1 Corinthians 5

Kalenjin Bible Revised (BUKUIT NE TILIIL Sireet ne Dutero Kanon)

← Chapter 4 Jump to: Chapter 6 →

1Mwaat komyee keele miitei ibeetapkei kwenung'wong', ibeetapkei ne ma mi agot eng' Pororyosyek, keele ibegei chii ak osotyotap kwandanyi.

2Ak omendosi, ama agot oaragense, si kobiit keisto eng' kwenung'wong' ineendet ne ki yai kioto.

3Amu anee iman, ko mamite eng' poorto, ago amite eng' saboon, kaarwookyi anyun ineendet ne ki yai kiito ko uu nooto, ko uu ye amite,

4ye koyumge eng' kainetap Kiptaiyandennyo Jeso, kobooto saboondanyu, ak kamuktaetap Kiptaiyandennyo Jeso,

5ogoochi Setani chiito ne uu nooto si keng'em poorto, si tuun kesar saboondanyi eng' peetuutap Kiptaiyat Jeso.

6Ma karaaran kalasuneng'wong' pogei. Tos mongen ole igutu mermereek tutigin kererutyet komugul?

7Ounde mermereek che po keny, si kobiit oegu kererutyet ne leel, ko uu ye ma mi mermereek eng' okweek. Amu kigeeny agine arwennyo ne po Paska, nooto ko Kristo:

8nooto anyun ongeriip igoorto, ma eng' mermereek che po keny, anan eng' mermeregap yaityet ak tengekto, ago eng' magatyat ne ma kinde mermereek che ma tinyei keniisyet ak po iman.

9Ki asirwak eng' parweennyu ale amonamge ak piik che soksei;

10ma mwaei ale otabaanegei miising' che soksei che po ng'wonyuni, anan kipkeinik anan rebiik, anan che saaei kanamonik; amu nda uu nooto ta kanyooljok omande eng' ng'wony:

11ago nguno asirwok, ale amonamge ak chii age tugul ne kiguure tupchet, ne soksei, anan kipkeiyat, anan ne saaei kanamonik, anan ne chubisyei, anan kibogityot, anan rebindet; amat oamjine ak chiito ne uu nooto, achicha.

12Amu amage nee arwookyi icheek che miitei saang'? Tos morwookyini okweek icheek che miitei ko?

13Ago icheek che miitei saang' korwookyin Kamuktaindet chooto. Oiste anyun chiichooto sogoran eng' kwenung'wong'.

← Chapter 4 Jump to: Chapter 6 →