bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kalenjin
/
Kalenjin Bible Revised (BUKUIT NE TILIIL Sireet ne Dutero Kanon)
/
1 Kings 15
1 Kings 15
Kalenjin Bible Revised (BUKUIT NE TILIIL Sireet ne Dutero Kanon)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 16 →
1
Ki toi kolaitoran Abijam eng' Judah eng' kenyiitap taman ak sisiit ne po Laitoryat Jeroboam weeriitap Nebat.
2
Ki laitoran kenyiisyek somok eng' Jerusalem. Ki kiguure kamet Maaka cheptap Abisalom.
3
Kiwendote tengekwogik tugul che po kwandanyi che kiga sip koyai eng' ineendet. Ki ma kogesunotkei muguleldanyi eng' Kamuktaindet ne Toroor Kamuktaindennyi, ko uu muguleldap Daudi kwandanyi.
4
Ago ki igoochi Kamuktaindet ne Toroor Kamuktaindennyi ineendet tait eng' Jerusalem agobo Daudi, konde weeriinnyi ye me ineendet, ak kogimit Jerusalem.
5
Amu ki yai Daudi ne myee eng' taitap Kamuktaindet ne Toroor, ama masta eng' kiy age tugul ne ki ng'at ineendet, eng' peetuusyek tugul che po sabeennyi, kobatee eng' ng'olyootap Uriah Hitindet.
6
Ki cham komi lugeet eng' kwenutap Rehoboam ak Jeroboam eng' peetuusyek tugul che po sabeennyi.
7
Poisyonik che ng'etunotiin che po Abijam ak tuguuk tugul che ki yai, ko tos ma ki sirchi kitabuutap ateptap peetuusyek ne po laitorinigap Judah? Ak kimi lugeet eng' kwenutap Abijam ak Jeroboam.
8
Ak ki ru Abijam kobooto kwanisyekyik, ak ki kitupchi nganaseetap Daudi. Ki laitoran weeriinnyi Asa kogeer ineendet.
9
Ki toi kolaitoran Asa eng' Judah eng' kenyiitap tiptem ne po laitornatetap Jeroboam eng' Israel.
10
Ki laitoran kenyiisyek artam ak agenge eng' Jerusalem. Ki kiguure kamet Maaka cheptap Abisalom.
11
Ki yai Asa ne myee eng' taitap Kamuktaindet ne Toroor, ko uu ye ki yai Daudi kwandanyi.
12
Ki isto sodomik eng' emet ak ki isto kanamonik tugul che kiga koyai kwanisyekyik.
13
Ki isto agine kamennyi Maaka eng' laitornatet, amu kiga yachi Asera kanamwet ne kiwechei. Kibut Asa kanamwanooto ak kobeel eng' kererutap Kidron.
14
Nganda ma ki isto komoswek che torooreen, ko ki ititaat muguleldap Asa eng' Kamuktaindet ne Toroor eng' peetuusyekyik tugul.
15
Ki ip tuguuk che kiga kotabaan kwandanyi ak che kiga kotabaan ineendet che po fedha, thahabu ak tereenik kobwa kootap Kamuktaindet ne Toroor.
16
Ki cham komi lugeet eng' kwenutap Asa ak Baasha laitoryatap Israel eng' peetuusyekwak tugul.
17
Ki togosta Baasha laitoryatap Israel kwo kobargei ak Judah, ak koteech Ramah, si ma chamji chii age tugul komanda anan konyo oriit kap Asa laitoryatap Judah.
18
Konam anyun Asa fedha ak thahabu tugul che kiga ng'et eng' konoraigap kootap Kamuktaindet ne Toroor, ak konoraigap kootap laitoryat. Konde anyun eunegap otwogik ak ki iyookyi Laitoryat Asa tuguuchooto Ben-Hadad weeriitap Tabrimon, weeriitap Hesion, laitoryatap Syria, ne ki menyei Damasko, koleenji,
19
“Mi kasyinet kwenunnyo, inyee ak anee, ko uu ye kimi kwenutap kwandanyu ak kwandang'ung'. Keero, kaayogun kagoochinetap fedha ak thahabu, ui put kasyinet ne oting'egei ak Baasha laitoryatap Israel, si kobiit koistoenagei.”
20
Ki kas iit `Ben-Hadad Laitoryat Asa ak koyookto kiptainik che po lugosyekyik koba kobargei ak nganasoogap Israel. Ki par Ijon, Dan, Abel ne po Beth-maaka, ak Kinnereth tugul, kobooto emet tugul ne po Naphtali.
21
Kingo kas Baasha ng'olyoondonooto, ko mata koteech Ramah, ak ki wo komeny Tirzah.
22
Komwaita anyun Laitoryat Asa eng' Judah tugul, ma kituuch chii ak ki ip koigap Ramah, ak keetiik che ki mi yooto, che kiga koteekse Baasha. Kiteege Laitoryat Asa Geba ne po Benjamin, ak Mispa.
23
Poisyonik tugul che ng'etunotiin che po Asa, kimnateennyi tugul, tuguuk tugul che ki yai ak nganasook che ki teech, kotos ma ki sirchi kitabuutap ateptap peetuusyek ne po laitorinigap Judah? Eng' peetuusyegap osindanyi, ko ki nam myando keelyekyik.
24
Ki ru Asa kobooto kwanisyekyik ak ki kitup kobooto kwanisyekyik eng' nganaseetap Daudi kwandanyi. Ak ki laitoran Jehoshaphat weeriinnyi kogeer ineendet.
25
Ki toi kolaitoran Nadap weeriitap Jeroboam eng' Israel eng' kenyiitap aeng' ne po Asa laitoryatap Judah, ak ki laitoran eng' Israel kenyiisyek aeng'.
26
Ki yai yaityet eng' taitap Kamuktaindet ne Toroor, kowendote ortinwegap kwandanyi ak tengektanyi, ne ki ibeete Israel si koyai tengekto.
27
Ak kichaam ineendet Baasha weeriitap Ahija, ne po kootap Issakar. Ye kiga yiem Nadap ak Israel tugul Gibeton ne ki po Philistiik, ko ki ibookyi Baasha ak kobar ineendet eng' olooto.
28
Ki par Baasha ineendet eng' kenyiitap somok ne po Asa laitoryatap Judah, ak kolaitoran kogeer ineendet.
29
Kingo kata koek laitoryat, kobar koot tugul ne po Jeroboam. Ma ituukyi Jeroboam agot agenge ne kisop, agoi kobar ineendet kogees: ko uu mwaetap Kamuktaindet ne Toroor, ne ki mwa eng' otwogindennyi Ahija Silonindet,
30
amu tengekwogigap Jeroboam che ki yai, che ki ibeete Israel si koyai tengekto, ak amu taget ne kitach Kamuktaindet ne Toroor, Kamuktaindetap Israel, si konereech.
31
Poisyonik che ng'etunotiin che po Nadap, ak tuguuk tugul che ki yai, koma siraatiin eng' kitabuutap ateptap peetuusyek ne po laitorinigap Israel?
32
Ki cham komi lugeet eng' kwenutap Asa ak Baasha laitoryatap Israel eng' peetuusyekwak tugul.
33
Kitau Baasha weeriitap Ahija kolaitorani eng' Israel eng' Tirzah eng' kenyiitap somok ne po Asa laitoryatap Judah, ak ki laitoran kenyiisyek tiptem ak ang'wan.
34
Ki yai yaityet eng' taitap Kamuktaindet ne Toroor, kowendote ortinwegap Jeroboam ak tengektanyi, ne ki ibeete Israel si koyai tengekto.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22