1 John 5

Kalenjin Bible Revised (BUKUIT NE TILIIL Sireet ne Dutero Kanon)

← Chapter 4 Jump to:

1Age tugul ne iyani kole Jeso ko Kristo kogigesich eng' Kamuktaindet: ak age tugul ne chamei ineendet ne kisichei, kochamei agine ineendet ne ki kisichei eng' ineendet.

2Kingen eng' niito keele ki chame lagogap Kamuktaindet, ye ki chame Kamuktaindet, ak keyae ng'atuutikyik.

3Amu ni chamyetap Kamuktaindet, ale keriip ng'atuutikyik: ama nyigiisen ng'atuutikyik.

4Amu age tugul ne kigesich eng' Kamuktaindet koterteeri ng'wony. Ak ni ko katerteeret ne iterteeri ng'wony, nooto kayanennyo.

5Ak ng'oo ineendet ne iterteeri ng'wony, kobatee ineendet ne iyani kole Jeso ko Weeriitap Kamuktaindet?

6Ni ko ineendet ne ki nyo eng' peek ak korotiik, ineendet ko Jeso Kristo; ma nyo eng' peek icheegei, ki nyo eng' peek ak korotiik.

7Amu mi somogu che paoryani:

8Kabuuset Tiliil, ak peek, ak korotiik; ak iyanjindos chooto somogu kibagenge.

9Ngot ketaache paornateetap piik, ko oo paornateetap Kamuktaindet kosiir ne po piik: amu paornateetap Kamuktaindet ko ni, keele, ki kobaoryan agobo Weeriinnyi.

10Ineendet ne iyani Weeriitap Kamuktaindet kotinyei paornatanooto eng' ineendet: ineendet ne ma iyani Kamuktaindet ko kagoyai ineendet koek kiplembechwa; amu ma iyan paornateet ne kibaoryan Kamuktaindet agobo Weeriinnyi.

11Ak paornatanooto ko ni, keele, ki koonech Kamuktaindet saboondap koigeny, ak mi sabooniito Weeriinnyi.

12Ineendet ne tinyei Weeriit kotinyei saboondo: ineendet ne ma tinyei Weeriitap Kamuktaindet koma tinyei saboondo.

13Kasirwak tuguuchu, si kobiit onai ole otinye saboondap koigeny, okweek che oyani kainetap Weeriitap Kamuktaindet.

14Ak ni nyiganateet ne ketinye eng' ineendet, keele ngesoom kiy age tugul ko uu magennyi, kogaseech:

15ak ngot kingen keele kaseech eng' kiit age tugul ne kisoome, kingen keele ki tinyei tuguuk che kigesoom ineendet.

16Ngot kogeer chii tupchennyi koyaei tengekto ne ma po meet, kosoom, si kogoochi Kamuktaindet saboondo agobo icheeget che kayai tengekto ne ma po meet. Mi tengekto ne po meet; ma mwaei ale kosoom agobo nooto.

17Kiy age tugul ne ma po imanda ko tengek: ak mi tengekto ne ma po meet.

18Kingen keele ma yaei tengekto chii age tugul ne kigesich eng' Kamuktaindet; ago ineendet ne kigesich eng' Kamuktaindet koriibei ineendet, ama twaei chiichooto ineendet ne ya.

19Kingen keele ki po Kamuktaindet acheek, ak miitei ng'wony komugul eng' pounatetap ineendet ne ya.

20Ak kingen keele kigonyo Weeriitap Kamuktaindet, ak ki kogoonech kaguiyet, si kobiit kenai ineendet ne po iman, ak kemi eng' ineendet ne po iman, eng' Weeriinnyi Jeso Kristo. Niito ko Kamuktaindet ne po iman, ak saboondap koigeny.

21Lagochu mengech, oistoegei kanamonik.

← Chapter 4 Jump to: