwogindennyu Daudi ileenjini, “Kamwa Kamuktaindet ne Toroor ne po lugoosyek kole: Ki amutun eng' piutap keechiirek, ye ki isuboti keechiirek, si iegu pounindet eng' piikyuk Israel.

8Ki atebi kobooten eng' komosta age tugul ne ki iwe ak ki aiste puuniguk eng' taing'ung'. Nguno ayaun kainet ne uu kainaigap piik che eecheen che mi ng'wony.

9Alewenjini oldo piikyuk Israel ak amiine icheek si kobiit komeny oldanywa, ama kiutoi kogeny. Ma kota kobare `icheek lagogap yaityet kogeny, ko uu tai

10ak kobooch peetuut ne ki ang'ate kirwoogik koboi piikyuk Israel. Ak aterteeri puuniguk tugul. Kogeny amwaun ale teegun Kamuktaindet ne Toroor koot.

11Ye igeskei peetuusyeguk ak iwe ole mi kwanisyeguk, ang'eet iyoteng'ung', agenge eng' weeriiguk, ak agimiit laitornatennyi.

12Teekwa `ineendet koot, ak agimiiti ng'echerennyi ne po laitornatet koigeny.

13Aegu kwandanyi, ak koek weeriinnyu. Ma istoe ineendet rireenennyu ko uu ye ki aistoe ineendet ne ki indounenen.

14Ago andoi ineendet kotebee koonnyu ak kotebee laitornatennyu koigeny; ak ki kimiti ng'echerennyi ne po laitornatet koigeny.”

15Ki mwachi `Nathan Daudi ko uu ng'aleechuuto tugul, ak ko uu ng'ang'utyoni tugul.

16Yeityo kwo ko Laitoryat Daudi, ak kotebi eng' taitap Kamuktaindet ne Toroor, ak kole: “Aa ng'oo, ee Kamuktaindet ne po Toroornatet, ak nee koonnyu, kot imutwaa agoi ra?

17Ee Kamuktaindet, ki ek niito kiit ne ming'in eng' taing'ung', ago kaing'alaal agobo kootap otwogindeng'ung' eng' peetuusyek che chaang' che pwoonei, ak kaiita eng' koitetap chiito ne po toroornatet, ee Kamuktaindet ne po Toroornatet.

18Nee age neta komuuchi Daudi komwaun agobo teegisto ne ki yachi otwogindeng'ung'? Amu ingen otwogindeng'ung'.

19Ee Kamuktaindet ne Toroor, kaiyai etunatoni tugul agobo otwogindeng'ung', ak ko uu muguleldang'ung' inyegei, si ibarte tuguuchu eecheen tugul konaak.

20Ee Kamuktaindet ne Toroor, ma mi age ne ogerge, ama mi Kamuktaindet age kobatenen, ko uu eng' tugul che kigegas eng' itiikyok.

21Ak ngoro pororyet ne kergei ak piiguk Israel, che ki wo Kamuktaindet kotyakyigei koek piikyik, si iyachigei kainet eng' tuguuk che eecheen ak tuguuk che po kamuiset, ye ki ioon pororyosyek eng' taitap piiguk, che ki ityaach eng' Misiri?

22Amu ki iyai piiguk Israel koek piiguk koigeny, ak ki iegu `inyee Kamuktaindet ne Toroor Kamuktaindennywa.”

23Ara anyun, ee Kamuktaindet ne Toroor, ingogimiit koigeny ng'olyoot ne ki imwa agobo otwogindeng'ung' ak agobo koonnyi, ak iyai ko uu ye kaimwa.

24Ingogimiit kaineng'ung', ak kotororit koigeny keele, Kamuktaindet ne Toroor ne po lugoosyek ko Kiptaiyat Kamuktaindetap Israel, ineendet Kamuktaindet eng' Israel! Ki kimiiti kootap Daudi otwogindeng'ung' eng' taing'ung'.

25Amu ki ing'aang'ji otwogindeng'ung', ee Kamuktaindennyu, ile iteekyini ineendet koot. Ara kanyiganit anyun otwogindeng'ung' kosa eng' taing'ung'.

26Ara anyun, ee Kamuktaindet ne Toroor, ii Kamuktaindet! Kaiyomisyi otwogindeng'ung' kii myee.

27Nguno anyun, kebaibaitu iberuur kootap otwogindeng'ung', si kobiit kotep koigeny eng' taing'ung'; amu kaiberuur inyee, ee Kamuktaindet ne Toroor, ak ii iberuurot koigeny.

← Chapter 16 Jump to: Chapter 18 →